ಕಲಬುರಗಿ : ಬಡತನದಲ್ಲಿ ಹುಟ್ಟಿದರೂ ಏನಾದ್ರೂ ಸಾಧನೆ ಮಾಡಬೇಕೆಂಬ ಅಚಲವಾದ ಗುರಿಯಿಟ್ಟು ನಿರಂತರ ಪ್ರಯತ್ನದಿಂದ ಪಿಎಸ್‌ಐ ಹುದ್ದೆ ಅಲಂಕರಿಸಿದ ವೀರಭದ್ರ ಎಸ್.ಹೆಚ್ ಅವರು ಇದೀಗ ದಕ್ಷತೆಯಿಂದ ಕಾರ್ಯ ನಿರ್ವಹಿಸಿ ಮುಖ್ಯಮಂತ್ರಿ ಪದಕ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಮೂಲತಃ ರಾಯಚೂರು ಜಿಲ್ಲೆ ಮಸ್ಕಿ ತಾಲೂಕಿನ ಹಸಮಕಲ್ ಗ್ರಾಮದ ಶಿವಪ್ಪ ಹಾಗೂ ಸಿದ್ದಮ್ಮ ದಂಪತಿಯ ಪುತ್ರನಾಗಿ ಜನಿಸಿದ ವೀರಭದ್ರ ಅವರು ಕೆಸರಿನಲ್ಲಿ ಅರಳಿದ ತಾವರೆಯಂತೆ ಬಡತನದಲ್ಲಿ ಶ್ರೇಷ್ಠ ಸಾಧನೆ ಮಾಡಿದ್ದಾರೆ. ಹಸಮಕಲ್ ಗ್ರಾಮದಲ್ಲಿ ಹೈಸ್ಕೂಲ್‌ವರೆಗೆ, ಗುಡದೂರದಲ್ಲಿ ಬಿಎ ವ್ಯಾಸಾಂಗ ಮಾಡಿ ಬಾಹ್ಯ ಅಭ್ಯರ್ಥಿಯಾಗಿದ್ದರು.
ಚಿಕ್ಕಂದಿನಿಂದಲೂ ಆಟ ಪಾಠದಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದ್ದ ವೀರಭದ್ರ ಅವರು ತಮ್ಮಲ್ಲಿನ ಆಟದ ಕಲೆ ಮತ್ತು ಓದಿನ ಆಸಕ್ತಿಯ ಮೂಲಕವೇ ಪೊಲೀಸ್ ಅಧಿಕಾರಿ ಆಗುವ ಕನಸು ಕಂಡವರು. ಅಚಲವಾದ ಗುರಿ, ನಿರಂತರ ಶ್ರಮದ ಮೂಲಕ ಪೊಲೀಸ್ ಅಧಿಕಾರಿ ಆಗುವ ತಮ್ಮ ಕನಸ್ಸಿಗೆ ನೀರೆರದು 2015ರಲ್ಲಿ ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಆಗುವ ಕನಸು ನನಸು ಮಾಡಿಕೊಂಡರು.
2015ರ ಬ್ಯಾಚ್ ಅಧಿಕಾರಿಯಾದ ವೀರಭದ್ರ ಅವರು 2018ರಿಂದ ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಆಗಿ ಸೇವೆ ಆರಂಭಿಸಿದ್ದಾರೆ. ವಾಡಿ ಠಾಣೆಯಲ್ಲಿ ದಕ್ಷ ಅಧಿಕಾರಿ ಅಂತಾ ಹೆಸರು ಪಡೆದಿದ್ದಾರೆ. ಇವರ ಪರಿಶ್ರಮಕ್ಕೆ ಇದೀಗ ಮುಖ್ಯಮಂತ್ರಿ ಪದಕ ಒಲಿದು ಬಂದಿದೆ. ವೀರಭದ್ರ ಎಸ್.ಹೆಚ್ ಅವರ ಸಾಧನೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆಗೆ ಪಾತ್ರವಾಗಿದೆ.
ದಕ್ಷತೆಯಿಂದ ಕಾರ್ಯ ನಿರ್ವಹಿಸಿದ ರಾಜ್ಯದ 135 ಪೊಲೀಸ್ ಸಿಬ್ಬಂದಿಗೆ 2021ನೇ ಸಾಲಿನ ಮುಖ್ಯಮಂತ್ರಿ ಪದಕ ಪ್ರಕಟಿಸಿದ ರಾಜ್ಯ ಸರ್ಕಾರ, ಏ. 2ರಂದು ಬೆಳಗ್ಗೆ 8 ಗಂಟೆಗೆ ಕೋರಮಂಗಲದ ಕೆಎಸ್‌ಆರ್‌ಪಿ ಪಡೆ–3ರ ಮೈದಾನದಲ್ಲಿ ಪದಕ ಪ್ರದಾನ ಮಾಡಲಿದೆ.
ಇದನ್ನೂ ಓದಿ: ಮುಖ್ಯಮಂತ್ರಿಗಳ ಪದಕಕ್ಕೆ ಭಾಜನರಾದ 115 ಪೊಲೀಸರು
