ಆರ್​ಬಿಐ ವಿಧಿಸಿದ ನಿರ್ಬಂಧ.. ಇನ್ಮುಂದೆ ಈ ಬ್ಯಾಂಕ್​ನ ವಿತ್ ಡ್ರಾ ಮಿತಿ 1,000 ರೂ. ಮಾತ್ರ..

ಪಂಜಾಬ್​ ಮತ್ತು ಮಹಾರಾಷ್ಟ್ರ ಸಹಕಾರಿ ಬ್ಯಾಂಕ್​ ಲಿಮಿಟೆಡ್​ (ಪಿಎಂಸಿ) ಬ್ಯಾಂಕ್​ ಮೇಲೆ ಭಾರತೀಯ ರಿಸರ್ವ್​ ಬ್ಯಾಂಕ್​ ಕೆಲವು ಕಾರ್ಯಾಚರಣೆಯ ಮೇಲೆ ಹಲವು ನಿಬಂಧನೆಗಳನ್ನು ವಿಧಿಸಿದೆ. ಬ್ಯಾಂಕ್​ ಗ್ರಾಹಕರು ಇನ್ಮುಂದೆ 1 ಸಾವಿರ ರೂ.ಗಿಂತ ಹೆಚ್ಚು ಹಣ ಡ್ರಾ ಮಾಡಿಕೊಳ್ಳುವಂತಿಲ್ಲ. ಶಾಖಾ ಕಚೇರಿಗಳಿಗೆ ನೀಡಲಾಗಿದ್ದ ಸಾಲ ಮಂಜೂರು ಅಥವಾ ಸಾಲ ನವೀಕರಣದ ಅಧಿಕಾರವನ್ನು ಮೊಟಕುಗೊಳಿಸಲಾಗಿದೆ ಎಂದು ಆರ್​ಬಿಐ ತಿಳಿಸಿದೆ.

ಮುಂಬೈ: ಮಹತ್ವದ ಬೆಳವಣಿಗೆಯಲ್ಲಿ ಮುಂಬೈ ಮೂಲದ ಪಂಜಾಬ್​ ಮತ್ತು ಮಹಾರಾಷ್ಟ್ರ ಸಹಕಾರಿ ಬ್ಯಾಂಕ್​ ಲಿಮಿಟೆಡ್​ (ಪಿಎಂಸಿ) ಬ್ಯಾಂಕ್​ ಮೇಲೆ ಭಾರತೀಯ ರಿಸರ್ವ್​ ಬ್ಯಾಂಕ್​ ಕೆಲವು ಕಾರ್ಯಾಚರಣೆಯ ನಿಬಂಧನೆಗಳನ್ನು ವಿಧಿಸಿದೆ.

ಇಂನಿಂದ ಮುಂದಿನ ಆರು ತಿಂಗಳ ಕಾಲ ಈ ನಿರ್ಬಂಧಗಳು ಜಾರಿಯಲ್ಲಿರಲಿದ್ದು, ಪಿಎಂಸಿ ಬ್ಯಾಂಕ್​ ಗ್ರಾಹಕರು ಇನ್ಮುಂದೆ 1 ಸಾವಿರ ರೂ.ಗಿಂತ ಹೆಚ್ಚು ಹಣ ಡ್ರಾ ಮಾಡಿಕೊಳ್ಳುವಂತಿಲ್ಲ. ಈ ನಿರ್ಬಂಧನೆಗಳ ನಡುವೆ ಸಹಕಾರಿ ಬ್ಯಾಂಕ್​ ತನ್ನ ದೈನಂದಿನ ವ್ಯವಹಾರಗಳನ್ನು ಮುಂದುವರಿಸಬೇಕು ಎಂದು ತಿಳಿಸಿದೆ.

ಪಿಎಂಸಿ ದೇಶದ ಆರು ರಾಜ್ಯಗಳಲ್ಲಿ 137 ಶಾಖೆಗಳನ್ನು ಹೊಂದಿದೆ. ಈ ಶಾಖೆಗಳಲ್ಲಿ ಸಾಲ ಮಂಜೂರು ಅಥವಾ ಸಾಲ ನವೀಕರಣಕ್ಕೆ ಅವಕಾಶ ನೀಡಲಾಗಿಲ್ಲ. ಈ ಸಹಕಾರಿ ಬ್ಯಾಂಕ್​ ಹಣವನ್ನು ಎರವಲು ಹಾಗೂ ಹೊಸ ಠೇವಣಿ ಸಹ ಪಡೆಯುವಂತಿಲ್ಲ. ತನ್ನ ಯಾವುದೇ ಆಸ್ತಿ ಅಥವಾ ಸ್ವತ್ತುಗಳನ್ನು ವರ್ಗಾಯಿಸುವಂತಿಲ್ಲ ಮತ್ತು ಮಾರಾಟ ಮಾಡುವಂತಿಲ್ಲ ಎಂದು ನಿರ್ದೇಶನ ನೀಡಿದೆ.

ಆರ್​ಬಿಐ ನಿರ್ದೇಶನದ ಪ್ರತಿಯನ್ನು ಎಲ್ಲ ಖಾತೆದಾರರಿಗೆ ರವಾನಿಸಬೇಕು ಮತ್ತು ಅದನ್ನು ಬ್ಯಾಂಕ್​ ಕಚೇರಿಗಳು ಬ್ಯಾಂಕ್​ ವೆಬ್​ಸೈಟ್​ನಲ್ಲಿ ಪ್ರದರ್ಶಿಸಬೇಕು ಎಂದಿದೆ. 2019ರ ಮಾರ್ಚ್‌ವರೆಗೆ ಪಿಎಂಸಿ ಬ್ಯಾಂಕ್​ 11,617 ಕೋಟಿ ರೂ. ಠೇವಣಿ ಹೊಂದಿದ್ದು, 8,383 ಕೋಟಿ ರೂ. ಮುಂಗಡ ಹಣವಿದೆ. ಶೇ 2.19ರಷ್ಟು ಎನ್​ಪಿಎ (ಅನುತ್ಪಾದಕ ಆಸ್ತಿ) ಸಹ ಹೊಂದಿದೆ.