ನವದೆಹಲಿ : ಮಹತ್ವದ ಬೆಳವಣಿಗೆ ಒಂದರಲ್ಲಿ ಇ-ಕಾಮರ್ಸ್ಗಳಾದ ಅಮೆಜಾನ್, ಫ್ಲಿಪ್ಕಾರ್ಟ್ನಂತಹ ಸಂಸ್ಥೆಗಳಿಗೆ ಉತ್ಪನ್ನಗಳ ಮೂಲ ದೇಶದ ಮಾಹಿತಿ ಹಂಚಿಕೆಯ ಬಗ್ಗೆ ಅವುಗಳ ಅಭಿಪ್ರಾಯ ಕೇಳಲು ಕೇಂದ್ರ ಸರ್ಕಾರ ಇಚ್ಛಿಸಿದೆ.
ಮೂಲಗಳ ಪ್ರಕಾರ, ಡಿಪಿಐಐಟಿ ಬುಧವಾರ ಇ-ಕಾಮರ್ಸ್ ಸಂಸ್ಥೆಗಳಾದ ಅಮೆಜಾನ್ ಮತ್ತು ಫ್ಲಿಪ್ಕಾರ್ಟ್ ತಮ್ಮ ಪ್ಲಾಟ್‌ಫಾರ್ಮ್‌ಗಳ ಮೂಲಕ ಮಾರಾಟ ಮಾಡುವ ಪ್ರತಿ ಉತ್ಪನ್ನದ ಮೇಲೆ 'ಉತ್ಪನ್ನಗಳ ಮೂಲ ದೇಶ'ದ (ಕಂಟ್ರಿ ಆಫ್ ಒರಿಜನ್) ಬಗ್ಗೆ ತಮ್ಮ ಅಭಿಮತ ತಿಳಿಸುವಂತೆ ಪ್ರಸ್ತಾಪಿಸಿದೆ.
ಕೈಗಾರಿಕಾ ಮತ್ತು ಆಂತರಿಕ ವ್ಯಾಪಾರ ಪ್ರಚಾರದ (ಡಿಪಿಐಐಟಿ) ಅಧಿಕಾರಿಗಳು ಮತ್ತು ಅಮೆಜಾನ್, ಫ್ಲಿಪ್ಕಾರ್ಟ್, ಸ್ನ್ಯಾಪ್‌ಡೀಲ್, ಟಾಟಾ ಕ್ಲಿಕ್, ಪೇಟಿಎಂ, ಉಡಾನ್, ಪೆಪ್ಪರ್‌ಫ್ರೈ ಸೇರಿ ಇ-ವಾಣಿಜ್ಯ ಕಂಪನಿಗಳ ಪ್ರತಿನಿಧಿಗಳ ಜತೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಸಭೆ ನಡೆಸಿ ಈ ಬಗ್ಗೆ ವಿವರವಾಗಿ ಚರ್ಚಿಸಲಾಯಿತು. ಲಡಾಖ್‌ ಗಡಿಯಲ್ಲಿ ಭಾರತ ಮತ್ತು ಚೀನಾ ನಡುವಿನ ಗಡಿ ಸಂಘರ್ಷದ ನಂತರ ಚೀನಿ ಸರಕುಗಳ ಬಹಿಷ್ಕಾರದ ಅಭಿಯಾನದ ನಡುವೆ ಈ ಆದೇಶ ಹೊರ ಬಂದಿದೆ.
ಕೇಂದ್ರ ಸರ್ಕಾರಿ ಇ-ಮಾರುಕಟ್ಟೆಯಲ್ಲಿ (GeM-Government e-Marketplace) ಉತ್ಪನ್ನಗಳ ನೋಂದಣಿಗೆ ಉತ್ಪನ್ನದ ಮೂಲ ದೇಶದ ಮಾಹಿತಿ ಕಡ್ಡಾಯ ಮಾಡಿ ಆದೇಶ ಹೊರಡಿಸಿತ್ತು. ಉತ್ಪನ್ನಗಳ ಮೇಲೆ ಮೂಲ ದೇಶವನ್ನು ಉಲ್ಲೇಖಿಸುವುದು ಖರೀದಿದಾರರಿಗೆ ವಸ್ತು ಖರೀದಿಸುವಾಗ ವಿವೇಚನಾಯುಕ್ತ ನಿರ್ಧಾರ ತೆಗೆದುಕೊಳ್ಳಲು ನೆರವಾಗುತ್ತದೆ. ಇ-ಕಾಮರ್ಸ್ ಕಂಪನಿಗಳ ಅಭಿಪ್ರಾಯಗಳನ್ನು ಈ ವಿಷಯದ ಬಗ್ಗೆ ಮತ್ತು ಸ್ಥಳೀಯ ವಿಷಯಗಳ ಬಗ್ಗೆಯೂ ಕೋರಲಾಗಿದೆ ಎಂದು ಮೂಲವೊಂದು ತಿಳಿಸಿದೆ.
