ಹೈದರಾಬಾದ್: ನೀವು ಅನಿರೀಕ್ಷಿತವಾಗಿ ಆಸ್ಪತ್ರೆಗೆ ದಾಖಲಾದಾಗ ಆರೋಗ್ಯ ವಿಮೆಯು ಆರ್ಥಿಕ ಹೊರೆಯಿಂದ ನಿಮ್ಮನ್ನು ರಕ್ಷಿಸುತ್ತದೆ. ಆದರೆ ಬದಲಾಗುತ್ತಿರುವ ಕಾಲಕ್ಕೆ ಅನುಗುಣವಾಗಿ ಪ್ರಸ್ತುತ ಪರಿಸ್ಥಿತಿಯಲ್ಲಿ ಎಷ್ಟು ಮೊತ್ತ ಪಾವತಿಸಬೇಕು ಎಂಬುದನ್ನು ಪರಿಶೀಲಿಸದೇ ನಾವು ವರ್ಷಗಟ್ಟಲೆ ಒಟ್ಟಿಗೆ ಪ್ರೀಮಿಯಂ ಪಾವತಿಸುತ್ತಿರುತ್ತೇವೆ. ಹೀಗಾಗಿ ನಮ್ಮ ವಿಮಾ ಪಾಲಿಸಿಯಲ್ಲಿ ಆಗಾಗ ಮಾರ್ಪಾಡು ಮಾಡುವುದು ಮತ್ತು ಹೊಸ ಸೇರ್ಪಡೆಗಳನ್ನು ಮಾಡುವುದು ಕಡ್ಡಾಯವಾಗಿರುತ್ತವೆ.
ವಿಮಾ ಪಾಲಿಸಿ ಎಂದರೆ ಇದೊಂದು ಸುರಕ್ಷತಾ ಕವಚವಿದ್ದಂತೆ. ಆದರೆ, ವಿಮಾ ಪಾಲಿಸಿಯ ಅವಶ್ಯಕತೆ ತಮಗೇನಿದೆ ಮತ್ತು ತಾವು ಕಟ್ಟುತ್ತಿರುವ ಪ್ರೀಮಿಯಂ ವ್ಯರ್ಥವಾಗುತ್ತದೆ ಎಂದು ಹಲವರು ಭಾವಿಸುತ್ತಾರೆ. ಆದರೆ ಭವಿಷ್ಯದಲ್ಲಿ ನಮಗೆ ಏನು ಕಾದಿದೆ ಎಂಬುದು ಯಾರಿಗೂ ತಿಳಿದಿಲ್ಲ. ದುರದೃಷ್ಟವಶಾತ್, ನಾವು ಕ್ಲೇಮ್ ಮಾಡಬೇಕಾದಾಗ, ಎರಡು ಅಥವಾ ಮೂರು ವರ್ಷಗಳ ನಂತರ ಪಾಲಿಸಿಯು ನಮಗೆ ಸಂಪೂರ್ಣ ವಿಮೆಯನ್ನು ನೀಡುತ್ತದೆಯೇ ಅಥವಾ ಇಲ್ಲವೇ ಎಂಬುದನ್ನು ನಾವು ಪರಿಶೀಲಿಸಬೇಕಾಗುತ್ತದೆ.
ಒಂದು ಕಾಲದಲ್ಲಿ ನಾಲ್ವರ ಕುಟುಂಬಕ್ಕೆ 3 ಲಕ್ಷ ರೂಪಾಯಿ ಪಾಲಿಸಿ ಸಾಕಾಗುತ್ತಿತ್ತು. ಈಗ, ಕನಿಷ್ಠ 10 ಲಕ್ಷ ರೂ. ಗಳಿಗಿಂತ ಕಡಿಮೆ ಇದ್ದರೆ ಅದು ಯಾವುದಕ್ಕೂ ಸಾಕಾಗದು ಎನ್ನುತ್ತಾರೆ ತಜ್ಞರು. ಹಾಗಾದರೆ ಸೂಕ್ತ ವಿಮಾ ಮೊತ್ತವನ್ನು ನಿರ್ಧರಿಸುವುದು ಹೇಗೆಂದು ತಿಳಿಯೋಣ ಬನ್ನಿ.
ಪರ್ಸನಲ್ ಪಾಲಿಸಿ ಫ್ಲೋಟರ್ ಪಾಲಿಸಿ: ಒಂದೊಮ್ಮೆ ಕುಟುಂಬ ಬೆಳೆದರೆ.. ಒಬ್ಬ ವ್ಯಕ್ತಿಗೆ ಕನಿಷ್ಠ 5 ಲಕ್ಷ ಪಾಲಿಸಿ ಸಾಕು ಎಂದುಕೊಳ್ಳೋಣ. ಆದರೆ, ಸಂಗಾತಿ ಬಂದರೆ ಮಕ್ಕಳು ಬೆಳೆದು ಸಂಸಾರ ಬೆಳೆಯುತ್ತದೆ... ಆಗ ಪರ್ಸನಲ್ ಪಾಲಿಸಿ ಫ್ಲೋಟರ್ ಪಾಲಿಸಿ ಆಗಬೇಕಾಗುತ್ತದೆ. ಕುಟುಂಬದಲ್ಲಿ ಹೊಸ ಸದಸ್ಯರು ಬಂದಾಗ, ವಿಮಾ ಮೊತ್ತವನ್ನು ಹೆಚ್ಚಿಸಬೇಕು.
