ಇಂದಿನ ಇಂಟರ್ನೆಟ್ ಯುಗದಲ್ಲಿ ಎಲ್ಲವೂ ಕೈಬೆರಳ ತುದಿಯಲ್ಲೇ ಇದೆ. ಹಾಗೆಯೇ ನಗದು ರಹಿತ ಡಿಜಿಟಲ್ ಪಾವತಿಯೂ ಸುಲಭ ಜೊತೆಗೆ ಸಾಮಾನ್ಯ ಸಂಗತಿಯಾಗಿದೆ. ಸಾವಿರಾರು ರುಪಾಯಿ ಅಥವಾ ನೀವು ಒಂದು ರೂಪಾಯಿ ಪಾವತಿ ಮಾಡಲು ಬಯಸಿದರೂ, ಮೊಬೈಲ್ ಫೋನ್ನಲ್ಲೇ ಕೆಲವು ಪಾವತಿ ಅಪ್ಲಿಕೇಶನ್ಗಳ ಮೂಲಕ ಕ್ಷಣ ಮಾತ್ರದಲ್ಲಿ ಪಾವತಿ ಮಾಡಬಹುದು. ಆದರೆ, ಈ ಪ್ರಕ್ರಿಯೆಯಲ್ಲಿ ನೀವು ಸ್ವಲ್ಪ ಎಚ್ಚರ ತಪ್ಪಿದರೂ ನಿಮ್ಮ ಶ್ರಮ ಹಾಳಾಗುತ್ತದೆ. ಹಾಗಾದರೆ, ಡಿಜಿಟಲ್ ಪಾವತಿ ಹೇಗೆ, ಆ ವೇಳೆ ಯಾವ ಮುನ್ನೆಚ್ಚರಿಕೆ ವಹಿಸಿಕೊಳ್ಳಬೇಕು ಎಂಬುದಕ್ಕೆ ಇಲ್ಲಿದೆ ಮಾಹಿತಿ..
ಡಿಜಿಟಲ್ ಪಾವತಿಯ ಅನುಕೂಲ: ಈ ಡಿಜಿಟಲ್ ಪಾವತಿಯಿಂದ ಹಲವು ಅನುಕೂಲಗಳಿವೆ. ಇಲ್ಲಿ ಕರೆನ್ಸಿ ನೋಟುಗಳಿಗೆ ಕೆಲಸವಿಲ್ಲ. ಇದರಿಂದಾಗಿಯೇ ಅನೇಕರು ಈ ವಿಧಾನವನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಕ್ಯಾಶ್ ಕೊಂಡೊಯ್ಯುವ ಸಮಸ್ಯೆ ಇರುವುದಿಲ್ಲ ಎಂಬ ಕಾರಣದಿಂದಾಗಿ ಇದನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ ಇಲ್ಲೂ ಕಳ್ಳತನವಾಗುವ ಸಾಧ್ಯತೆಗಳು ಇವೆ. ಸಾಮಾಜಿಕ ಜಾಲತಾಣಗಳಲ್ಲಿ ಸಂದೇಶ ಕಳುಹಿಸಿ ಹಣ ಕೀಳುವ ಪ್ರಯತ್ನ ಮಾಡುತ್ತಾರೆ. ಈ ಡಿಜಿಟಲ್ ವಂಚನೆಯ ಪ್ರಮಾಣದ ಅಂಕಿ - ಅಂಶ ಹಿಂದಿನದಕ್ಕೆ ಹೋಲಿಸಿದರೆ ಈಗ ಸುಮಾರು 28 ಪ್ರತಿಶತಕ್ಕೆ ಏರಿಕೆಯಾಗಿದೆ ಎನ್ನುತ್ತವೆ ಮೂಲಗಳು.
ಪ್ರತಿಷ್ಠಿತ ಅಪ್ಲಿಕೇಶನ್ ಬಳಸಿ: ವೇಗವಾಗಿ ಓಡುತ್ತಿರುವ ಈ ಜಗತ್ತಿನಲ್ಲಿ ಡಿಜಿಟಲ್ ಪಾವತಿ ಅನಿವಾರ್ಯವಾಗಿದೆ. ಅನಿವಾರ್ಯ ಎಂದು ಬಳಸುವುದು ಎಷ್ಟು ಮುಖ್ಯವೋ ಅಂತೆಯೇ ಬಳಕೆಯಲ್ಲಿ ಜಾಗರೂಕರಾಗಿರುವುದು ಕೂಡ ಮುಖ್ಯವಾಗುತ್ತದೆ. ಸದ್ಯ ಸಾಕಷ್ಟು ಡಿಜಿಟಲ್ ಪಾವತಿ ಅಪ್ಲಿಕೇಶನ್ ಗಳಿವೆ. ಆದರೆ, ಸಾಧ್ಯವಾದಷ್ಟು ಪ್ರತಿಷ್ಠಿತ ಅಪ್ಲಿಕೇಶನ್ಗಳನ್ನೇ ಬಳಸಿ. ಯಾಕೆಂದರೆ ಇಂತಹ ಆ್ಯಪ್ಗಳನ್ನು ನಾವು ಬಳಸಬೇಕಾದರೆ ನಾವು ನಮ್ಮ ಬ್ಯಾಂಕ್ ಖಾತೆ ಹಾಗೂ ಕಾರ್ಡ್ ವಿವರಗಳನ್ನು ನೀಡಬೇಕಾಗುತ್ತದೆ.
