ಬೆಂಗಳೂರು: ಬಿಲ್ ವಿಚಾರವಾಗಿ ಗಲಾಟೆ ತೆಗೆದಿದ್ದ ಜಿಎಸ್ಟಿ ಇನ್ಸ್ಪೆಕ್ಟರ್ವೊರ್ವರನ್ನು ನಕಲಿ ಇನ್ಸ್ಪೆಕ್ಟರ್ ಎಂದು ತಪ್ಪಾಗಿ ಭಾವಿಸಿ ಮೂರು ಗಂಟೆಗಳ ಕಾಲ ಕೂಡಿ ಹಾಕಿ ಪಬ್ ಮಾಲೀಕ ಹಾಗೂ ಆತನ ಸಹಚರರು ಹಲ್ಲೆ ಮಾಡಿರುವ ಘಟನೆ ಬೆಳಕಿಗೆ ಬಂದಿದೆ.
ಜಿಎಸ್ಟಿ ವಿಭಾಗದ ಇನ್ಸ್ಪೆಕ್ಟರ್ ವಿನಯ್ ಮಂಡಲ್ ಎಂಬುವರ ಮೇಲೆ ಹಲ್ಲೆ ಮಾಡಲಾಗಿದೆ. ಎಲೆಕ್ಟ್ರಾನಿಕ್ ಸಿಟಿ ಹಾಗೂ ಅತ್ತಿಬೆಲೆ ವಿಭಾಗದ ಇನ್ಸ್ಪೆಕ್ಟರ್ ಆಗಿರುವ ವಿನಯ್, ಇದೇ ತಿಂಗಳ 5ರ ರಾತ್ರಿ ಕೋರಮಂಗಲದಲ್ಲಿರುವ ಹ್ಯಾಪಿ ಟ್ರೋ ಪಬ್ಗೆ ಹೋಗಿದ್ದಾರೆ. ಮದ್ಯ ಸೇವಿಸಿದ ಬಳಿಕ ಬಿಲ್ ವಿಚಾರವಾಗಿ ಪಬ್ ಮಾಲೀಕ ರಾಕೇಶ್ ಗೌಡನೊಂದಿಗೆ ಮಾತಿನ ಚಕಮಕಿ ನಡೆದಿದೆ. ಈ ವೇಳೆ ನಕಲಿ ಇನ್ಸ್ಪೆಕ್ಟರ್ ಆಗಿರಬಹುದು ಎಂದು ಭಾವಿಸಿದ ಮಾಲೀಕ ರಾಕೇಶ್, ಬೌನ್ಸರ್ ಕರೆಯಿಸಿ ಪಬ್ನಲ್ಲಿ ಬೆಳಗಿನ ಜಾವದ ವರೆಗೂ ಕೂಡಿ ಹಾಕಿ ಹಲ್ಲೆ ನಡೆಸಿ, ಬಳಿಕ ಬಿಟ್ಟು ಕಳುಹಿಸಿದ್ದಾರೆ.
ಈ ಕುರಿತು ವಿನಯ್ ಕೋರಮಂಗಲ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ದೂರಿನ ಅನ್ವಯ ಮಾಲೀಕ ರಾಕೇಶ್ ಗೌಡ ಹಾಗೂ ಬೌನ್ಸರ್ಗಳು ಸೇರಿದಂತೆ ಒಟ್ಟು ಆರು ಮಂದಿಯನ್ನು ಪೊಲೀಸರು ಬಂಧಿಸಿದ್ದರು. ಸದ್ಯಕ್ಕೆ ಠಾಣಾ ಜಾಮೀನಿನ ಮೇರೆಗೆ ಆರೋಪಿಗಳು ಹೊರಬಂದಿದ್ದಾರೆ.