ಮಗುವಿನ ಜನನದ ತೊಂಬತ್ತು ದಿನಗಳ ನಂತರ, ಆರೋಗ್ಯ ವಿಮಾ ಪಾಲಿಸಿಯಲ್ಲಿ ಸೇರಿಸಲು ಒಂದು ಆಯ್ಕೆ ಇದೆ. ಜನನದ ನಂತರ ತಕ್ಷಣವೇ ಒದಗಿಸಲಾದ ರಕ್ಷಣೆಗಳಿವೆ. ಪಾಲಿಸಿಯಲ್ಲಿ ಮಕ್ಕಳನ್ನು ಸೇರಿಸಿಕೊಳ್ಳಲು ನಿಮ್ಮ ವಿಮಾ ಕಂಪನಿಯು ಅನುಸರಿಸುವ ನಿಯಮಗಳನ್ನು ತಿಳಿದುಕೊಳ್ಳಿ. ಅಗತ್ಯವಿದ್ದರೆ ತಜ್ಞರ ಸಲಹೆ ಪಡೆಯಿರಿ. ಹೊಸ ಸದಸ್ಯರು ಸೇರಿದಾಗ ವಿಮಾ ಮೊತ್ತ ಹೆಚ್ಚಾಗುತ್ತದೆ ಮತ್ತು ಅದೇ ಸಮಯಕ್ಕೆ ಪ್ರೀಮಿಯಂ ಹೆಚ್ಚಾಗುವುದು ಸಹಜ. ಇದಕ್ಕಾಗಿ ಸಿದ್ಧರಾಗಿರಿ.
ನಾಲ್ಕು ಜನರ ಕುಟುಂಬಕ್ಕೆ ಕನಿಷ್ಠ 10 ಲಕ್ಷ ರೂ ಪಾಲಿಸಿ: ಐದು ವರ್ಷಗಳ ಹಿಂದೆ 3 ಲಕ್ಷ ರೂಪಾಯಿ ಪಾಲಿಸಿ ಸಾಕಾಗಿತ್ತು. ಆರೋಗ್ಯ ಸ್ಥಿತಿ ಗಂಭೀರವಾಗಿಲ್ಲದಾಗ ಮತ್ತು ಆಸ್ಪತ್ರೆಗೆ ಸೇರುವ ಅಗತ್ಯ ಇಲ್ಲದಿರುವಾಗ ಅಷ್ಟೊಂದು ಖರ್ಚು ಬರುವುದಿಲ್ಲ. ಆದರೆ ಈಗಿನ ಕಾಲದಲ್ಲಿ ಆಸ್ಪತ್ರೆಗೆ ಹೋದರೆ ಎಷ್ಟು ಖರ್ಚಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ವೈದ್ಯಕೀಯ ಹಣದುಬ್ಬರವು ಪ್ರತಿಬಾರಿಯೂ ದುಪಟ್ಟಿನಂತೆ ಹೆಚ್ಚುತ್ತಿದೆ.
ಅನೇಕ ಚಿಕಿತ್ಸೆಗಳ ಪ್ರಸ್ತುತ ವೆಚ್ಚವನ್ನು ಪರಿಗಣಿಸಿದರೆ ನಾಲ್ಕು ಜನರ ಕುಟುಂಬವು ಕನಿಷ್ಠ 10 ಲಕ್ಷ ರೂಪಾಯಿಗಳ ಪಾಲಿಸಿಯನ್ನು ಹೊಂದಿರಬೇಕು. ವಿಮಾ ಕಂಪನಿಯು ಪಾಲಿಸಿಯ ನವೀಕರಣ ಸಮಯದಲ್ಲಿ ಮಾತ್ರ ವಿಮಾ ಮೊತ್ತವನ್ನು ಹೆಚ್ಚಿಸುವ ಆಯ್ಕೆಯನ್ನು ನೀಡುತ್ತದೆ.
