ಮೈಸೂರು: 'ಅತಿಥಿ ಸತ್ಕಾರ' ಎಂಬುದು ಭಾರತೀಯ ಸಂಸ್ಕೃತಿಯ ಪ್ರತೀಕ. ಮನೆಗೆ ಬರುವ ಅತಿಥಿಗಳನ್ನು ಸತ್ಕರಿಸಿ ಗೌರವಪೂರ್ವಕವಾಗಿ ಅವರನ್ನು ಬೀಳ್ಕೊಡುವುದು ನಮ್ಮ ಸಂಪ್ರದಾಯ. ಇದನ್ನೇ ಇಲ್ಲೊಬ್ಬ ಮಹಿಳೆ ಉದ್ಯೋಗವನ್ನಾಗಿ ಮಾಡಿಕೊಂಡು ಯಶಸ್ವಿ ಮಹಿಳಾ ಉದ್ಯಮಿಯಾಗಿ ಬೆಳೆದಿದ್ದಾರೆ.
ಇವರ ಹೆಸರು ಶಶಿಕಲಾ ಅಶೋಕ್. ಮೈಸೂರು ನಿವಾಸಿ. ಮೈಸೂರಿಗೆ ಬರುವ ವಿದೇಶಿಯರನ್ನು ಸತ್ಕರಿಸಿ ಭಾರತೀಯ ಸಂಪ್ರದಾಯ, ಪರಂಪರೆ, ಆಚಾರ ವಿಚಾರಗಳ ಪರಿಚಯ, ಭಾರತೀಯ ಶೈಲಿಯ ಊಟವನ್ನು ಅವರಿಗೆ ಉಣ ಬಡಿಸುವ ಮೂಲಕ ಅದನ್ನೇ ಬಂಡವಾಳ ಮಾಡಿಕೊಂಡಿದ್ದಾರೆ.
ಅತಿಥಿ ಸತ್ಕಾರ ಉದ್ಯಮವಾಗಿ ಬೆಳೆದಿದ್ದು ಹೇಗೆ?: ಶಶಿಕಲಾ ಅವರು ಸಾಮಾನ್ಯ ಗೃಹಿಣಿಯಾಗಿದ್ದರು. ಅಡುಗೆ ಮನೆಯಿಂದ ಹೊರಬಂದು ಬೇರೆ ಏನಾದರೂ ಸಾಧನೆ ಮಾಡಬೇಕು ಎಂಬ ಆಸೆ ಇತ್ತು. ಇವರ ಪತಿ ಟ್ರಾವೆಲ್ ಏಜೆನ್ಸಿ ನಡೆಸುತ್ತಿದ್ದಾರೆ. ಒಮ್ಮೆ ಬ್ರಿಟನ್ ದೇಶದಿಂದ ಬಂದಿದ್ದ ದಂಪತಿ ಮೈಸೂರಿನ ಅರಮನೆ ಹಾಗೂ ಇಲ್ಲಿನ ಪಾರಂಪರಿಕ ಕಟ್ಟಡಗಳು ಹಾಗೂ ಸಂಸ್ಕೃತಿಯನ್ನು ಕಂಡು ಸಂತೋಷಗೊಂಡು ಶಶಿಕಲಾ ಅವರ ಪತಿಗೆ ನಾವು ಇಲ್ಲಿನ ಜನರ ವಾಸ, ಜೀವನ ಶೈಲಿ ಹಾಗೂ ಆಹಾರ ಪದ್ಧತಿ ಬಗ್ಗೆ ತಿಳಿದುಕೊಳ್ಳಬೇಕು ಎಂದು ಕೇಳಿಕೊಂಡಿದ್ದಾರೆ.
ಆಗ ಅವರು ತಮ್ಮ ಮನೆಗೇ ಆತಿಥ್ಯಕ್ಕೆ ಕರೆದಿದ್ದಾರೆ. ಬ್ರಿಟನ್ ಯಾತ್ರಿಗಳು ಶಶಿಕಲಾ ಅವರು ತಯಾರಿಸಿದ ಊಟ ಸವಿದು ಹಾಗೂ ಅವರ ಸತ್ಕಾರವನ್ನು ಕಂಡು ಸಂತೋಷಗೊಂಡಿದ್ದಾರೆ. ಬಳಿಕ ಇದನ್ನೇ ಉದ್ಯೋಗವನ್ನಾಗಿ ಮಾಡಿಕೊಳ್ಳಲು ಸಲಹೆ ನೀಡಿದ್ದಾರೆ. ಮೈಸೂರಿಗೆ ಬರುವ ವಿದೇಶಿಯರಿಗೆ ಇಲ್ಲಿನ ಊಟವನ್ನು ಸವಿಯುವ ಅವಕಾಶವನ್ನು ನೀವು ನೀಡಬಹುದು ಎಂದು ತಿಳಿಸಿದ್ದಾರೆ.
