IRCTC ಇ-ವ್ಯಾಲೆಟ್ ಬಳಕೆ ಗೊತ್ತೇ?: ಫೀಚರ್​, ಹಣ ಜಮೆ- ಸಂಪೂರ್ಣ ಮಾಹಿತಿ

ನಾವು ರೈಲು ಟಿಕೆಟ್​ ಬುಕ್​ ಮಾಡುವಾಗ ಐಆರ್​ಸಿಟಿಸಿ ಇ-ವ್ಯಾಲೆಟ್​ ಮಹತ್ವದ ಪಾತ್ರವಹಿಸುತ್ತದೆ. ಇದರ ಫೀಚರ್​ಗಳು, ಉಪಯೋಗ, ನೋಂದಣಿ ಬಗೆ​ ಮತ್ತು ಹಣ ಜಮೆ ಹೇಗೆ ಎಂಬುದನ್ನು ತಿಳಿಯೋಣ.

ನವದೆಹಲಿ: ರೈಲು ಟಿಕೆಟ್​ ಬುಕ್ ಮಾಡುವುದೊಂದು ಪ್ರಯಾಸದ ಕೆಲಸ. ತಿಂಗಳ ಮುಂಚೆಯೇ ಟಿಕೆಟ್ ಕಾಯ್ದಿರಿಸಬೇಕು. ಪೂರ್ವಯೋಜಿತ ಯೋಜನೆ ಇದ್ದವರಿಗೆ ಇದು ದೊಡ್ಡ ಸಮಸ್ಯೆ ಆಗಲಾರದು. ನಿಜವಾದ ಸಮಸ್ಯೆ ಎಂದರೆ ತಕ್ಷಣ ಅಥವಾ ಕೆಲವು ಗಂಟೆಗಳ ಮುಂಚಿತವಾಗಿ ಟಿಕೆಟ್ ಬುಕ್​ ಮಾಡುವುದು. ಅದೇ ಸಮಯದಲ್ಲಿ ಬ್ಯಾಂಕ್ ಸರ್ವರ್ ಡೌನ್​ ಆದ್ರೆ ಕಥೆ ಮುಗೀತು. ಟಿಕೆಟ್ ಲಭ್ಯವಿದ್ದರೂ ಬುಕ್ಕಿಂಗ್ ಸಾಧ್ಯವಾಗುವುದಿಲ್ಲ.

ಕೆಲವೊಮ್ಮೆ ನಾವು ಬುಕ್​ ಮಾಡಿದ ಟಿಕೆಟ್ ರದ್ದುಗೊಳಿಸಬೇಕಾದ ಸ್ಥಿತಿಯೂ ಬರುತ್ತದೆ. ನಾವು ಟಿಕೆಟ್​ ರದ್ದುಗೊಳಿಸಿದ್ರೂ ಕೆಲವು ದಿನಗಳ ನಂತರವೇ ಹಣ ನಮ್ಮ ಖಾತೆಗೆ ವಾಪಸ್ ಆಗುತ್ತದೆ. ಇಂತಹ ಸಮಸ್ಯೆಗಳಿಗೆ IRCTC ಇ-ವ್ಯಾಲೆಟ್ ಒಂದೊಳ್ಳೆ ಪರಿಹಾರ ಮಾರ್ಗ. ಇ-ವ್ಯಾಲೆಟ್​ ಮೂಲಕ ಟಿಕೆಟ್ ಬುಕ್​ ಮಾಡಬಹುದಾಗಿದ್ದು, ಗ್ರಾಹಕರಿಗೆ ಬಹಳ ಉಪಯೋಗಕಾರಿ. ಅನೇಕ ವೈಶಿಷ್ಟ್ಯಗಳನ್ನು ಇದು ಹೊಂದಿದೆ. ಭಾರತೀಯ ರೈಲ್ವೇ ಕ್ಯಾಟರಿಂಗ್ ಟೂರಿಸಂ ಕಾರ್ಪೊರೇಷನ್ (IRCTC) ಪ್ರಯಾಣಿಕರು ಟಿಕೆಟ್‌ಗಳನ್ನು ಬುಕ್ ಮಾಡಲು ಅನುವಾಗುವಂತೆ ಈ ಸೇವೆ ಒದಗಿಸಿದೆ.

