ಮುಂಬೈ: ಕಚ್ಚಾ ತೈಲ ದರ ಏರಿಕೆ, ವಿದೇಶಿ ಸಾಂಸ್ಥಿಕ ಹೂಡಿಕೆದಾರರ ಬಂಡವಾಳ ಹಿಂತೆಗೆತ ಸೇರಿದಂತೆ ಇತರ ನಡೆಗಳನ್ನು ಅನುಸರಿಸಿದ ಭಾರತೀಯ ಕರೆನ್ಸಿ ರೂಪಾಯಿ ಮೌಲ್ಯ ಮಂಗಳವಾರದ ಫಾರೆಕ್ಸ್ ಮಾರುಕಟ್ಟೆಯಲ್ಲಿ ಡಾಲರ್ ಎದುರು 23 ಪೈಸೆ ಕುಸಿದಿದೆ.
ಮಂದಗತಿಯ ಜಾಗತಿಕ ಆರ್ಥಿಕತೆಯಿಂದಾಗಿ ಸೋಮವಾರದಂದು 29 ಪೈಸೆಯಷ್ಟು ಮೌಲ್ಯ ಕಳೆದುಕೊಳ್ಳುವ ಮೂಲಕ ಆರು ತಿಂಗಳ ಹಿಂದಿನ ಕನಿಷ್ಠ ಮೊತ್ತಕ್ಕೆ ಇಳಿಕೆಯಾಗಿದ್ದ ರೂಪಾಯಿ, ಪ್ರತಿ ಡಾಲರ್ ಎದುರು ₹ 71.43ರಷ್ಟು ಮೌಲ್ಯ ಹೊಂದಿತ್ತು.ನಿಧಾನಗತಿಯ ಆರ್ಥಿಕತೆಯನ್ನು ಪುನಶ್ಚೇತನಗೊಳಿಸಲು ಹೂಡಿಕೆದಾರರು ಸರ್ಕಾರದ ಹಸ್ತಕ್ಷೇಪಕ್ಕಾಗಿ ಎದುರು ನೋಡುತ್ತಿದ್ದಾರೆ ಎಂದು ವಿದೇಶಿ ವಿನಿಮಯ ವ್ಯಾಪಾರಿಗಳು ತಿಳಿಸಿದ್ದಾರೆ.
ಸರ್ಕಾರವು ಶೀಘ್ರದಲ್ಲೇ ವಲಯವಾರ ಕ್ಷೇತ್ರಗಳ ಬಲ ವರ್ಧನೆ ನೂತನ ಸುಧಾರಣೆಗಳ ಮೂಲಕ ಮುಂದೆ ಬರಲಿದೆ ಎಂಬ ನಿರೀಕ್ಷೆಗಳಿವೆ. ಇಂಟರ್ಬ್ಯಾಂಕ್‌ ವಿದೇಶಿ ವಿನಿಮಯ ಕೇಂದ್ರದಲ್ಲಿ ಡಾಲರ್ ಎದುರು ರೂಪಾಯಿ, ₹ 71.56 ಮೌಲ್ಯದೊಂದಿಗೆ ದಿನದ ವಹಿವಾಟು ನಕರಾತ್ಮಕವಾಗಿ ಆರಂಭಿಸಿತು. ಋಣಾತ್ಮಕ ಹಾದಿಯಲ್ಲಿ ಸಾಗಿದ ರೂಪಾಯಿ ಅಂತಿಮವಾಗಿ 23 ಪೈಸೆ ಕುಸಿದು ₹ 71.66ಕ್ಕೆ ಕುಸಿಯಿತು.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಸೋಮವಾರದ ಬಂಡವಾಳ ಮಾರುಕಟ್ಟೆಯಿಂದ ₹ 303. 74 ಕೋಟಿಯಷ್ಟು ಸಂಪತ್ತು ಹಿಂತೆಗೆದುಕೊಂಡರು. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪ್ರತಿ ಬ್ಯಾರೆಲ್ ಬ್ರೆಂಟ್ ಕಚ್ಚಾ ತೈಲ ದರದಲ್ಲಿ ಶೇ 0.05ರಷ್ಟು ಹೆಚ್ಚಾಗಿ, 59.77 ಡಾಲರ್ಗೆ ಮಾರಾಟವಾಗಿದೆ.
