ಕೋವಿಡ್ ಅಗತ್ಯ ಸಾಮಗ್ರಿಗಳ ಶುಲ್ಕ ರಹಿತ ಆಮದಿಗೆ ನೋಡಲ್ ಪ್ರಾಧಿಕಾರ ನೇಮಿಸಿ ಆದೇಶ

ಪಂಚಾಯತ್ ರಾಜ್ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಉಮಾ ಮಹದೇವನ್, ಆಯುಕ್ತರಾದ ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್​ ಅವರನ್ನು ಒಳಗೊಂಡ ನೋಡಲ್ ಪ್ರಾಧಿಕಾರ ನೇಮಕ‌ ಮಾಡಲಾಗಿದೆ

ಬೆಂಗಳೂರು: ಕೋವಿಡ್ ನಿಯಂತ್ರಣ ಹಾಗೂ ನಿರ್ವಹಣೆಗೆ ವಿದೇಶಗಳಿಂದ ಉಚಿತವಾಗಿ ಆಮದು ಮಾಡಿಕೊಳ್ಳುವ ಅಗತ್ಯ ಸಾಮಗ್ರಿಗಳಿಗೆ ಆಮದು ಶುಲ್ಕದಿಂದ ವಿನಾಯಿತಿ ಪಡೆಯುವ ಕುರಿತು ಪ್ರಮಾಣ ಪತ್ರ/ಧೃಡೀಕರಣ ನೀಡಲು ನೋಡಲ್ ಪ್ರಾಧಿಕಾರವನ್ನು ನೇಮಕ ಮಾಡಿ ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ.

ಪಂಚಾಯತ್ ರಾಜ್ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಉಮಾ ಮಹದೇವನ್, ಆಯುಕ್ತರಾದ ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್​ರನ್ನು ಒಳಗೊಂಡ ನೋಡಲ್ ಪ್ರಾಧಿಕಾರ ನೇಮಕ‌ ಮಾಡಲಾಗಿದೆ. ಕೋವಿಡ್ ಎರಡನೇ ಅಲೆ ಹೆಚ್ಚಿನ ಪ್ರಮಾಣದಲ್ಲಿ ಹರಡುತ್ತಿರುವ ಈ ಸಂದರ್ಭದಲ್ಲಿ ಕೋವಿಡ್-19 ವಿರುದ್ಧ ಹೋರಾಡಲು ಅಗತ್ಯ ಸಾಮಗ್ರಿಗಳನ್ನು ಆಸಕ್ತರು ಉಚಿತ ಆಮದು ಮಾಡಿಕೊಳ್ಳಲು ಇಚ್ಚಿಸಿದಲ್ಲಿ, ಅಂತಹ ಸಾಮಗ್ರಿಗಳಿಗೆ ಆಮದು ಶುಲ್ಕದಿಂದ ವಿನಾಯಿತಿ ಪಡೆಯಲು ರಾಜ್ಯ ಸರ್ಕಾರದಿಂದ ನೇಮಕವಾಗಿರುವ ನೋಡಲ್ ಪ್ರಾಧಿಕಾರದಿಂದ ಪ್ರಮಾಣ ಪತ್ರ/ದೃಢೀಕರಣ ಪಡೆಯಬಹುದು.

ಭಾರತ ಸರ್ಕಾರದ ಅಧಿಸೂಚನೆಯಲ್ಲಿ ನಮೂದಿಸಿರುವ ಕೆಲ ಸರಕುಗಳನ್ನು ಉಚಿತ ಆಮದು ಮಾಡಿಕೊಳ್ಳಲು ನಿಗದಿತ ಮಾದರಿಯಲ್ಲಿ ಇ-ಮೇಲ್ ವಿಳಾಸ importnodal.kar@gmail.com ಮೂಲಕ ಅರ್ಜಿ ಸಲ್ಲಿಸಬಹುದಾಗಿದೆ.