ನವದೆಹಲಿ: ನೇರ ತೆರಿಗೆ ವಿವಾದದ ಪ್ರಕರಣಗಳನ್ನು ಇತ್ಯರ್ಥಗೊಳಿಸುವ ಉದ್ದೇಶದಿಂದ ಜಾರಿಗೆ ತರಲಾದ 'ವಿವಾದ್ ಸೆ ವಿಶ್ವಾಸ್ ಮಸೂದೆ-2020'ರಿಂದಾಗಿ ಕೇಂದ್ರದ ಖಜಾನೆಗೆ ಸಾವಿರಾರು ಕೋಟಿ ರೂಪಾಯಿ ಠೇವಣಿ ಜಮೆಯಾಗಿದೆ.
'ವಿವಾದ್ ಸೆ ವಿಶ್ವಾಸ್' ನೇರ ತೆರಿಗೆ ವಿವಾದ ಇತ್ಯರ್ಥ ಯೋಜನೆಯ ವಿವಾದಾತ್ಮಕ ಬೇಡಿಕೆಯ ವಿರುದ್ಧ ಸಿಪಿಎಸ್‌ಯು ಮತ್ತು ತೆರಿಗೆದಾರರಿಂದ ಇದುವರೆಗೆ 72,480 ಕೋಟಿ ರೂ. ಹರಿದು ಬಂದಿದೆ ಎಂದು ಹಣಕಾಸು ಸಚಿವಾಲಯದ ಮೂಲಗಳು ತಿಳಿಸಿವೆ.
ಆದಾಯ ತೆರಿಗೆ ಇಲಾಖೆಯು ಈ ಯೋಜನೆಯಲ್ಲಿ ಈವರೆಗೆ ಮಾಡಿರುವ ಪ್ರಗತಿ ಕುರಿತು ಉನ್ನತ ಮಟ್ಟದ ಪರಿಶೀಲನಾ ಸಭೆ ನಡೆಸಲಾಯಿತು. ನವೆಂಬರ್ 17ರವರೆಗೆ ಒಟ್ಟು 45,855 ಘೋಷಣೆಗಳನ್ನು ಫಾರ್ಮ್ 1ರಲ್ಲಿ ಸಲ್ಲಿಸಲಾಗಿದೆ. ಈ ಘೋಷಣೆಗಳಿಂದ ವಿವಾದಿತ ಬೇಡಿಕೆಯು 31,734 ಕೋಟಿ ರೂ.ಯಷ್ಟಿದೆ.
ಈ ಯೋಜನೆಯಡಿ ಇತ್ಯರ್ಥಪಡಿಸಲಾಗುತ್ತಿರುವ ಸಿಪಿಎಸ್‌ಯುಗಳ ಒಟ್ಟು ವಿವಾದಿತ ಮೊತ್ತ 1,00,195 ಕೋಟಿ ರೂ.ಷ್ಟಿದೆ.
ಘೋಷಣೆ ಸಲ್ಲಿಸಿದ ತೆರಿಗೆದಾರರಿಗೆ ಫಾರ್ಮ್ 3ರ ವಿತರಣೆಯನ್ನು ನಿಯಮಿತವಾಗಿ ಮೇಲ್ವಿಚಾರಣೆ ಮಾಡಲಾಗುತ್ತಿದೆ. ಈ ಮೂಲಕ ಬಾಕಿ ಇರುವ ಯಾವುದೇ ತಿದ್ದುಪಡಿಗಳನ್ನು ಪೂರ್ಣಗೊಳಿಸಿ / ಬೇಡಿಕೆಯನ್ನು ಅಂತಿಮಗೊಳಿಸುತ್ತಿದ್ದೇವೆ. ಮೇಲ್ಮನವಿಯ ಅನುಷ್ಠಾನಕ್ಕೆ ಪೂರ್ವಭಾವಿ ವಿಧಾನ ಅಳವಡಿಸಿಕೊಳ್ಳಲು ಐಟಿ ಇಲಾಖೆ ನಿರ್ಧರಿಸಿದೆ ಎಂದು ಹಣಕಾಸು ಸಚಿವಾಲಯದ ಮೂಲಗಳು ತಿಳಿಸಿವೆ.