ಶಶಿಕಲಾ ಅವರು ಇದನ್ನು ಮೊದಮೊದಲು ನಿರಾಕರಿಸಿದರೂ, ಬಳಿಕ ಪತಿ ಹಾಗೂ ಸ್ನೇಹಿತರ ಒತ್ತಾಯದ ಮೇರೆಗೆ 'ಅತಿಥಿ ಸತ್ಕಾರ'ವನ್ನು ಶುರುವಿಟ್ಟುಕೊಂಡಿದ್ದಾರೆ. ಮೊದಲ ಬಾರಿಗೆ 20 ವಿದೇಶಿಯರಿಗೆ ಅಡುಗೆ ಮಾಡಿ ಬಡಿಸಿದ್ದಾರೆ. ಇದನ್ನು ಸವಿದು ಅವರು ಖುಷಿ ವ್ಯಕ್ತಪಡಿಸಿದ್ದಾರೆ. ಇದರಿಂದ ಪ್ರೇರಿತಗೊಂಡ ಶಶಿಕಲಾ ಅವರು 'ವಿದೇಶಿ ಅತಿಥಿ ಸತ್ಕಾರ' ಕೆಲಸವನ್ನು 2010 ರಿಂದ ಇಂದಿನವರೆಗೂ ಮುಂದುವರಿಸಿಕೊಂಡು ಬಂದಿದ್ದಾರೆ.
ಭೋಜನದ ಜೊತೆಗೆ ಸಂಗೀತ, ಆಟ: ಪ್ರಾರಂಭದಲ್ಲಿ ವಿದೇಶಿಯರಿಗೆ ಸಾಂಪ್ರದಾಯಿಕ ಭೋಜನ ಸತ್ಕಾರವನ್ನು ಮಾತ್ರ ಪ್ರಾರಂಭಿಸಿದರು. ತದನಂತರ ಭೋಜನದ ಜೊತೆಗೆ ಭಾರತೀಯ ಸಂಸ್ಕೃತಿ, ಇಲ್ಲಿನ ಆಚಾರ ವಿಚಾರಗಳ ಪರಿಚಯ, ಶಾಸ್ತ್ರೀಯ ಸಂಗೀತ, ನೃತ್ಯ, ಹಾಗೂ ಸ್ಥಳೀಯ ಆಟಗಳು, ಸೀರೆ ಉಡಿಸುವುದು, ಅಲಂಕಾರ ಮಾಡುವುದು, ರಂಗೋಲಿ ಬಿಡಿಸುವುದು, ಹೂ ಕಟ್ಟುವುದು ಹಾಗೂ ಇತರ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಏರ್ಪಡಿಸಿದ್ದಾರೆ.
ಇಲ್ಲಿಯವರೆಗೂ ಸುಮಾರು 25 ಕ್ಕೂ ಹೆಚ್ಚು ದೇಶಗಳ ಪ್ರವಾಸಿಗರಿಗೆ ಸತ್ಕಾರವನ್ನು ನೀಡಿದ್ದಾರೆ. ವರ್ಷಕ್ಕೆ 3 ಸಾವಿರ ವಿದೇಶಿಗರಿಗೆ ಅತಿಥಿ ಸತ್ಕಾರ ಮಾಡಬೇಕು ಎಂಬ ಗುರಿಯನ್ನು ಇಟ್ಟುಕೊಂಡಿದ್ದೇನೆ ಎಂದು ಶಶಿಕಲಾ ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ: ವಿಶ್ವ ಮಹಿಳಾ ದಿನ ವಿಶೇಷ: ಬುಡಕಟ್ಟು ಮಕ್ಕಳ ಶಿಕ್ಷಣಕ್ಕಾಗಿ 16 ಕಿಲೋ ಮೀಟರ್ ಕ್ರಮಿಸುವ ಶಿಕ್ಷಕಿ
