ನೆಟ್ವರ್ಕ್ ಸಿಗುತ್ತಿಲ್ಲ, ನಿಧಾನಗತಿಯ ನೆಟ್ವರ್ಕ್ ಸೇವೆ ಅಂತಾ ಗ್ರಾಹಕರು ಏರ್ಟೆಲ್ ಕಂಪನಿಗೆ ದೂರು ಸಲ್ಲಿಸಿದ್ದರು. ಈ ದೂರುಗಳನ್ನು ಪಡೆದ ಏರ್ಟೆಲ್ ಉತ್ತಮ ನೆಟ್ವರ್ಕ್ ನೀಡಲು ಹೊಸ ಸೇವೆ ಕಾರ್ಯರೂಪಕ್ಕೆ ತರುತ್ತಿದೆ.
ಹೌದು, ಇದೇ ಮೊದಲ ಬಾರಿ ಭಾರತದಲ್ಲಿ ವೈಫೈ ಮೂಲಕ ಕರೆ ಸೇವೆಯನ್ನು ನೀಡಲು ಭಾರ್ತಿ ಏರ್ಟೆಲ್ ಮುಂದಾಗಿದೆ. ಈ ಮೂಲಕ ಬಳಕೆದಾರರು ವೈಫೈ ಅಡಿಯಲ್ಲಿ ಕರೆ ಮಾಡಲು ಸಾಧ್ಯವಾಗುವಂತಹ ಹೊಸ ಸೌಲಭ್ಯವನ್ನು ಏರ್ಟೆಲ್ ಪ್ರಸ್ತುತಪಡಿಸಲಿದೆ.
ಏರ್ಟೆಲ್ ಪರಿಚಯಿಸುತ್ತಿರುವ ಹೊಸ ಸೇವೆ ‘ಏರ್ಟೆಲ್ ವೈಫೈ ಕಾಲಿಂಗ್’ ಮೂಲಕ ನೀವು ಸೆಲ್ಯುಲಾರ್ ನೆಟ್ವರ್ಕ್ ಸಹಾಯವಿಲ್ಲದೆ ಕರೆಗಳನ್ನು ಮಾಡಬಹುದು. ಈಗಾಗಲೇ ಈ ಸೇವೆಯನ್ನು ನವದೆಹಲಿಯಲ್ಲಿ ಏರ್ಟೆಲ್ ಪರಿಚಯಿಸಿದ್ದು, ಈಗ ಮುಂಬೈ, ಕೋಲ್ಕತ್ತಾ, ಆಂಧ್ರ ಪ್ರದೇಶ, ಕರ್ನಾಟಕ ಮತ್ತು ತಮಿಳುನಾಡಿನಲ್ಲಿ ಈ ಸೇವೆ ವಿಸ್ತರಿಸುತ್ತಿದೆ. ಏರ್ಟೆಲ್ ವೈಫೈ ಕಾಲಿಂಗ್ ಸೇವೆಯನ್ನು ವೈಫೈ ನೆಟ್ವರ್ಕ್ ಮೂಲಕ ಪಡೆಯಬಹುದಾಗಿದೆ. ಈ ಸೇವೆ ಮೂಲಕ ಗ್ರಾಹಕರು ಟೆಲ್ಕೋ ಗ್ರೇಡ್ ಕರೆಯಿಂದ ಯಾವುದೇ ನೆಟ್ವರ್ಕ್ಗೆ ಕರೆ ಮಾಡಿ ಮಾತನಾಡಬಹುದಾಗಿದೆ.
ಇನ್ನು ಏರ್ಟೆಲ್ ವೈಫೈ ಕಾಲಿಂಗ್ ಮೂಲಕ ಗ್ರಾಹಕರು ಉಚಿತವಾಗಿ ಸೇವೆ ಪಡೆಯಬಹುದಾಗಿದೆ. ಆದ್ರೆ ನೀವು ಕರೆ ಮಾಡಬೇಕಾಗಿದ್ರೆ ನಿಮ್ಮ ಮೊಬೈಲ್ನಲ್ಲಿ ಇಂಟರ್ನೆಟ್ ಡಾಟಾ ಹೊಂದಿರಬೇಕು. ಯಾವುದೇ ಸ್ಮಾರ್ಟ್ ಫೋನ್ ಮೂಲಕವೂ ಏರ್ಟೆಲ್ ಗ್ರಾಹಕರು ಈ ಸೇವೆ ಪಡೆಯಬಹುದಾಗಿದೆ ಎಂದು ಏರ್ಟೆಲ್ ತಿಳಿಸಿದೆ.
