ಮುಂಬೈ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಕುಸಿತ ಹಾಗೂ ಸಾಗರೋತ್ತರ ಮಾರುಕಟ್ಟೆಗಳಲ್ಲಿ ಇತರೆ ಕರೆನ್ಸಿಗಳ ವಿರುದ್ದ ಡಾಲರ್ ವಹಿವಾಟಿನ ಹಿನ್ನೆಡೆ ಸೇರಿದಂತೆ ಇತರೆ ಕಾರಣಗಳಿಂದ ರೂಪಾಯಿ ವಿರುದ್ದ ಡಾಲರ್ ಇಳಿಕೆ ದಾಖಲಿಸಿದೆ.
ಇವತ್ತಿನ ಆರಂಭಿಕ ವಹಿವಾಟಿನಲ್ಲಿ ಭಾರತೀಯ ಕರೆನ್ಸಿ ರೂಪಾಯಿ 32 ಪೈಸೆ ಏರಿಕೆ ಕಂಡು ₹ 69.70 ಪೈಸೆಯಲ್ಲಿ ನಿರತವಾಗಿತ್ತು. ಸಂಜೆಯ ವೇಳೆಗೆ 45 ಪೈಸೆಯಷ್ಟು ಚೇತರಿಕೆ ಕಂಡು ₹ 69.55ರ ಮಟ್ಟದಲ್ಲಿ ವ್ಯವಹಾರ ನಡೆಯುತ್ತಿತ್ತು.
ಫಾರೆಕ್ಸ್ ಮಾರುಕಟ್ಟೆಯ ಆರಂಭಿಕ ಹಂತದಿಂದ ಡಾಲರ್ ನಡೆಯನ್ನು ಸಮರ್ಥವಾಗಿ ಎದುರಿಸಿದ ರೂಪಾಯಿ, ನಿನ್ನೆಯ ₹ 69.83 ಮೌಲ್ಯದಿಂದ ₹ 69.55ಕ್ಕೆ ತಲುಪಿದೆ. ಕಳೆದ ಶುಕ್ರವಾರದ ಪೇಟೆಯಲ್ಲಿ ಡಾಲರ್ ಎದುರು ರೂಪಾಯಿ 70.02ರಷ್ಟು ಕುಸಿತ ಕಂಡು ವಹಿವಾಟು ನಡೆಸಿತ್ತು.
ಫಾರೆಕ್ಸ್ ಮಾರುಕಟ್ಟೆಯಲ್ಲಿ ಅಮೆರಿಕದ ಡಾಲರ್ ಮಾರಾಟಕ್ಕೆ ರೂಪಾಯಿ ರಫ್ತುದಾರರು ಬೆಂಬಲಿಸಿದ್ದರು. ಇದರ ಜೊತೆಗೆ ಬ್ರೆಂಟ್ ಕಚ್ಚಾ ತೈಲವು ಕಳೆದ ಆರು ತಿಂಗಳಲ್ಲಿ ಅತ್ಯಧಿಕ ಬೆಲೆ ಏರಿಕೆ ಕಂಡದ್ದು (ಬ್ಯಾರೆಲ್ಗೆ 75.60 ಡಾಲರ್) ಇಂದು ಪ್ರತಿ ಬ್ಯಾರೆಲ್ಗೆ 70.02 ಡಾಲರ್ನಲ್ಲಿ ವಹಿವಾಟು ನಡೆಸಿತು. ಈ ಬೆಳವಣಿಗೆಗಳು ರೂಪಾಯಿ ಮೌಲ್ಯ ಏರಿಕೆಗೆ ಸಹಕರಿಸಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
