ಹುಕ್ಕೇರಿ‌ ಮಠದಲ್ಲಿ ಈ ಬಾರಿ ಸರಳ ದಸರಾ ಆಚರಣೆ: ಚಂದ್ರಶೇಖರ ಸ್ವಾಮೀಜಿ

ಹುಕ್ಕೇರಿ‌ ಮಠದಲ್ಲಿ ಪ್ರತಿವರ್ಷ ದಸರಾ ಉತ್ಸವವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಿಕೊಂಡು ಬರುತ್ತಿದ್ದೆವು. ಈ ವರ್ಷ ಯಾವುದೇ ವೇದಿಕೆ ಕಾರ್ಯಕ್ರಮಗಳು ನಡೆಯುವುದಿಲ್ಲ. ಬರುವಂತಹ ಭಕ್ತರಿಗೆ ದರ್ಬಾರ್​ ಹಾಲ್‌ನಲ್ಲಿ ಆಶೀರ್ವಾದ ಮಾಡಿ ಕಳಿಸುವಂತಹ ವ್ಯವಸ್ಥೆ ಮಾಡಲಾಗಿದೆ ಎಂದು ಹಿರೇಮಠದ ಚಂದ್ರಶೇಖರ ಸ್ವಾಮೀಜಿ ಹೇಳಿದ್ದಾರೆ.

ಚಿಕ್ಕೋಡಿ: ಕಳೆದ ಎರಡ್ಮೂರು ವರ್ಷದಿಂದ ಭಯಾನಕ‌ ವಾತಾವರಣ ನೋಡುತ್ತಿದ್ದೇವೆ. 2018ರಲ್ಲಿ ಮಡಿಕೇರಿಯಲ್ಲಿ ಪ್ರವಾಹ ಬಂತು. ಕಳೆದ ವರ್ಷ ಉತ್ತರ ಕರ್ನಾಟಕ‌ ಸೇರಿ ರಾಜ್ಯದ ವಿವಿಧೆಡೆ ಪ್ರವಾಹ ಉಂಟಾಗಿತ್ತು. ಈ ಎರಡೂ ವರ್ಷ ಸರಳವಾಗಿ‌‌ ದಸರಾ ಹಬ್ಬ ಆಚರಿಸಿದರೂ ಕೂಡ ಎಲ್ಲಾ ಕಾರ್ಯಕ್ರಮಗಳು ನಡೆಯುತ್ತಿದ್ದವು. ಕೊರೊನಾ ಹೆಮ್ಮಾರಿಯಿಂದ ಹುಕ್ಕೇರಿ‌ ಮಠದಲ್ಲಿ ಈ ಬಾರಿ ಸರಳವಾಗಿ ದಸರಾ ಹಬ್ಬ ಆಚರಿಸಲಾಗುವುದು ಎಂದು ಹಿರೇಮಠದ ಚಂದ್ರಶೇಖರ ಸ್ವಾಮೀಜಿ ತಿಳಿಸಿದ್ದಾರೆ.

ಹುಕ್ಕೇರಿ‌ ಮಠದಲ್ಲಿ ಮಾಧ್ಯಮದವರಿಗೆ ಪ್ರತಿಕ್ರಿಯಿಸಿದ ಅವರು, ಹುಕ್ಕೇರಿ‌ ಮಠದಲ್ಲಿ ಪ್ರತೀ ವರ್ಷ ದಸರಾ ಉತ್ಸವವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಿಕೊಂಡು ಬರುತ್ತಿದ್ದೆವು. ಆದರೆ, ಈ ವರ್ಷ ಯಾವುದೇ ವೇದಿಕೆ ಕಾರ್ಯಕ್ರಮಗಳು ನಡೆಯುವುದಿಲ್ಲ. ಬರುವಂತಹ ಭಕ್ತರಿಗೆ ದರ್ಬಾರ್​ ಹಾಲ್‌ನಲ್ಲಿ ಆಶೀರ್ವಾದ ಮಾಡಿ ಕಳಿಸುವಂತಹ ವ್ಯವಸ್ಥೆ ಮಾಡಲಾಗಿದೆ. ದಸರಾದ ಒಂಭತ್ತು ದಿನ ಚಂಡಿಕಾಯಾಗ ಹಾಗೂ ಅಗ್ನಿಹೋತ್ರ ನಡೆಯುತ್ತದೆ‌. ಎಲ್ಲರಿಗೂ ಒಳ್ಳೆಯದಾಗಲಿ‌ ಎನ್ನುವ ಉದ್ದೇಶದಿಂದ ಸೂರ್ಯೋದಯ ಹಾಗೂ ಸೂರ್ಯಾಸ್ಥ ವೇಳೆಗೆ ಗುರಿವಿನ ಮಂತ್ರ, ದೇವಿ ಮಂತ್ರ, ಮೃತುಂಜಯ ಮಂತ್ರ ಪಟಿಸುವ ಕಾರ್ಯಕ್ರಮವನ್ನು ಮಾಡಲಾಗುತ್ತದೆ ಎಂದರು.