ನವದೆಹಲಿ: ದೇಶದ ಪ್ರಮುಖ ಟೆಲಿಕಾಂ ಕಂಪನಿಯಾದ ಭಾರ್ತಿ ಏರ್‌ಟೆಲ್‌ನ 32 ಕೋಟಿಗೂ ಅಧಿಕ ಚಂದಾದಾರರ ಡೇಟಾ ಮಾಹಿತಿ ಸೋರಿಕೆಯಾಗಿದೆ ಎಂದು ಬೆಂಗಳೂರು ಮೂಲದ ಸಂಶೋಧಕರೊಬ್ಬರು ಪತ್ತೆ ಹಚ್ಚಿದ್ದಾರೆ.
ಏರ್ಟೆಲ್ ಮೊಬೈಲ್ ಆ್ಯಪ್ನಲ್ಲಿನ ಅಪ್ಲಿಕೇಷನ್ ಪ್ರೋಗ್ರಾಂ ಇಂಟರ್ಫೇಸ್ನಲ್ಲಿ (ಎಪಿಐ) ಗಂಭೀರವಾದ ಭದ್ರತಾ ದೋಷ ಕಂಡುಬಂದಿದೆ. ಇದರಿಂದಾಗಿ ಚಂದಾದಾರರ ಮಾಹಿತಿ ಬಹಿರಂಗಗೊಂಡು ಜನಸಾಮನ್ಯರಿಗೂ ಸಿಗುವಂತಾಗಿತ್ತು ಎಂದು ಎಹ್ರಾಜ್ ಅಹ್ಮದ್ ಎಂಬುವವರು ತಮ್ಮ ಬ್ಲಾಗ್‌ನಲ್ಲಿ ಬರೆದುಕೊಂಡಿದ್ದಾರೆ.
ವರದಿಗಳ ಪ್ರಕಾರ, ಏರ್ಟೆಲ್ ತನ್ನ ಅಪ್ಲಿಕೇಷನ್ಗೆ ಸಂಬಂಧಿಸಿದ ಭದ್ರತಾ ದೋಷವನ್ನು ಸರಿಪಡಿಸಲಾಗಿದೆ. ಈಗ ಯಾವುದೇ ಲೋಪದೋಷವಿಲ್ಲ ಎಂದು ಏರ್ಟೆಲ್ ದೃಢಪಡಿಸಿದೆ.
ಸೋರಿಕೆಯಾದ ಡೇಟಾ ಮಾಹಿತಿಯಲ್ಲಿ ಚಂದಾದಾರರ ಮೊದಲ ಮತ್ತು ಕೊನೆಯ ಹೆಸರು, ಲಿಂಗ, ಇ-ಮೇಲ್, ಜನ್ಮ ದಿನಾಂಕ, ವಿಳಾಸ, ಚಂದಾದಾರಿಕೆಯ ಮಾಹಿತಿ, 4ಜಿ, 3ಜಿ ಮತ್ತು ಜಿಪಿಆರ್ಎಸ್ ಸಾಧನ ಸಾಮರ್ಥ್ಯದ ಮಾಹಿತಿ, ನೆಟ್‌ವರ್ಕ್, ಸಕ್ರಿಯಗೊಳಿಸಿದ ದಿನಾಂಕ, ಬಳಕೆದಾರರ (ಪ್ರಿಪೇಯ್ಡ್ / ಪೋಸ್ಟ್‌ಪೇಯ್ಡ್) ಮತ್ತು ಪ್ರಸ್ತುತ ಐಎಂಇಐ ಸಂಖ್ಯೆ ಸೇರಿದೆ ಎಂದು ಅಹ್ಮದ್ ಬರೆದುಕೊಂಡಿದ್ದಾರೆ.
