ಸ್ಯಾನ್ ಫ್ರಾನ್ಸಿಸ್ಕೋ : ಕ್ರಿಪ್ಟೋ ಮಾರುಕಟ್ಟೆ ವಹಿವಾಟು ಮೇ ತಿಂಗಳಲ್ಲಿ 32 ತಿಂಗಳ ಕನಿಷ್ಠ ಮಟ್ಟಕ್ಕೆ ತಲುಪಿದೆ. ಎಲ್ಲಾ ಕ್ರಿಪ್ಟೋ ವಿನಿಮಯ ಕೇಂದ್ರಗಳಲ್ಲಿ ಸ್ಪಾಟ್ ಮಾರುಕಟ್ಟೆ ಪರಿಮಾಣವನ್ನು ಲೆಕ್ಕಾಚಾರ ಮಾಡುವ ದಿ ಬ್ಲಾಕ್‌ನ ಮಾಹಿತಿಯ ಪ್ರಕಾರ, ಕ್ರಿಪ್ಟೋಕರೆನ್ಸಿ ಮಾಸಿಕ ವಿನಿಮಯ ಪರಿಮಾಣ ಮೇ ತಿಂಗಳಲ್ಲಿ 439.42 ಬಿಲಿಯನ್ ಡಾಲರ್ ಆಗಿತ್ತು. ಇದು ಏಪ್ರಿಲ್ನಲ್ಲಿ ಇದ್ದ 604.88 ಶತಕೋಟಿ ಡಾಲರ್ಗಿಂತ 27 ಶೇಕಡಾ ಕಡಿಮೆಯಾಗಿದೆ. ಕಳೆದ ತಿಂಗಳ ಪರಿಮಾಣವು ಅಕ್ಟೋಬರ್ 2020 ರಲ್ಲಿ ಇದ್ದುದಕ್ಕಿಂತ 222.7 ಶತಕೋಟಿಯಷ್ಟು ಕಡಿಮೆ ಮಟ್ಟವಾಗಿದೆ ಎಂದು ವರದಿಯಲ್ಲಿ ಬಹಿರಂಗವಾಗಿದೆ.
ಅತಿದೊಡ್ಡ ಕ್ರಿಪ್ಟೋಕರೆನ್ಸಿ ವಿನಿಮಯ ಕಂಪನಿಯಾಗಿರುವ ಬಿನಾನ್ಸ್ ಮೇ ತಿಂಗಳಿನಲ್ಲಿ ಮಾಸಿಕ ವಿನಿಮಯದ ಪರಿಮಾಣದಲ್ಲಿ ಸುಮಾರು 218 ಶತಕೋಟಿ ಡಾಲರ್ ವಹಿವಾಟು ನಡೆಸಿದೆ. ಇದು ಹಿಂದಿನ ತಿಂಗಳಲ್ಲಿ ಆಗಿದ್ದ 293.83 ಶತಕೋಟಿ ಡಾಲರ್ ವಹಿವಾಟಿಗೆ ಹೋಲಿಸಿದರೆ ಶೇಕಡಾ 26 ರಷ್ಟು ಕುಸಿತವಾಗಿದೆ. ನಿಧಾನಗತಿಯ ಮಾರುಕಟ್ಟೆ ಮತ್ತು ಕಡಿಮೆ ಬೇಡಿಕೆಯ ಪರಿಣಾಮಗಳ ಹಿನ್ನೆಲೆಯಲ್ಲಿ ಭವಿಷ್ಯದ ಮಾರುಕಟ್ಟೆ ಹೇಗಿರಬಹುದು ಎಂಬ ನಿರೀಕ್ಷೆಯನ್ನು ಗಮನದಲ್ಲಿಟ್ಟುಕೊಂಡು ಎಷ್ಟು ಉದ್ಯೋಗಿಗಳನ್ನು ಕಡಿತಗೊಳಿಸಬಹುದು ಎಂಬ ಬಗ್ಗೆ ಕಂಪನಿ ಚಿಂತನೆ ನಡೆಸುತ್ತಿದೆ ಬಿನಾನ್ಸ್ ಹೇಳಿದೆ.