ಕನಿಷ್ಠ ಸೂಪರ್ ಟಾಪ್-ಅಪ್ ಪಾಲಿಸಿ ಉತ್ತಮ: ಉದ್ಯೋಗ ನೀಡಿರುವ ಕಂಪನಿಗಳು ನೀಡುವ ವೈಯಕ್ತಿಕ ಪಾಲಿಸಿಗಳು ಅಥವಾ ಗುಂಪು ವಿಮಾ ಪಾಲಿಸಿಗಳಿಗೂ ಇದೇ ನಿಯಮ ಅನ್ವಯಿಸುತ್ತದೆ. ಬೇಸಿಕ್ ಪಾಲಿಸಿ ಮೊತ್ತವನ್ನು ಹೆಚ್ಚಿಸಲು ನೀವು ಬಯಸದಿದ್ದರೆ, ಕನಿಷ್ಠ ಸೂಪರ್ ಟಾಪ್-ಅಪ್ ಪಾಲಿಸಿಯನ್ನು ತೆಗೆದುಕೊಳ್ಳುವುದು ಉತ್ತಮ. ಇದರಲ್ಲಿ ಪ್ರೀಮಿಯಂ ಸ್ವಲ್ಪ ಕಡಿಮೆ ಇರುತ್ತದೆ. ಪಾಲಿಸಿಯು ಅಗತ್ಯಕ್ಕಿಂತ ಕಡಿಮೆಯಿದ್ದರೆ ಆಸ್ಪತ್ರೆಗೆ ದಾಖಲಾಗುವುದರಿಂದ ಹಿಡಿದು ಚಿಕಿತ್ಸೆಯವರೆಗೆ ಎಲ್ಲ ವಿಷಯಗಳಲ್ಲೂ ರಾಜಿ ಮಾಡಿಕೊಳ್ಳಬೇಕಾಗುತ್ತದೆ ಎಂಬುದನ್ನು ಮರೆಯಬೇಡಿ.
ನಿಯಮಗಳು ಬದಲಾದರೆ: ವಿಮಾ ಕ್ಷೇತ್ರದಲ್ಲಿ ಕಾಲಕಾಲಕ್ಕೆ ಹೊಸ ಬದಲಾವಣೆಗಳು ಬರುತ್ತಲೇ ಇರುತ್ತವೆ. ಕಂಪನಿಗಳ ವಿಲೀನಗಳು ಮತ್ತು IRDA ನಿಯಮಾವಳಿಗಳಲ್ಲಿನ ಬದಲಾವಣೆಗಳು ಪಾಲಿಸಿಗಳ ಮೇಲೆ ಪರಿಣಾಮ ಬೀರಬಹುದು. ಅಂತಹ ಸಂದರ್ಭಗಳಲ್ಲಿ, ನಾವು ಪಾಲಿಸಿ ಮೊತ್ತ ಮತ್ತು ಪ್ರೀಮಿಯಂ ಅನ್ನು ಹೆಚ್ಚಿಸಬೇಕಾಗುತ್ತದೆ. ಪಾಲಿಸಿಯ ನಿಯಮಗಳು ನಿಮಗೆ ಅನುಕೂಲಕರವಾಗಿದ್ದರೆ ಅದನ್ನು ಮುಂದುವರೆಸಿ. ಇಲ್ಲವಾದರೆ ಪಾಲಿಸಿಯನ್ನು ಬೇರೆ ವಿಮಾ ಕಂಪನಿಗೆ ಪೋರ್ಟ್ ಮಾಡಿಕೊಳ್ಳಿ. ಪಾಲಿಸಿ ನವೀಕರಣಕ್ಕೂ ಕನಿಷ್ಠ 45 ದಿನಗಳ ಮೊದಲು ಇದಕ್ಕಾಗಿ ಅರ್ಜಿ ಸಲ್ಲಿಸಬೇಕಾಗುತ್ತದೆ.
ಕಂಪನಿಯನ್ನು ಸಂಪರ್ಕಿಸಿ.. ನೀವು ಇತರ ಕಂಪನಿಗಳ ಪಾಲಿಸಿಗಳಲ್ಲಿನ ಅಂಶಗಳನ್ನು ಪರಿಶೀಲಿಸಬೇಕು. ಪಾಲಿಸಿಯ ಬಗ್ಗೆ ಯಾವುದೇ ಸಂದೇಹಗಳಿದ್ದಲ್ಲಿ ವಿಮಾ ಕಂಪನಿಯನ್ನು ಸಂಪರ್ಕಿಸಿ ಸಮಸ್ಯೆ ನಿವಾರಿಸಿಕೊಳ್ಳಬೇಕು. ಹೆಚ್ಚುವರಿಯಾಗಿ, ಯಾವುದೇ ಹೊಸ ರೋಗಗಳು ಮತ್ತು ಚಿಕಿತ್ಸಾ ವಿಧಾನಗಳು ಕವರ್ ಆಗುತ್ತಿವೆಯಾ ನೋಡಿ. ಯಾವೆಲ್ಲದಕ್ಕೆ ಪಾಲಿಸಿ ಅನ್ವಯವಾಗುವುದಿಲ್ಲ ಎಂಬುದನ್ನು ಮತ್ತು ನೆಟ್‌ವರ್ಕ್ ಆಸ್ಪತ್ರೆಗಳ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ಪಡೆಯಿರಿ. ಪಾಲಿಸಿ ನವೀಕರಣದ ಸಮಯದಲ್ಲಿ ಅದು ನೀಡುವ ಪ್ರಯೋಜನಗಳನ್ನು ತಿಳಿಯಲು ಪ್ರಯತ್ನಿಸಿ.
ಇದನ್ನು ಓದಿ:ಟೊಮೇಟೊ ಜ್ವರ.. ಕೇಂದ್ರದಿಂದ ಮಾರ್ಗಸೂಚಿ ಬಿಡುಗಡೆ.. ಯಾವೆಲ್ಲ ಮುನ್ನೆಚ್ಚರಿಕೆ