ಆದ್ದರಿಂದ ಒಂದು ಅಪ್ಲಿಕೇಶನ್ ವಿಶ್ವಾಸಾರ್ಹವೇ ಎಂದು ಒಂದಲ್ಲ ಎರಡು- ಮೂರು ಬಾರಿ ಯೋಚನೆ ಮಾಡಿ, ನಂತರವೇ ಅಪ್ಲಿಕೇಶನ್ ಬಳಸಲು ಪ್ರಾರಂಭಿಸಿ. ನಮ್ಮ ಹಣಕಾಸಿನ ಮಾಹಿತಿಯನ್ನು ಸುರಕ್ಷಿತವಾಗಿರಿಸುವ ಅಪ್ಲಿಕೇಶನ್‌ಗಳನ್ನು ನಾವು ಬಳಸಬೇಕು. ಉತ್ತಮ ಅಪ್ಲಿಕೇಶನ್ ಬಳಸುವುದರಿಂದ ಮೋಸದ ವಹಿವಾಟು ಕಡಿಮೆ ಮಾಡಬಹುದು. ನೀವು ಬಳಸುತ್ತಿರುವ ಅಪ್ಲಿಕೇಶನ್ ನಿಮ್ಮ ಮಾಹಿತಿಯನ್ನು ಎಷ್ಟರ ಮಟ್ಟಿಗೆ ಬಳಸುತ್ತದೆ ಎಂಬುದನ್ನು ತಿಳಿಯಲು, ನಿಯಮಗಳು ಮತ್ತು ಷರತ್ತುಗಳನ್ನು ಎಚ್ಚರಿಕೆಯಿಂದ ಓದಿ.
ಉಚಿತವೆಂದು ಬಳಸಿದರೆ ಸಮಸ್ಯೆ ಖಚಿತ: ಈಗ ಅನೇಕ ಸ್ಥಳಗಳಲ್ಲಿ ಉಚಿತ ವೈ-ಫೈ ಸೌಲಭ್ಯ ಲಭ್ಯವಿದೆ. ನೀವು ಅದನ್ನು ಇತರ ಉದ್ದೇಶಗಳಿಗಾಗಿ ಬಳಸಲು ಪ್ರಯತ್ನಿಸಬಹುದು. ಆದರೆ, ಹಣಕಾಸಿನ ವಹಿವಾಟುಗಳಿಗಾಗಿ ಬ್ಯಾಂಕಿಂಗ್ ಅಥವಾ UPI ಅಪ್ಲಿಕೇಶನ್‌ಗಳನ್ನು ಬಳಸುವಾಗ ಯಾವುದೇ ಸಂದರ್ಭಗಳಲ್ಲಿ ಈ ಸೌಲಭ್ಯವನ್ನು ಬಳಸಬೇಡಿ. ಅನೇಕ ಸೈಬರ್ ಅಪರಾಧಿಗಳು ಮೊಬೈಲ್ ಫೋನ್‌ಗಳನ್ನು ಹ್ಯಾಕ್ ಮಾಡಲು ಉಚಿತ ವೈ-ಫೈ ನೆಟ್‌ವರ್ಕ್‌ಗಳನ್ನು ಬಳಸುತ್ತಾರೆ ಎಂದು ಟೆಕ್ ತಜ್ಞರು ಎಚ್ಚರಿಸಿದ್ದಾರೆ. ನಿಮ್ಮ ಮೊಬೈಲ್ ಫೋನ್‌ನಲ್ಲಿ ಪಾವತಿ ಅಪ್ಲಿಕೇಶನ್‌ಗಳನ್ನು ಬಳಸಲು ಎರಡು-ಹಂತದ ಭದ್ರತಾ ವ್ಯವಸ್ಥೆಯನ್ನು ಹೊಂದಿಸಿ. ಅಪ್ಲಿಕೇಶನ್ ಅನ್ನು ಪ್ರಾರಂಭಿಸಲು ಮತ್ತು ವಹಿವಾಟುಗಳನ್ನು ನಿರ್ವಹಿಸಲು ವಿಭಿನ್ನ ಪಾಸ್‌ವರ್ಡ್‌ಗಳನ್ನು ಬಳಸಬೇಕು.