"ಕೇವಲ 30 ಉದ್ಯೋಗಿಗಳೊಂದಿಗೆ ಆರಂಭವಾದ ಬಿನಾನ್ಸ್ ಕಳೆದ ಆರು ವರ್ಷಗಳಲ್ಲಿ ಜಗತ್ತಿನಾದ್ಯಂತ ಸುಮಾರು 8,000 ಉದ್ಯೋಗಿಗಳ ತಂಡವಾಗಿ ಬೆಳೆದಿದೆ. ಆದರೆ ನಾವು ಮುಂದಿನ ಪ್ರಮುಖ ಏರಿಕೆಯ ಹಂತದ ವಿಷಯದಲ್ಲಿ ತಯಾರಿ ನಡೆಸುತ್ತಿರುವಾಗ ಸಂಸ್ಥೆಯಲ್ಲಿ ಪ್ರತಿಭಾವಂತ ಉದ್ಯೋಗಿಗಳ ಮೇಲೆ ಗಮನ ಕೇಂದ್ರೀಕರಿಸುವ ಅಗತ್ಯವಿದೆ ಎಂಬುದು ಸ್ಪಷ್ಟವಾಗಿದೆ" ಎಂದು ಬಿನಾನ್ಸ್ ವಕ್ತಾರರು ಹೇಳಿದ್ದಾರೆ. ಬಿನಾನ್ಸ್ ಈಗಾಗಲೇ ತನ್ನ ಶೇಕಡಾ 20 ರಷ್ಟು ಉದ್ಯೋಗಿಗಳನ್ನು ವಜಾಗೊಳಿಸಿದೆ ಎಂದು ಕೆಲ ವರದಿಗಳು ತಿಳಿಸಿವೆ. ಆದರೆ ಈ ಬಗ್ಗೆ ಟ್ವೀಟ್ ಮೂಲಕ ಸ್ಪಷ್ಟನೆ ನೀಡಿರುವ ಬಿನಾನ್ಸ್ನ ಮುಖ್ಯ ಸಂಪರ್ಕಾಧಿಕಾರಿ ಪ್ಯಾಟ್ರಿಕ್ ಹಿಲ್ ಮ್ಯಾನ್, ವೆಚ್ಚ ಕಡಿತದ ಭಾಗವಾಗಿ ಕಂಪನಿಯು ಶೇಕಡಾ 20 ರಷ್ಟು ಉದ್ಯೋಗಿಗಳನ್ನು ವಜಾ ಮಾಡಿಲ್ಲ ಎಂದಿದ್ದಾರೆ.
ಕ್ರಿಪ್ಟೋಕರೆನ್ಸಿ ಎನ್ನುವುದು ಕ್ರಿಪ್ಟೋಗ್ರಫಿಯಿಂದ ಸುರಕ್ಷಿತವಾಗಿರುವ ಡಿಜಿಟಲ್ ಅಥವಾ ವರ್ಚುವಲ್ ಕರೆನ್ಸಿಯಾಗಿದೆ. ಇದು ನಕಲಿ ಮಾಡುವುದು ಅಥವಾ ಒಂದೇ ಕರೆನ್ಸಿಯನ್ನು ಎರಡು ಬಾರಿ ಖರ್ಚು ಮಾಡುವುದು ಸಾಧ್ಯವಿಲ್ಲ. ಅನೇಕ ಕ್ರಿಪ್ಟೋಕರೆನ್ಸಿಗಳು ಬ್ಲಾಕ್‌ಚೈನ್ ತಂತ್ರಜ್ಞಾನದ ಆಧಾರದ ಮೇಲೆ ವಿಕೇಂದ್ರೀಕೃತ ನೆಟ್‌ವರ್ಕ್‌ಗಳಾಗಿವೆ. ಬ್ಲಾಕ್ಚೇನ್ ಎಂಬುದು ಕಂಪ್ಯೂಟರ್‌ಗಳ ವಿಭಿನ್ನ ನೆಟ್‌ವರ್ಕ್‌ನಿಂದ ಜಾರಿಗೊಳಿಸಲಾದ ವಿತರಣೆ ಲೆಡ್ಜರ್ ಆಗಿದೆ. ಕ್ರಿಪ್ಟೋಕರೆನ್ಸಿಗಳ ವಿಶಿಷ್ಟ ಲಕ್ಷಣವೆಂದರೆ ಅವು ಸಾಮಾನ್ಯವಾಗಿ ಯಾವುದೇ ಕೇಂದ್ರೀಯ ಪ್ರಾಧಿಕಾರದಿಂದ ನೀಡಲ್ಪಡುವುದಿಲ್ಲ. ಅಂದರೆ ಇವು ವಿಶ್ವದ ಯಾವುದೇ ಸರ್ಕಾರದ ಕರೆನ್ಸಿಗಳಾಗಿರುವುದಿಲ್ಲ ಹಾಗೂ ಯಾವುದೇ ಸರ್ಕಾರದ ಅಧೀನದಲ್ಲಿಯೂ ಇರುವುದಿಲ್ಲ.
ಕ್ರಿಪ್ಟೋಕರೆನ್ಸಿಗಳ ಅನುಕೂಲಗಳು: ಅಗ್ಗದ ಮತ್ತು ವೇಗದ ಹಣ ವರ್ಗಾವಣೆ ಮತ್ತು ಕುಸಿಯದ ವಿಕೇಂದ್ರೀಕೃತ ವ್ಯವಸ್ಥೆಗಳನ್ನು ಒಳಗೊಂಡಿವೆ. ಕ್ರಿಪ್ಟೋಕರೆನ್ಸಿಗಳ ಅನಾನುಕೂಲಗಳು: ಅವುಗಳ ಬೆಲೆಯ ವಿಪರೀತ ಏರಿಳಿತ, ನಿರ್ವಹಿಸಲು ಹೆಚ್ಚಿನ ಶಕ್ತಿಯ ಬಳಕೆ ಮತ್ತು ಅಪರಾಧ ಚಟುವಟಿಕೆಗಳಲ್ಲಿ ಬಳಕೆಯಾಗುವುದು.
ಇದನ್ನೂ ಓದಿ : ಏಪ್ರಿಲ್ನಲ್ಲಿ 74 ಲಕ್ಷ ಅಕೌಂಟ್ಗಳನ್ನು ಬ್ಯಾನ್ ಮಾಡಿದ ವಾಟ್ಸ್‌ಆ್ಯಪ್
