ನವದೆಹಲಿ: ಸರ್ಕಾರಿ ಸ್ವಾಮ್ಯದ ಭಾರತ್‌ ಪೆಟ್ರೋಲಿಯಂ ಕಾರ್ಪೋರೇಷನ್‌ ಲಿಮಿಟೆಡ್‌ (ಬಿಪಿಸಿಎಲ್) ಖರೀದಿಗಾಗಿ ಎಕ್ಸ್‌ಪ್ರೆಷನ್ಸ್‌ ಆಫ್‌ ಇಂಟರೆಸ್ಟ್‌(ಇಒಐ) ಸಲ್ಲಿಸುವ ಅವಧಿಯನ್ನು ನವೆಂಬರ್‌ 16ಕ್ಕೆ ಮುಂದೂಡಿ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದೆ.
ಹೀಗೆ ಮುಂದೂಡಿಕೆ ಮಾಡಿರುವುದು ಇದು 4ನೇ ಬಾರಿ. ಈ ಮೊದಲು ಮೇ 2 ರಂದು ಬಿಡ್‌ಗೆ ಆಹ್ವಾನ ನೀಡಿತ್ತು. ಬಳಿಕ ಜೂನ್‌ 13, ಆ ನಂತರ ಜುಲೈ 31 ಹಾಗೂ ಸೆಪ್ಟೆಂಬರ್‌ 30ಕ್ಕೆ ಮುಂದೂಡತ್ತಲೇ ಬಂದಿತ್ತು. ಇದೀಗ ನಾಲ್ಕನೇ ಬಾರಿ ಕೂಡ ಬಿಡ್‌ ಅನ್ನು ಮುಂದೂಡಿದೆ.
ಈ ಸಂಬಂಧ ಹೂಡಿಕೆ ಮತ್ತು ಸಾರ್ವಜನಿಕ ಆಸ್ತಿ ನಿರ್ವಹಣೆ ಇಲಾಖೆ (ಡಿಐಪಿಎಎಂ) ಅಧಿಕೃತ ಪ್ರಕಟಣೆ ಹೊರಡಿಸಿದ್ದು, ಬಿಡ್‌ ಕೂಗುವವರ ಮನವಿ ಹಾಗೂ ಕೋವಿಡ್-19 ನಿಂದಾಗಿ ಬಿಡ್‌ ದಿನಾಂಕವನ್ನು ಮುಂದೂಡಿಕೆ ಮಾಡಲಾಗಿದೆ ಎಂದು ಹೇಳಿದೆ.
ಆಸಕ್ತ ಬಿಡರ್‌ಗಳು (ಐಬಿ) ಮನವಿ ಹಾಗೂ ಕೋವಿಡ್-19 ಪರಿಸ್ಥಿತಿ ಉಂಟಾಗಿರುವುದರಿಂದ ಇಒಎಸ್‌ ಸಲ್ಲಿಕೆಯ ದಿನಾಂಕವನ್ನು 2020ರ ನವೆಂಬರ್‌ 16ರ ಸಂಜೆ 5 ಗಂಟೆಗೆ ಮುಂದೂಡಿರುವುದಾಗಿ ಡಿಐಪಿಎಎಂ ಸ್ಪಷ್ಟಪಡಿಸಿದೆ.
ಬಿಪಿಸಿಎಲ್‌ನಲ್ಲಿರುವ ತನ್ನ 52.98 ರಷ್ಟು ಷೇರುಗಳ ಮಾರಾಟಕ್ಕೆ ಕೇಂದ್ರ ಸರ್ಕಾರ ಮುಂದಾಗಿದೆ. ಆ ಮೂಲಕ ಸರ್ಕಾರದ ಅಧೀನದಲ್ಲಿರುವ ಈ ಕಂಪನಿಯ ನಿರ್ವಹಣೆಯನ್ನು ಖಾಸಗಿಯವರಿಗೆ ನೀಡಲು ಮುಂದಾಗಿದೆ.
ಬಿಪಿಸಿಎಲ್‌ನಲ್ಲಿ ಸುಮಾರು 50,000 ಕೋಟಿ ರೂಪಾಯಿಗಳಷ್ಟು ಮೌಲ್ಯದ ಆಸ್ತಿ ಹಾಗೂ ಷೇರುಗಳನ್ನು ಸರ್ಕಾರ ಹೊಂದಿದೆ. ಇಂದಿನ ಮುಂಬೈ ಷೇರು ಮಾರುಕಟ್ಟೆಯಲ್ಲಿ ಬಿಪಿಸಿಎಲ್ ಷೇರು ಮೌಲ್ಯ 362.25 ರೂಪಾಯಿಗೆ ಮಾರಾಟವಾಗಿದೆ. ನಿನ್ನೆಗೆ ಹೋಲಿಸಿದರೆ ಇದು ಶೇಕಡಾ 23.95ರಷ್ಟು ಕಡಿಮೆಯಾಗಿದೆ.
