ಮಹಾನಗರ ಪಾಲಿಕೆಯ ನೀರಿನ ದರ ಏರಿಕೆಗೆ ಕಾಂಗ್ರೆಸ್ ಪಕ್ಷವೇ ಕಾರಣ: ವೇದವ್ಯಾಸ ಕಾಮತ್

ಮಹಾನಗರ ಪಾಲಿಕೆಯ ನೀರಿನ ದರ ಏರಿಕೆಗೆ ಸಂಪೂರ್ಣವಾಗಿ ಕಾಂಗ್ರೆಸ್ ಪಕ್ಷವೇ ಕಾರಣ. ರಾಜ್ಯದಲ್ಲಿ ಸಮ್ಮಿಶ್ರ ಸರ್ಕಾರ ಆಡಳಿತ ಮಾಡುತ್ತಿರುವ ಸಂದರ್ಭ ನೀರಿನ ದರ ಏರಿಕೆಯಾಗಿದ್ದು ನೂರಕ್ಕೆ ನೂರು ಸತ್ಯ ಎಂದು ಶಾಸಕ ವೇದವ್ಯಾಸ ಕಾಮತ್ ಹೇಳಿದರು.

ಮಂಗಳೂರು: ಮಹಾನಗರ ಪಾಲಿಕೆಯ ನೀರಿನ ದರ ಏರಿಕೆಗೆ ಸಂಪೂರ್ಣವಾಗಿ ಕಾಂಗ್ರೆಸ್ ಪಕ್ಷವೇ ಕಾರಣ. ರಾಜ್ಯದಲ್ಲಿ ಸಮ್ಮಿಶ್ರ ಸರ್ಕಾರ ಆಡಳಿತ ಮಾಡುತ್ತಿರುವ ಸಂದರ್ಭ ನೀರಿನ ದರ ಏರಿಕೆಯಾಗಿದ್ದು ನೂರಕ್ಕೆ ನೂರು ಸತ್ಯ ಎಂದು ಶಾಸಕ ವೇದವ್ಯಾಸ ಕಾಮತ್ ಹೇಳಿದರು.

ನಗರದ ಕೊಡಿಯಾಲ್ ಬೈಲ್​ನಲ್ಲಿರುವ ಬಿಜೆಪಿ ಕಚೇರಿಯಲ್ಲಿ ಸುದ್ದಿಗಾರರನ್ನು ಉದ್ದೇಶಿಸಿ ಮಾತನಾಡಿದ ಅವರು, ಕಾಂಗ್ರೆಸ್ ನಾಯಕರು ಬಿಜೆಪಿ ಸರ್ಕಾರ ನೀರಿನ ದರ ಏರಿಕೆ ಮಾಡಿದೆ ಎಂದು ಗೂಬೆ ಕೂರಿಸುತ್ತಿದ್ದಾರೆ ಎಂದರು.

ಕಳೆದ ಜೂನ್ 15 ರಂದು ನೀರಿನ ದರ ಪರಿಷ್ಕರಣೆ ಮಾಡಲು ಅನುಮೋದನೆ ನೀಡಲಾಗಿತ್ತು. ಆ ಸಂದರ್ಭದಲ್ಲಿ ರಾಜ್ಯದಲ್ಲಿ ಜೆಡಿಎಸ್ ಮತ್ತು ಕಾಂಗ್ರೆಸ್ ಸರ್ಕಾರ ಆಡಳಿತದಲ್ಲಿತ್ತು. ಅಂದು ಜಿಲ್ಲೆಯ ಉಸ್ತುವಾರಿ ಸಚಿವರಾಗಿ ಕಾಂಗ್ರೆಸ್​ನ ಯು.ಟಿ ಖಾದರ್ ಅವರಿದ್ದರು. ಇಂದು ನೀರಿನ ದರ ಏರಿಕೆಯನ್ನು ಎಪ್ರಿಲ್ 1ರಿಂದಲೇ ಜಾರಿ ಮಾಡಿದ್ದು, ಇವರ ಆದೇಶದಲ್ಲಿ ನೀರಿನ ಬಿಲ್ ಅನ್ನು ಏಕಾಏಕಿ ಏರಿಕೆ ಮಾಡಿದ್ದಾರೆ. ಇದಕ್ಕೆ ನೇರವಾಗಿ ಕಾಂಗ್ರೆಸ್ ಪಕ್ಷವೇ ಕಾರಣ. ಅಲ್ಲದೆ 24 ಸಾವಿರ ಲೀಟರ್ ಗೃಹ ಬಳಕೆಯ ನೀರನ್ನು 8 ಸಾವಿರ ಲೀಟರ್​ಗೆ ಇಳಿಸಿದ್ದು ಖಂಡನೀಯ. ಇನ್ನು ಮಾಜಿ ಶಾಸಕರ ಮೇಲೆ ನಡೆದ ಹಲ್ಲೆಯನ್ನು ನೂರಕ್ಕೆ ನೂರು ಪ್ರತಿ ಶತ ನಾನು ಖಂಡಿಸುತ್ತೇನೆ ಎಂದು ವೇದವ್ಯಾಸ ಕಾಮತ್ ಹೇಳಿದರು‌.