ಮಂಗಳೂರು: ನಗರದ ಜಿಲ್ಲಾ ವೆನ್ಲಾಕ್ ಆಸ್ಪತ್ರೆಯ ಕೋವಿಡ್ ವಾರ್ಡ್ಗೆ ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ ವಿ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.
ಈ ಸಂದರ್ಭ ಕೋವಿಡ್ ಸೋಂಕಿತರೊಂದಿಗೆ ಮಾತನಾಡಿದ ಅವರು, ಚಿಕಿತ್ಸೆ, ಮೂಲ ಸೌಕರ್ಯಗಳ ಬಗ್ಗೆ ಮಾಹಿತಿ ಪಡೆದು ಯೋಗಕ್ಷೇಮ ವಿಚಾರಿಸಿದರು. ಬಳಿಕ ನಡೆದ ಸಭೆಯಲ್ಲಿ ಉಪಸ್ಥಿತಿ ಇದ್ದು, ಆಸ್ಪತ್ರೆಯ ಕುಂದು ಕೊರತೆಗಳನ್ನು ವಿಚಾರಿಸಿದರು.
ಈ ಸಂದರ್ಭ ಜಿಲ್ಲಾ ವೆನ್ಲಾಕ್ ಆಸ್ಪತ್ರೆಯ ಮೊದಲ ಮಹಡಿಯಲ್ಲಿನ ಡಯಾಲಿಸೀಸ್ ಕೊಠಡಿ ಸಹಿತ ಸಸ್ಪೆಕ್ಡ್ ವಾರ್ಡ್ ಅನ್ನು ಹಳೆಯ ಕಟ್ಟಡಕ್ಕೆ ಸ್ಥಳಾಂತರ ಮಾಡಬೇಕು. 15 ವೆಂಟಿಲೇಟರ್ ಸಾಮರ್ಥ್ಯದ ಐಸಿಯುವನ್ನು 50 ವೆಂಟಿಲೇಟರ್ ಐಸಿಯುವಾಗಿ ಪರಿವರ್ತಿಸಬೇಕು ಎಂದು ವೆನ್ಲಾಕ್ನ ವೈದ್ಯಾಧಿಕಾರಿಗಳಿಗೆ ಸೂಚನೆ ನೀಡಿದರು.
ಜೊತೆಗೆ ಅವಶ್ಯಕತೆ ಇದ್ದಲ್ಲಿ 50 ಸ್ಟಾಫ್ ನರ್ಸ್ಗಳ ನೇಮಕಾತಿ ನಡೆಸುವಂತೆ ಆದೇಶಿಸಿದರು. ರೋಗ ಲಕ್ಷಣಗಳಿಲ್ಲದ, ರೋಗಲಕ್ಷಣಗಳಿಂದ ಗುಣ ಮುಖರಾಗಿರುವ ಕೊರೊನಾ ಸೋಂಕಿತರನ್ನು 10 ದಿನಗಳು ಪೂರ್ಣಗೊಂಡ ಬಳಿಕ ಇಎಸ್ಐ ಆಸ್ಪತ್ರೆಗೆ ಸ್ಥಳಾಂತರಿಸಲು ಜಿಲ್ಲಾಧಿಕಾರಿಯವರು ಸೂಚನೆ ನೀಡಿದರು.
