ನವದೆಹಲಿ: ಸರ್ಕಾರದ ನಿಯಂತ್ರಣ ಮತ್ತು ಸೆನ್ಸಾರ್‌ಶಿಪ್‌ಗೆ ಹೆಸರುವಾಸಿಯಾದ ಚೀನಾದ ಸಾಮಾಜಿಕ ಮಾಧ್ಯಮ, ಈಗ ಪ್ರಧಾನಿ ನರೇಂದ್ರ ಮೋದಿ ಅವರ ಭಾಷಣ ಮತ್ತು ಗಾಲ್ವಾನ್ ಗಡಿ ಬಗೆಗಿನ ಭಾರತದ ಅಧಿಕೃತ ಹೇಳಿಕೆಗಳನ್ನು ತೆಗೆದುಹಾಕಿದೆ.
ದೇಶದ ಗಡಿ ಪರಿಸ್ಥಿತಿಯ ಬಗ್ಗೆ ಮೋದಿ ಅವರ ಜೂನ್ 18ರ ಹೇಳಿಕೆಗಳು ವೀಚಾಟ್‌ನಲ್ಲಿ ಬಳಕೆದಾರರಿಗೆ ಲಭ್ಯ ಆಗದಂತೆ ಚೀನಾ ಸೆನ್ಸಾರ್ಶಿಪ್ ತಡೆಹಿಡಿದಿತ್ತು. ಈ ಮೂಲಕ ಮೋದಿಯ ಭಾಷಣದ ವಿಡಿಯೋಗಳನ್ನು ಅಳಿಸಿ ಹಾಕಿದೆ.
ಪೂರ್ವ ಲಡಾಖ್‌ನ ಗಾಲ್ವಾನ್ ಕಣಿವೆಯಲ್ಲಿ ಚೀನಾ- ಭಾರತ ರಕ್ತಸಿಕ್ತ ಮುಖಾಮುಖಿಯಾದ ನಂತರ ಪ್ರಧಾನಿ ಅವರು ತಮ್ಮ ಹೇಳಿಕೆ ನೀಡಿದ್ದರು. ಸೋಮವಾರ ರಾತ್ರಿ 20 ಭಾರತೀಯ ಸೈನಿಕರು ಹುತಾತ್ಮರಾಗಿದ್ದರು. ಚೀನಾದ ಕಡೆ ಎಷ್ಟು ಸಾವು-ನೋವು ಸಂಭವಿಸಿದೆ ಎಂದು ಅದು ಬಹಿರಂಗಪಡಿಸಿಲ್ಲ.
ಭಾರತವು ಶಾಂತಿ ಬಯಸುತ್ತದೆಯಾದರೂ ಪ್ರಚೋದಿಸಿದಾಗ ದೇಶವು ಸೂಕ್ತವಾದ ಉತ್ತರ ನೀಡಲು ಸಮರ್ಥವಾಗಿದೆ ಎಂದು ಮೋದಿ ಒತ್ತಿ ಹೇಳಿದ್ದರು.
ಗಡಿ ಬಗೆಗಿನ ಎಂಇಎ ವಕ್ತಾರ ಅನುರಾಗ್ ಶ್ರೀವಾಸ್ತವ ಅವರ ಹೇಳಿಕೆಯನ್ನು ಅಧಿಕೃತ ವೀಚಾಟ್ ಖಾತೆಯಿಂದ ತೆಗೆದುಹಾಕಲಾಗಿದೆ. ವೀಚಾಟ್ನಲ್ಲಿನ ಈ ಸಂದೇಶವು ನಿಯಮಗಳನ್ನು ಉಲ್ಲಂಘಿಸುವ ಕಾರಣ ಅದನ್ನು ವೀಕ್ಷಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟನೆ ನೀಡಿದೆ.
2015ರಲ್ಲಿ ಚೀನಾ ಭೇಟಿಗೂ ಮುಂಚಿತವಾಗಿ ಮೋದಿ ಅವರು ಸಿನಾ ವೀಬೊದಲ್ಲಿ ಖಾತೆ ತೆರೆದಿದ್ದರು. ಇದನ್ನು ಚೀನಾದ ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಟ್ವಿಟ್ಟರ್‌ಗೆ ಸಮಾನವೆಂದು ಪರಿಗಣಿಸಲಾಗಿದೆ. ಆದರೆ, ಮೋದಿ ಚೀನಾದೊಂದಿಗಿನ ಗಡಿ ಉದ್ವಿಗ್ನತೆಗೆ ಸಂಬಂಧಿಸಿದ ಯಾವುದೇ ವಿಷಯ ಆಧಾರಿತ ಖಾತೆಯು ಪೋಸ್ಟ್ ಮಾಡಿಲ್ಲ.
