ಬೆಂಗಳೂರು : ರಾಜಧಾನಿಯಲ್ಲಿ ವರ್ಷದಿಂದ ವರ್ಷಕ್ಕೆ ಡ್ರಗ್ಸ್ ಜಾಲದ ಕಬಂಧಬಾಹು ವಿಸ್ತರಿಸುತ್ತಿವೆ. ಕಳೆದ ಎರಡು ವರ್ಷಗಳಿಗೆ ಹೋಲಿಸಿದ್ರೆ ನಗರದಲ್ಲಿ ದಾಖಲಾಗಿರುವ ಪ್ರಕರಣಗಳ ಸಂಖ್ಯೆ ಹಾಗೂ ಬಂಧಿತರಾದ ಡ್ರಗ್ಸ್ ಪೆಡ್ಲರ್ಗಳ ಸಂಖ್ಯೆ ದುಪ್ಪಟ್ಟಾಗಿದೆ.
ಮಾದಕದ್ರವ್ಯ ಜಾಲದಲ್ಲಿ ದಂಧೆಕೋರರು ಕಳೆದ ವರ್ಷ ಗಾಂಜಾವನ್ನು ಅತಿ ಹೆಚ್ಚು ಸರಬರಾಜು ಮಾಡುವ ಮೂಲಕ ಪಾರುಪಾತ್ಯ ಮೆರೆದಿದ್ದಾರೆ.
ಲಾಕ್ಡೌನ್ ನಡುವೆಯೂ ಈ ವರ್ಷ ಮಾದಕವಸ್ತು ನಿಯಂತ್ರಣ (ಎನ್ಡಿಪಿಎಸ್) ಕಾಯ್ದೆಯಡಿ 2,766 ಪ್ರಕರಣ ದಾಖಲಿಸಿಕೊಂಡು, 3,600 ಆರೋಪಿಗಳನ್ನು ಬಂಧಿಸಲಾಗಿದೆ.
ಡ್ರಗ್ಸ್ ಜಾಲ ಈ ಪಾಟಿ ಹೆಸರು ಮಾಡಿದ್ದು ಚಂದನವನದ ನಟಿಯರಿಂದ. ರಾಗಿಣಿ ದ್ವಿವೇದಿ, ಸಂಜನಾ ಗಲ್ರಾನಿ, ಪಾರ್ಟಿ ಆಯೋಜಿಸುತ್ತಿದ್ದ ವಿರೇನ್ ಖನ್ನಾ ಸೇರಿದಂತೆ 20ಕ್ಕೂ ಹೆಚ್ಚು ಮಂದಿ ಆರೋಪಿಗಳನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದರು. ಇದು ಚಿತ್ರರಂಗಕ್ಕೆ ದೊಡ್ಡ ಕಪ್ಪುಚುಕ್ಕೆಯಾಯಿತು.
ಕೊರೊನಾ ಅವಧಿಯಲ್ಲೇ ಅಧಿಕ ಪ್ರಕರಣ : ಕೊರೊನಾ ವೈರಸ್ ಹರಡದಂತೆ ವಿಧಿಸಲಾಗಿದ್ದ ಲಾಕ್ಡೌನ್ನಲ್ಲೇ ಅಧಿಕ ಪ್ರಕರಣ ದಾಖಲಾಗಿವೆ. ಏಳೆಂಟು ತಿಂಗಳ ಕಾಲ ಆರ್ಥಿಕ ಚಟುವಟಿಕೆ ಸ್ಥಗಿತಗೊಂಡಿತ್ತು. ಆದರೆ, ಈ ಅವಧಿಯಲ್ಲೇ ಡ್ರಗ್ಸ್ ಪೆಡ್ಲರ್ಗಳು ಸಕ್ರಿಯವಾಗಿದ್ದರು ಎಂಬ ಅಂಶ ಬೆಳಕಿಗೆ ಬಂದಿದೆ.
ಕಳೆದ ವರ್ಷ ಬಂಧನಕ್ಕೊಳಗಾದ 3,600 ಆರೋಪಿಗಳ ಪೈಕಿ 72 ವಿದೇಶಿ ಪ್ರಜೆಗಳಾಗಿದ್ದಾರೆ. ಇದು ಕಳೆದ ಮೂರು ವರ್ಷಗಳಿಗೆ ಹೋಲಿಸಿದ್ರೆ ಹೆಚ್ಚು. 2018ರಲ್ಲಿ 44 ಮಂದಿ, 2019ರಲ್ಲಿ 38 ವಿದೇಶಿ ಪ್ರಜೆಗಳನ್ನು ಜೈಲಿಗಟ್ಟಲಾಗಿತ್ತು.
ಆಶ್ಚರ್ಯಕರ ಸಂಗತಿ ಏನೆಂದರೆ 2020ರ ಜನವರಿಯಿಂದ ಜೂನ್ವರೆಗೆ 530 ಎನ್ಡಿಪಿಎಸ್ ಪ್ರಕರಣ ದಾಖಲಾದ್ರೆ, ಇನ್ನುಳಿದ ಆರು ತಿಂಗಳಲ್ಲಿ 2,236 ಕೇಸ್ ದಾಖಲಾಗಿವೆ.
ಜಾಲ ಕಡಿವಾಣ ಹಾಕುವ ನಿಟ್ಟಿನಲ್ಲಿ ವಿಶೇಷ ಕಾರ್ಯಾಚರಣೆ ಕೈಗೊಂಡಿದ್ದ ನಗರ ಪೊಲೀಸರು ಬರೋಬ್ಬರಿ ಏಳೂವರೆ ಕೋಟಿಗೂ ಅಧಿಕ ಮೌಲ್ಯದ 3,263 ಕೆಜಿ ಗಾಂಜಾ ಜಪ್ತಿ ಮಾಡಿದ್ದಾರೆ.
ಎರಡನೇ ಪಟ್ಟಿಯಲ್ಲಿ ಕೋಟ್ಯಂತರ ಮೌಲ್ಯದ ಎಂಡಿಎಂಎ ಮಾದಕ ಮಾತ್ರೆಗಳು ಹಾಗೂ ಮೂರು ಹಾಗೂ ನಾಲ್ಕನೇ ಸ್ಥಾನದಲ್ಲಿ ಕ್ರಮವಾಗಿ ಆಶಿಶ್ ಆಯಿಲ್, ಕೊಕೇನ್ ಸರಬರಾಜು ಆಗಿರುವುದು ಕಂಡು ಬಂದಿದೆ.
ಒಟ್ಟು ₹30 ಕೋಟಿಗೂ ಹೆಚ್ಚು ಮೌಲ್ಯದ ಮಾದಕ ದ್ರವ್ಯ ವಶಕ್ಕೆ ಪಡೆದುಕೊಳ್ಳಲಾಗಿದೆ. ಈ ಅಂಕಿ-ಅಂಶ ಕಳೆದ ಮೂರು ವರ್ಷಗಳಿಗೆ ಹೋಲಿಸಿದ್ರೆ, ಇದೇ ಹೆಚ್ಚು.
