ಬೀಟ್​ರೂಟ್​ ಬೆಳೆ ಮಿಶ್ರ ತರಕಾರಿ ಕೃಷಿಗೆ ಸಹಾಯಕ: ಐಐಎಸ್​ಸಿ, ಜಿಕೆವಿಕೆ ಸಂಶೋಧಕರ ಅಭಿಮತ

ಫ್ಯಾಕ್ಟರಿಗಳ ರಾಸಾಯನಿಕ ನೀರು, ಕಳಪೆ ಗೊಬ್ಬರ ಬಳಕೆಯಿಂದ ತರಕಾರಿ ಬೆಳೆಗಳಲ್ಲಿ ಸಾಲ್ಮೊನೆಲ್ಲಾ ನಂತಹ ವಿಷಕಾರಿ ಬ್ಯಾಕ್ಟೀರಿಯಾ ಉತ್ಪತ್ತಿಗೆ ಕಾರಣವಾಗುತ್ತಿದೆ. ಇದರಿಂದ ಮನುಷ್ಯನ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ಅದಕ್ಕಾಗಿ ಬೀಟ್​ರೂಟ್​​​ ಬೆಳೆಯನ್ನು ಮಿಶ್ರ ಬೆಳೆಯಾಗಿ ಬೆಳೆದಲ್ಲಿ ಈ ಬ್ಯಾಕ್ಟೀರಿಯಾದಿಂದ ಮುಕ್ತಿ ಪಡೆಯಬಹುದಾಗಿದೆ.

ಬೆಂಗಳೂರು: ಕೈಗಾರಿಕೆಗಳ ರಾಸಾಯನಿಕ ಯುಕ್ತ ನೀರು ಕೃಷಿ ಭೂಮಿಗೆ ಸೇರುವುದರಿಂದ ಮತ್ತು ಕಡಿಮೆ ಬೆಲೆಯ ಗೊಬ್ಬರ ಬಳಕೆಯಿಂದ ಕೃಷಿ ಭೂಮಿ ಮಲಿನವಾಗುವುದಕ್ಕೆ ಮುಖ್ಯ ಕಾರಣವಾಗಿದೆ. ಇದರಿಂದ ತರಕಾರಿ ಬೆಳೆಗಳಲ್ಲಿ ಸಾಲ್ಮೊನೆಲ್ಲಾನಂತಹ ವಿಷಕಾರಿ ಬ್ಯಾಕ್ಟೀರಿಯಾ ಉತ್ಪತ್ತಿಯಾಗಿ ಮನುಷ್ಯನ ಆರೋಗ್ಯಕ್ಕೆ ಅಪಾಯ ತಂದೊಡ್ಡುತ್ತಿದೆ ಎಂಬುದು ಸಾಬೀತಾಗಿದೆ.

ಈ ಸಮಸ್ಯೆಗೆ ಪರಿಹಾರ ಪತ್ತೆಹಚ್ಚಲು, ಐಐಎಸ್​ಸಿ ಹಾಗೂ ಜಿಕೆವಿಕೆಯ ಸಂಶೋಧಕರು ಹೊಸದೊಂದು ತಂತ್ರವನ್ನು ರೂಪಿಸಿದ್ದಾರೆ. ಸಾಲ್ಮೊನೆಲ್ಲಾ ಬ್ಯಾಕ್ಟೀರಿಯಾ ಬೆಳವಣಿಗೆ ತಡೆಗಟ್ಟಲು ಬೀಟ್​ರೂಟ್​ ಬೆಳೆದರೆ ಇತರೆ ತರಕಾರಿ ಹಾಗೂ ಬೀಟ್​ರೂಟ್​​ ಸೇವಿಸಲು ಯೋಗ್ಯವಿರುತ್ತದೆ ಎಂದು ಸಂಶೋಧಕರ ತಂಡ ತಿಳಿಸಿದೆ.

ಮಿಶ್ರ ಬೆಳೆಯಾಗಿ ಬೀಟ್​ರೂಟ್​

ಮೈಕ್ರೊಬಯಾಲಜಿ ಹಾಗೂ ಸೆಲ್​ ಬಯೋಲಜಿ (MCB) ವಿಭಾಗದ ಸಂಶೋಧಕರಾದ ದೀಪ್ಶಿಕಾ ಚಕ್ರವರ್ತಿ ಹಾಗೂ ಅವರ ತಂಡದ ಸಂಶೋಧನೆಯ ಪ್ರಕಾರ, ಬೀಟ್​ರೂಟ್​ ಗಿಡ ಸೂಕ್ಷ್ಮಜೀವಿಗಳನ್ನ ಬಿಡುಗಡೆ ಮಾಡುತ್ತದೆ. ಇದರಿಂದ ಸಾಲ್ಮೊನ್ನೆಲ್ಲಾ ಬ್ಯಾಕ್ಟೀರಿಯಾವನ್ನು ತಡೆಗಟ್ಟುತ್ತದೆ.

ಸಂಶೋಧನೆಯಲ್ಲಿ, ವಿವಿಧ ರೀತಿಯಲ್ಲಿ ಸಾಲ್ಮೊನೆಲ್ಲಾ ಸಹಿತ ಮಣ್ಣಿನಲ್ಲಿ ಬೀಟ್​ರೂಟ್​ ಜೊತೆಗೆ ತರಕಾರಿ ಬೆಳೆಯುವ ಪ್ರಯತ್ನ ಮಾಡಿದ್ದು, ಟೊಮೆಟೋ ಹಾಗೂ ಬೀಟ್​ರೂಟ್​ ಮಿಶ್ರ ಬೆಳೆಯಲ್ಲಿ ಯಶಸ್ವಿ ಫಲಿತಾಂಶ ಕಂಡುಬಂದಿದೆ ಎಂದು ಸಂಶೋಧಕರು ಹರ್ಷ ವ್ಯಕ್ತಪಡಿಸಿದ್ದಾರೆ.

ಹೆಚ್ಚಿನ ಶ್ರಮವಿಲ್ಲದೆ ಬೀಟ್​ರೂಟ್​ನಿಂದ​ ಉತ್ಪತ್ತಿಯಾದ ಸೂಕ್ಷ್ಮಜೀವಿಗಳು ಕೃಷಿ ಭೂಮಿಯಲ್ಲಿ ರೋಗನಿರೋಧಕ ಶಕ್ತಿಯಾಗಿ ಕೆಲಸ ಮಾಡಲಿದೆ ಎಂದು ಸೊಂಶೋಧಕರಲ್ಲಿ ಒಬ್ಬರಾದ ಕಾಪುದೀಪ್ ಕರಂಕರ್ ಹೇಳಿದ್ದಾರೆ.

ಕಡಿಮೆ ಖರ್ಚಿನಲ್ಲಿ ಸಾಲ್ಮೊನ್ನೆಲ್ಲ ನಂತ ವಿಷಕಾರಿ ಬ್ಯಾಕ್ಟೀರಿಯಾ ತಡೆಗಟ್ಟುವಲ್ಲಿ ಬೀಟ್​ರೂಟ್​ ಬೆಲೆ ಸಹಾಯಕ ಆಗಲಿದೆ. ಇದು ಸಣ್ಣ ಕೃಷಿಕರಿಗೆ ಹೆಚ್ಚು ಸಹಾಯಕವಾಗಲಿದೆ ಎಂದು ಸಂಶೋಧನೆಯಲ್ಲಿ ತಿಳಿದುಬಂದಿದೆ.