ಹುಬ್ಬಳ್ಳಿ: ಲ್ಯಾಪ್‌ಟಾಪ್ ರಿಪೇರಿ ನೆಪ ಹೇಳಿ ಹೆಚ್ಚಿನ ಹಣ ಕೇಳಿದ್ದ ಲೆನೊವೊ ಕಂಪನಿ ವಿರುದ್ಧ ಗ್ರಾಹಕರೊಬ್ಬರು ಜಿಲ್ಲಾ ಗ್ರಾಹಕ ಕೋರ್ಟ್ಗೆ ದೂರು ನೀಡಿದ ಹಿನ್ನೆಲೆ 8 ಸಾವಿರ ರೂ. ಪರಿಹಾರ ಮತ್ತು ಕನಿಷ್ಠ ಸೇವಾ ಶುಲ್ಕ ಪಡೆದು 30 ದಿನಗಳಲ್ಲಿ ಸಮಸ್ಯೆ ಬಗೆಹರಿಸಿಕೊಡುವಂತೆ ಕೋರ್ಟ್ ಆದೇಶ ನೀಡಿದೆ.
ವಿಕ್ರಮ ಕುಮಠಾ ಎಂಬುವವರು 2017ರಲ್ಲಿ ಲೆನೊವೊ ವೈ-520 ಲ್ಯಾಪ್ಟಾಪ್‌ಅನ್ನು ಸುಮಾರು 97,000 ರೂ.ಗೆ ಖರೀದಿಸಿದ್ದರು. 2019ರ ನವಂಬರ್ ತಿಂಗಳಲ್ಲಿ ಲ್ಯಾಪ್‌ಟಾಪ್ ಕೆಲಸ ಮಾಡುವಾಗ ಕೈ ಕೊಟ್ಟಿದೆ. 2 ವರ್ಷದ ವಾರಂಟಿ ಅವಧಿ ಮುಗಿದ ಕಾರಣ ಆನ್‌ಲೈನ್ ಕಂಪ್ಲೇಂಟ್ ಮೂಲಕ ಕಸ್ಟಮರ್ ಕೆರ್ ನಂಬರ್ ಪಡೆದು, ತಮ್ಮ ಲ್ಯಾಪ್‌ಟಾಪ್ ತೊಂದರೆ ತಿಳಿಸಿದ್ದಾರೆ. ಬಳಿಕ, ಹುಬ್ಬಳ್ಳಿಯ ಕೆಂಗೇರಿ ರಸ್ತೆಯಲ್ಲಿದ್ದ ಲೆನೊವೊ ಸರ್ವಿಸ್ ಸೆಂಟರ್‌ಗೆ ರಿಪೇರಿ ಮಾಡಲು ಕೊಟ್ಟಿದ್ದರು.
ಆದರೆ ಸರ್ವೀಸ್ ಸೆಂಟರ್‌ನವರು ನಾನಾ ಕಾರಣ ಹೇಳಿ ಲೆನೊವೊ ಕಂಪನಿಯಿಂದ ಹೊಸ ಮದರ್‌ಬೋರ್ಡ್ ಕೊಳ್ಳಲು ಹೇಳಿ ಸುಮಾರು 43,000ಕ್ಕಿಂತ ಹೆಚ್ಚು ಮೊತ್ತದ ಕೊಟೇಶನ್ ಕಳಿಸಿದ್ದಾರೆ. ಹೀಗಾಗಿ ವಿಕ್ರಮ ಧಾರವಾಡ ಗ್ರಾಹಕ ವೇದಿಕೆ ಮೊರೆ ಹೋಗಿದ್ದರು.
ವಿಕ್ರಮ ಸ್ವತಃ ತಾವೇ ವಾದ ಮಂಡಿಸಿದ್ದರು. ವಿಚಾರಣೆ ನಡೆಸಿದ ಗ್ರಾಹಕರ ವೇದಿಕೆ, ಪರಿಹಾರ ಹಾಗೂ ಕನಿಷ್ಠ ಸೇವಾ ಶುಲ್ಕ ಪಡೆದು ಲ್ಯಾಪ್‌ಟಾಪ್ ಸರಿಪಡಿಸಿಕೊಡುವಂತೆ ಇದೇ ಫೆ. 1ರಂದು ಲೆನೊವೊ ಕಂಪನಿಗೆ ಆದೇಶಿಸಿದೆ.
