ನವದೆಹಲಿ: ದೇಶದಲ್ಲಿ 5ಜಿ ಸೇವೆ ಆರಂಭವಾಗಿ ಒಂದು ವರ್ಷವಾಗಿದೆ. ಏರ್ಟೆಲ್ ಮತ್ತು ಜಿಯೋ ಟೆಲಿಕಾಂ ಸಂಸ್ಥೆಗಳು ಮಾತ್ರ ಪ್ರಸ್ತುತ ಅತ್ಯಾಧುನಿಕ ತಂತ್ರಜ್ಞಾನದೊಂದಿಗೆ ಈ ಸೇವೆಗಳನ್ನು ನೀಡುತ್ತಿವೆ. 5ಜಿ ನೆಟ್‌ವರ್ಕ್ ಹೊಂದಿರುವ ಪ್ರದೇಶಗಳಲ್ಲಿ 5ಜಿ ಮೊಬೈಲ್ ಇರುವವರಿಗೆ ಡೇಟಾ ಸೇವೆಗಳನ್ನು ಉಚಿತವಾಗಿಯೇ ನೀಡಲಾಗುತ್ತಿದೆ. ಡೇಟಾ ಬಳಕೆಗೂ ಯಾವುದೇ ನಿರ್ಬಂಧವಿಲ್ಲ. ಆದರೆ ನೀವು ಈ ಸೇವೆಗಳನ್ನು ಇನ್ನು ಕೆಲವೇ ದಿನಗಳ ಕಾಲ ಮಾತ್ರ ಉಚಿತವಾಗಿ ಬಳಸಬಹುದಾದ ಸಾಧ್ಯತೆ ಗೋಚರಿಸಿದೆ.
ಈ ಎರಡೂ ಟೆಲಿಕಾಂ ಕಂಪನಿಗಳು 5ಜಿ ಸೇವೆಗಳಿಗೆ ಶುಲ್ಕ ವಿಧಿಸಲಿವೆ. ಈ ವರ್ಷದ ದ್ವಿತೀಯಾರ್ಧದಿಂದ ಶುಲ್ಕ ಸಂಗ್ರಹಿಸುವ ಯೋಜನೆ ಇದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ. ಹಾಗಾಗಿ, ಇನ್ನು ಮುಂದೆ 4ಜಿ ಸೇವೆಗಳಿಗೆ ಹೋಲಿಸಿದರೆ 5ಜಿಗಾಗಿ ಶೇ.5-10ರಷ್ಟು ಹೆಚ್ಚು ಶುಲ್ಕ ವಿಧಿಸುವ ಸಾಧ್ಯತೆ ಇದೆ. 5ಜಿ ಸೇವೆಗಳಿಗೆ ತಗಲುವ ವೆಚ್ಚ ಮರುಪಡೆಯಲು ಈ ಟೆಲಿಕಾಂ ಕಂಪನಿಗಳು ಒಂದೇ ವಿಧಾನವನ್ನು ಅನುಸರಿಸುವ ಸಾಧ್ಯತೆಯಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳುತ್ತಿದ್ದಾರೆ. ಪ್ರಸ್ತುತ ಮೊಬೈಲ್ ದರವನ್ನು ಶೇ.20ರಷ್ಟು ಹೆಚ್ಚಿಸುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
ಏರ್ಟೆಲ್ ಮತ್ತು ಜಿಯೋ ದೇಶದಲ್ಲಿ ತಮ್ಮ 5ಜಿ ಸೇವೆಗಳನ್ನು ವೇಗವಾಗಿ ವಿಸ್ತರಿಸುತ್ತಿವೆ. ಉಭಯ ಕಂಪನಿಗಳ 5ಜಿ ಬಳಕೆದಾರರ ಸಂಖ್ಯೆ 12 ಕೋಟಿ ದಾಟಿದೆ. ಈ ವರ್ಷಾಂತ್ಯಕ್ಕೆ ಈ ಸಂಖ್ಯೆ 20 ಕೋಟಿ ದಾಟುವ ಸಂಭವವಿದೆ. ವೊಡಾಫೋನ್ ಇಲ್ಲಿಯವರೆಗೆ 5ಜಿ ಸೇವೆಗಳನ್ನು ಪ್ರಾರಂಭಿಸಿಲ್ಲ.
ಸರ್ಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ ಇನ್ನೂ 4ಜಿ ಸೇವೆಯನ್ನೇ ಸಂಪೂರ್ಣವಾಗಿ ವಿಸ್ತರಿಸಿಲ್ಲ. ಇನ್ನು, 5ಜಿ ಸೇವೆಗಳು ಯಾವಾಗ ಲಭ್ಯವಾಗುತ್ತವೆ ಎಂಬುದನ್ನು ಹೇಳುವುದು ಕಷ್ಟ. ಆದರೂ ಏರ್ಟೆಲ್ ಮತ್ತು ಜಿಯೋ 5ಜಿಗಾಗಿ ಶುಲ್ಕ ವಿಧಿಸಿದರೂ ತಮ್ಮ ಪ್ಯಾಕ್‌ಗಳಲ್ಲಿ ಪ್ರಸ್ತುತ ಡೇಟಾ ಮಿತಿಗಿಂತ ಶೇ.30-40 ರಷ್ಟು ಹೆಚ್ಚು ಡೇಟಾ ಒದಗಿಸುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಸ್ಯಾಮ್ಸಂಗ್ ಗ್ಯಾಲಕ್ಸಿ A15 5G, ಗ್ಯಾಲಕ್ಸಿ A25 5G ಭಾರತದಲ್ಲಿ ಬಿಡುಗಡೆ; ಬೆಲೆ ಎಷ್ಟು ಗೊತ್ತಾ?
