ನವದೆಹಲಿ: ಬಹುನಿರೀಕ್ಷಿತ ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯುಪಿಎಲ್) 2025ರ ಆನ್‌ಲೈನ್ ಟಿಕೆಟ್ ಮಾರಾಟ ಶುಕ್ರವಾರ ಸಂಜೆ 6:00 ಗಂಟೆಗೆ (ಭಾರತೀಯ ಕಾಲಮಾನ) ಆರಂಭವಾಗಲಿದೆ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ತಿಳಿಸಿದೆ. ಡಬ್ಲ್ಯುಪಿಎಲ್ ಪ್ರಕಟಣೆಯ ಪ್ರಕಾರ, ಜನವರಿ 31ರಂದು ವಡೋದರಾ ಮತ್ತು ಬೆಂಗಳೂರಿನಲ್ಲಿ ನಡೆಯಲಿರುವ ಪಂದ್ಯಗಳಿಗೆ ಮೊದಲ ಹಂತದ ಟಿಕೆಟ್ಗಳು ಖರೀದಿಗೆ ಲಭ್ಯವಾಗಲಿವೆ.
"ಬಿಸಿಸಿಐ ಅತ್ಯಾಕರ್ಷಕ ಡಬ್ಲ್ಯುಪಿಎಲ್ನ ಮೂರನೇ ಆವೃತ್ತಿಗೆ ಬುಕ್ ಮೈ ಶೋ ಅನ್ನು ಅಧಿಕೃತ ಟಿಕೆಟಿಂಗ್ ಏಜೆನ್ಸಿಯಾಗಿ ಹೆಸರಿಸಿದೆ" ಎಂದು ಪ್ರಕಟಣೆ ತಿಳಿಸಿದೆ. ವಡೋದರಾ, ಬೆಂಗಳೂರು, ಲಕ್ನೋ ಮತ್ತು ಮುಂಬೈನಲ್ಲಿ ಮಹಿಳಾ ಟಿ20 ಲೀಗ್ ನಡೆಯಲಿದೆ.
ಮೊದಲ ಪಂದ್ಯ ಫೆಬ್ರವರಿ 14ರಂದು ವಡೋದರಾದಲ್ಲಿ ನಡೆಯಲಿದ್ದು, ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ವಿರುದ್ಧ ಗುಜರಾತ್ ಜೈಂಟ್ಸ್ (ಜಿಜಿ) ಸೆಣಸಲಿದೆ. ವಡೋದರಾದಲ್ಲಿ 6 ಪಂದ್ಯಗಳು ನಡೆದ ನಂತರ ಬೆಂಗಳೂರಿನಲ್ಲಿ ಪಂದ್ಯಗಳು ಆರಂಭವಾಗಲಿವೆ. ಫೆಬ್ರವರಿ 21 ರಂದು ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಡಬ್ಲ್ಯುಪಿಎಲ್ 2023 ವಿಜೇತ ಮುಂಬೈ ಇಂಡಿಯನ್ಸ್ ವಿರುದ್ಧ ಸ್ಮೃತಿ ಮಂದಾನ ನೇತೃತ್ವದ ಆರ್ಸಿಬಿ ತವರಿನಲ್ಲಿ ತನ್ನ ಮೊದಲ ಪಂದ್ಯವನ್ನು ಆಡಲಿದೆ.
ಫೆಬ್ರವರಿ 24ರಂದು ಯುಪಿ ವಾರಿಯರ್ಸ್ (ಯುಪಿಡಬ್ಲ್ಯೂ), ಫೆಬ್ರವರಿ 27 ರಂದು ಜಿಜಿ ಮತ್ತು ಮಾರ್ಚ್ 1ರಂದು ಎರಡು ಬಾರಿಯ ರನ್ನರ್ಸ್ ಅಪ್ ಡೆಲ್ಲಿ ಕ್ಯಾಪಿಟಲ್ಸ್ (ಡಿಸಿ) ವಿರುದ್ಧ ಆರ್ಸಿಬಿ ಆಡಲಿದ್ದು, ತನ್ನ ತವರು ಪ್ರೇಕ್ಷಕರಿಗೆ ಕ್ರೀಡೆಯ ರಸದೌತಣ ನೀಡಲಿದೆ.
ಇದೇ ಮೊದಲ ಬಾರಿಗೆ ಲಕ್ನೋದಲ್ಲಿ ನಾಲ್ಕು ಪಂದ್ಯಗಳು ನಡೆಯಲಿವೆ. ಅಲಿಸ್ಸಾ ಹೀಲಿ ನೇತೃತ್ವದ ಯುಪಿಡಬ್ಲ್ಯೂ ತಂಡ ಮಾರ್ಚ್ 3, 6 ಮತ್ತು 8 ರಂದು ಕ್ರಮವಾಗಿ ಜಿಜಿ, ಎಂಐ ಮತ್ತು ಆರ್ಸಿಬಿ ವಿರುದ್ಧ ಮೂರು ಪಂದ್ಯಗಳನ್ನು ಆಡಲಿದೆ.
ಡಬ್ಲ್ಯುಪಿಎಲ್ 2025ರ ಅಂತಿಮ ಹಂತವು ಮುಂಬೈನ ಬ್ರಬೋರ್ನ್ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಹರ್ಮನ್ ಪ್ರೀತ್ ಕೌರ್ ನೇತೃತ್ವದ ಮುಂಬೈ ಇಂಡಿಯನ್ಸ್ ಮಾರ್ಚ್ 10 ಮತ್ತು 11 ರಂದು ಕ್ರಮವಾಗಿ ಜಿಜಿ ಮತ್ತು ಆರ್ಸಿಬಿ ವಿರುದ್ಧ ಆಡುವುದರೊಂದಿಗೆ ಲೀಗ್ ಹಂತವು ಕೊನೆಗೊಳ್ಳಲಿದೆ.
ಮಾರ್ಚ್ 13ರಂದು ಎರಡನೇ ಮತ್ತು ಮೂರನೇ ಸ್ಥಾನ ಪಡೆದ ತಂಡಗಳ ನಡುವಿನ ಎಲಿಮಿನೇಟರ್ ಪಂದ್ಯ ಕೂಡ ಬ್ರಬೋರ್ನ್ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಇದರ ನಂತರ ಮಾರ್ಚ್ 15ರಂದು ಫೈನಲ್ ನಡೆಯಲಿದೆ.
ಇದನ್ನೂ ಓದಿ: ಶಾಕಿಂಗ್ ನ್ಯೂಸ್: 4 ವರ್ಷಗಳ ಬಳಿಕ ವಿರಾಟ್ ಕೊಹ್ಲಿಗೆ ಅನಿರೀಕ್ಷಿತ ಆಘಾತ! - VIRAT KOHLI