ಕಠಿಣವಾದ ಪಾಸ್ವರ್ಡ್ ಬಳಸಿ: ಪಾಸ್ವರ್ಡ್ಗಳ ಜೊತೆಗೆ ಬಯೋಮೆಟ್ರಿಕ್ ಕೂಡ ಬಳಸಿ. ಅನೇಕ ಜನರು ಡಿಜಿಟಲ್ ವಹಿವಾಟಿಗೆ ಸರಳವಾದ ಪಾಸ್‌ವರ್ಡ್‌ಗಳನ್ನು ಆಯ್ಕೆ ಮಾಡುತ್ತಾರೆ. ಇದು ಯಾವುದೇ ಸಂದರ್ಭದಲ್ಲೂ ಸರಿಯಲ್ಲ. ಕಠಿಣವಾದ ಪಾಸ್ವರ್ಡ್ ಬಳಸಿ. ಡಿಜಿಟಲ್ ಪಾವತಿ ಅಪ್ಲಿಕೇಶನ್‌ಗಳೊಂದಿಗೆ ಪಾವತಿಗಳನ್ನು ಮಾಡುವಾಗ, ನಾಲ್ಕು ಅಥವಾ ಆರು-ಅಂಕಿಯ ಪಿನ್ ಅಗತ್ಯವಿದೆ. ಯಾವುದೇ ಸಂದರ್ಭದಲ್ಲಿ ಈ ಸಂಖ್ಯೆಯನ್ನು ಯಾವತ್ತೂ ಯಾರಿಗೂ ಹೇಳಬೇಡಿ. ಅನೇಕ ಜನರು 1234 ನಂತಹ ಪಾಸ್ವರ್ಡ್ ಅನ್ನು ಆಯ್ಕೆ ಮಾಡುತ್ತಾರೆ. ಇದು ಸುರಕ್ಷಿತವಲ್ಲ. ಉತ್ತಮ ರಕ್ಷಣೆಗಾಗಿ ಪಾಸ್ವರ್ಡ್ ಅನ್ನು ನಿಯಮಿತವಾಗಿ ಬದಲಾಯಿಸುತ್ತಾ ಇರಿ.
ಸ್ಕ್ಯಾನ್ ಮಾಡುವ ಮೊದಲು ಎಚ್ಚರ: ಅಂಗಡಿಗಳಲ್ಲಿ ಪಾವತಿ ಮಾಡಲು ಕ್ಯೂಆರ್ ಕೋಡ್‌ಗಳಿವೆ. ನಾವು ಆ ಕೋಡ್‌ಗಳನ್ನು ಸ್ಕ್ಯಾನ್ ಮಾಡಿ ಕ್ಷಣಗಳಲ್ಲಿ ಪಾವತಿ ಮಾಡಬಹುದು. ಕೆಲವೊಮ್ಮೆ ಮೋಸದ QR ಕೋಡ್‌ಗಳು ಸಹ ಅಲ್ಲಿರಬಹುದು. ಗೊತ್ತಿಲ್ಲದೇ ಸ್ಕ್ಯಾನ್ ಮಾಡಿದರೆ ನಮ್ಮ ಫೋನ್ನಲ್ಲಿರುವ ಮಾಹಿತಿಯೆಲ್ಲ ಸೈಬರ್ ಕ್ರಿಮಿನಲ್ಗಳಿಗೆ ತಲುಪುತ್ತದೆ. ಆದ್ದರಿಂದ, ಯಾವ ಕೋಡ್ ಅನ್ನು ಸ್ಕ್ಯಾನ್ ಮಾಡಲಾಗುತ್ತಿದೆ ಎಂಬುದನ್ನು ಎರಡು ಬಾರಿ ಪರಿಶೀಲಿಸಿ. ವಿವರಗಳಿಗಾಗಿ ಅಂಗಡಿಯವನನ್ನು ಕೇಳಿ ನಂತರ ಸ್ಕ್ಯಾನ್ ಮಾಡಿ. ನಂತರವೇ ವಹಿವಾಟು ಪೂರ್ಣಗೊಳಿಸಿ.
ಇಂದಿನ ಜಗತ್ತಿನಲ್ಲಿ ತಂತ್ರಜ್ಞಾನವನ್ನು ಬಿಟ್ಟು ಬದುಕಲು ಸಾಧ್ಯವಿಲ್ಲ. ಆದರೆ, ಅದರಿಂದ ಆಗುವ ಸಮಸ್ಯೆಗಳ ಬಗ್ಗೆಯೂ ತಿಳಿದುಕೊಳ್ಳುವುದು ಅವಶ್ಯಕ. ಡಿಜಿಟಲ್ ಪಾವತಿಗಳು ಈಗ ಜೀವನದ ಒಂದು ಭಾಗವೇ ಆಗಿದೆ. ಹಾಗಾಗಿ ಎಲ್ಲ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಂಡು ವಹಿವಾಟು ನಡೆಸಿದರೆ, ಯಾವುದೇ ತೊಂದರೆ ಇರುವುದಿಲ್ಲ ಎಂಬುದನ್ನು ಮರೆಯಬೇಡಿ.
ಇದನ್ನೂ ಓದಿ: Social Media: ಇನ್ಫ್ಲುಯೆನ್ಸರ್ಗಳಿಗೆ ಭಾರಿ ಬೇಡಿಕೆ; 2028ರ ವೇಳೆಗೆ 3.5 ಬಿಲಿಯನ್ ಡಾಲರ್ ವಹಿವಾಟು ನಿರೀಕ್ಷೆ
