ಪೊಲೀಸರಿಗೆ ಬಿಡದೇ ಕಾಡುತ್ತಿರುವ ಮಹಾಮಾರಿ: ಬೆಂಗಳೂರಲ್ಲೇ 140ಕ್ಕೂ ಅಧಿಕ ಸಿಬ್ಬಂದಿಗೆ ಕೊರೊನಾ!

ಸಿಲಿಕಾನ್​ ಸಿಟಿಯಲ್ಲಿ ಪೊಲೀಸರಿಗೂ ಕೊರೊನಾ ಆತಂಕ ಮೂಡಿಸಿದೆ. ಈ ಮೊದಲೇ ಸೀಲ್ ​ಡೌನ್ ಮಾಡಲಾಗಿದ್ದ ಠಾಣೆಗಳಲ್ಲಿನ ಪೊಲೀಸರಿಗೆ ಕೊರೊನಾ ಕಾಣಿಸಿಕೊಂಡಿದ್ದು ತಲೆನೋವಾಗಿ ಪರಿಣಮಿಸಿದೆ.

ಬೆಂಗಳೂರು: ಪೊಲೀಸರಲ್ಲಿ ಕೊರೊನಾ ಸೋಂಕು ವ್ಯಾಪಕವಾಗಿ ಹಬ್ಬುತ್ತಿದ್ದು, ಸಿಲಿಕಾನ್ ಸಿಟಿಯಲ್ಲಿ ಒಟ್ಟು 140ಕ್ಕೂ ಅಧಿಕ ಪೊಲೀಸರಲ್ಲಿ ಕೊರೊನಾ ಸೋಂಕು ಪತ್ತೆಯಾಗಿದೆ. ಈ ಹಿನ್ನೆಲೆಯಲ್ಲಿ ಸುಮಾರು 31 ಪೊಲೀಸ್​ ಠಾಣೆಗಳನ್ನು ಸೀಲ್​ ಡೌನ್​​ ಮಾಡಲಾಗಿದೆ.

ಕೊರೊನಾ ಸೋಂಕಿತ ಪೊಲೀಸರ ಸಂಪರ್ಕದಲ್ಲಿದ್ದ ಸುಮಾರು 890 ಸಹೋದ್ಯೋಗಿಗಳನ್ನು ಕ್ವಾರಂಟೈನ್​ ಮಾಡಲಾಗಿದೆ. ನಗರ ಪೊಲೀಸ್ ಆಯುಕ್ತರ ಕಚೇರಿ, ರಾಜ್ಯ ಪೊಲೀಸ್ ಮಹಾನಿರ್ದೇಶಕರ ಕಚೇರಿ, ಎಸಿಬಿ, ‌ಟ್ರಾಫಿಕ್ ಆಯುಕ್ತರ ಕಚೇರಿ, ಕೆಎಸ್ಆರ್​ಪಿ ಸೇರಿದಂತೆ ಎಲ್ಲಾ ಪ್ರಮುಖ ಕಚೇರಿಗಳ ಸಿಬ್ಬಂದಿಯಲ್ಲಿ ಸೋಂಕು ಪತ್ತೆಯಾಗಿದೆ.

ಅಷ್ಟು ಮಾತ್ರವಲ್ಲದೆ ಸೀಲ್ ​ಡೌನ್​ ಆಗಿದ್ದ ಠಾಣೆಗಳಲ್ಲಿನ ಪೊಲೀಸರಿಗೂ ಸೋಂಕು ಹರಡಿದೆ. ತಿಲಕ್ ನಗರ, ಕಾಮಾಕ್ಷಿಪಾಳ್ಯ, ವಿಲ್ಸನ್ ಗಾರ್ಡನ್, ಸಿಟಿ ‌ಮಾರ್ಕೆಟ್​​ ಠಾಣೆಗಳನ್ನು ಈ ಮೊದಲೇ ಸೀಲ್​ ಡೌನ್​ ಮಾಡಿ ಮತ್ತೆ ತೆರೆಯಲಾಗಿತ್ತು. ಈಗ ಮತ್ತೆ ಅದೇ ಠಾಣೆಗಳ ಪೊಲೀಸರಲ್ಲಿ ಸೋಂಕು ದೃಢವಾಗುತ್ತಿದ್ದು ಆತಂಕ ಮೂಡಿಸಿದೆ.