ಟಿಕೆಟ್ ಬುಕ್ಕಿಂಗ್ ಸಮಯದಲ್ಲಿ ಹೆಚ್ಚಿನ ಜನರು ಬ್ಯಾಂಕ್ ಸರ್ವರ್ ಡೌನ್ ಸಮಸ್ಯೆ ಎದುರಿಸುತ್ತಾರೆ. ಹೀಗಾದಲ್ಲಿ ಟಿಕೆಟ್ ಬುಕ್ಕಿಂಗ್ ಬಹುತೇಕ ಅಸಾಧ್ಯವೆಂದೇ ಹೇಳಬೇಕು. ಇ-ವ್ಯಾಲೆಟ್ ಇವುಗಳಿಗೆ ಫುಲ್​ಸ್ಟಾಪ್​ ಇಡುತ್ತದೆ. ಇ-ವ್ಯಾಲೆಟ್ ವಿಶೇಷವಾಗಿ ತತ್ಕಾಲ್ ಬುಕ್ಕಿಂಗ್ ಸಮಯದಲ್ಲಿ ಸೆಕೆಂಡುಗಳಲ್ಲಿ ಟಿಕೆಟ್ ಬುಕ್ ಮಾಡಲು ಉಪಯುಕ್ತ. ಸಾಮಾನ್ಯವಾಗಿ ರೈಲು ಟಿಕೆಟ್ ರದ್ದುಗೊಳಿಸಿ ಕೆಲವು ದಿನಗಳ ನಂತರ ಹಣ ಖಾತೆಗೆ ಜಮಾ ಆಗುತ್ತದೆ. ಇದರರ್ಥ ನಮ್ಮ ಹಣವನ್ನು IRCTC ಯಲ್ಲಿ ಕೆಲವು ದಿನಗಳವರೆಗೆ ಲಾಕ್ ಮಾಡಲಾಗುತ್ತದೆ. ಆ ಬಳಿಕ ನಾವು ಇನ್ನೊಂದು ಟಿಕೆಟ್ ಕೊಳ್ಳಬೇಕಾದರೆ ಮತ್ತೆ ನಮ್ಮ ಹಣವನ್ನೇ ಬಳಸಬೇಕು. ಆದರೆ, ಇ-ವ್ಯಾಲೆಟ್‌ನಿಂದ ಬುಕ್ ಮಾಡಿದ ಟಿಕೆಟ್‌ಗಳನ್ನು ನೀವು ರದ್ದುಗೊಳಿಸಿದರೆ ಹಣವನ್ನು ತಕ್ಷಣವೇ ವ್ಯಾಲೆಟ್‌ಗೆ ಜಮಾ ಮಾಡಲಾಗುತ್ತದೆ. ಆಗ ನೀವು ಇನ್ನೊಂದು ಟಿಕೆಟ್​ ಬುಕ್​ ಮಾಡಲು ಇ-ವ್ಯಾಲೆಟ್​ ಹಣವನ್ನು ಸುಲಭವಾಗಿ ಪಡೆಯಬಹುದಾಗಿದೆ.

ಇ-ವ್ಯಾಲೆಟ್ ಮೂರು ವರ್ಷಗಳ ಮಾನ್ಯತೆ ಹೊಂದಿದೆ. ಇದಾದ ನಂತರ ಖಾತೆಯನ್ನು ನವೀಕರಿಸಬಹುದು. ಅದಕ್ಕಾಗಿ ಯಾವುದೇ ಹಣ ಪಾವತಿಸುವ ಅಗತ್ಯವಿಲ್ಲ. ಇ-ವ್ಯಾಲೆಟ್ ತೆರೆಯಲು ಬಳಕೆದಾರನ ಹೆಸರು ಮತ್ತು ಪಾಸ್‌ವರ್ಡ್‌ನೊಂದಿಗೆ IRCTC ವೆಬ್‌ಸೈಟ್‌ಗೆ ಲಾಗಿನ್ ಆಗಬೇಕು. eWallet ಮೆನುವಿನಲ್ಲಿ Now register ಎಂಬ ಬಟನ್​ ಕ್ಲಿಕ್ ಮಾಡಿ. ನಿಮ್ಮ ಆಧಾರ್ ಮತ್ತು ಪ್ಯಾನ್ ಕಾರ್ಡ್ ಸಂಖ್ಯೆ ನಮೂದಿಸಿ. ಇ-ವ್ಯಾಲೆಟ್ ನೋಂದಣಿಗೆ ರೂ.50 ಪಾವತಿಸಿ. ಆಗ ನಿಮ್ಮ ನೋಂದಣಿ ಯಶಸ್ವಿಯಾಗಿದೆ ಎಂಬ ಸಂದೇಶವನ್ನು ನೀವು ಪರದೆಯ ಮೇಲೆ ನೋಡುವಿರಿ.

ಇ-ವ್ಯಾಲೆಟ್‌ಗೆ ನಿಮಗೆ ಬೇಕಾದಷ್ಟು ಮೊತ್ತವನ್ನೂ ಸೇರಿಸಬಹುದು. ಇದಕ್ಕಾಗಿ 'IRCTC eWallet' ಮೆನುವಿನಲ್ಲಿ 'IRCTC eWallet Deposit' ಮೇಲೆ ಕ್ಲಿಕ್ಕಿಸಿ. ಕನಿಷ್ಠ ರೂ.100 ಮತ್ತು ಗರಿಷ್ಠ ರೂ.10,000 ಠೇವಣಿ ಇಡಬಹುದು. ಈ ಮೊತ್ತವನ್ನು ರೈಲ್ವೆಯಲ್ಲಿ ಟಿಕೆಟ್ ಖರೀದಿಯ ಸಮಯದಲ್ಲಿ ಬಳಸಬಹುದು. ಇ-ವ್ಯಾಲೆಟ್ ಪಾಸ್‌ವರ್ಡ್ ಹೊಂದಿದೆ. ಬುಕ್ಕಿಂಗ್ ಪಾವತಿಯ ಸಮಯದಲ್ಲಿ ಇದನ್ನು ನಮೂದಿಸಬೇಕು.

ಇದನ್ನೂ ಓದಿ: ಟ್ರಾವೆಲ್ ನೌ ಪೇ ಲೇಟರ್ ಸ್ಕೀಮ್​ ಜಾರಿಗೆ ತಂದ ಇಂಡಿಯನ್​ ರೈಲ್ವೆ: ಇದರ ವಿಶೇಷತೆ ಏನ್​ ಗೊತ್ತಾ?