ಮುಂಬೈ: ಕೇಂದ್ರೀಯ ಬ್ಯಾಂಕ್ ನೀಡಿರುವ ನಿರ್ದೇಶನ ಪಾಲಿಸದ ಕಾರಣ ದೇಶದ ಅತಿದೊಡ್ಡ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ(SBI)ಗೆ ಭಾರತೀಯ ರಿಸರ್ವ್ ಬ್ಯಾಂಕ್(RBI) 1 ಕೋಟಿ ರೂಪಾಯಿ ದಂಡ ವಿಧಿಸಿದೆ. ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದ ಮಾಹಿತಿಯನ್ನು ಆರ್ಬಿಐಗೆ ನೀಡದಿರುವುದು ಮತ್ತು ಕೇಂದ್ರ ಬ್ಯಾಂಕ್ನ ನಿಯಮಗಳನ್ನು ಪಾಲಿಸದೇ ಇರುವ ಕಾರಣಕ್ಕಾಗಿ ಈ ದಂಡ ಹಾಕಲಾಗಿದೆ.
ಬ್ಯಾಂಕಿಂಗ್ ನಿಯಂತ್ರಣ ಕಾಯಿದೆ 1949ರ ಸೆಕ್ಷನ್ 46 (4) (i) ಮತ್ತು 51 (1) ರೊಂದಿಗೆ ಕಲಂ 47 ಎ (1) (ಸಿ) ನ ನಿಯಮಗಳ ಅಡಿ ಆರ್ಬಿಐಗೆ ನೀಡಲಾದ ಅಧಿಕಾರದ ಅಡಿ ಈ ದಂಡ ಹಾಕಲಾಗಿದೆ.
ಎಸ್ಬಿಐನಲ್ಲಿ ನಿರ್ವಹಿಸಲಾದ ಗ್ರಾಹಕರ ಖಾತೆ ಪರಿಶೀಲಿಸಿದ ನಂತರ, ಕೇಂದ್ರೀಯ ಬ್ಯಾಂಕ್ ಖಾತೆಯಲ್ಲಿನ ವಂಚನೆಯ ವರದಿ ವಿಳಂಬ ಮಾಡಿರುವುದು ಪತ್ತೆಯಾಗಿದೆ. ಈ ವೇಳೆ, ಬ್ಯಾಂಕ್ ತನ್ನ ಗ್ರಾಹಕರೊಂದಿಗೆ ಮಾಡಿಕೊಂಡ ಯಾವುದೇ ವಹಿವಾಟು ಅಥವಾ ಒಪ್ಪಂದದ ಸಿಂಧುತ್ವ ಉಚ್ಚರಿಸಲು ಉದ್ದೇಶಿಸಿಲ್ಲ ಎಂದು ಹೇಳಿಕೊಂಡಿದೆ.
ಇದನ್ನೂ ಓದಿರಿ: ಮಹಾನಗರಗಳಲ್ಲಿ ಗಗನಕ್ಕೇರಿದ ಟೊಮೇಟೊ ಬೆಲೆ: ಕೆಜಿಗೆ 93 ರೂ.
ಏನಿದು ಪ್ರಕರಣ?
ಎಸ್ಬಿಐ ಬ್ಯಾಂಕ್ ನಿರ್ವಹಿಸಿರುವ ಗ್ರಾಹಕರ ಖಾತೆಯಲ್ಲಿ ಆರ್ಬಿಐ ಪರಿಶೀಲನೆ ನಡೆಸಿತ್ತು. ಈ ವೇಳೆ, ಖಾತೆಯಲ್ಲಿ ಕೆಲವೊಂದು ವಂಚನೆ ಕಂಡು ಬಂದಿದ್ದವು. ಹೀಗಾಗಿ ಬ್ಯಾಂಕ್ಗೆ ನೋಟಿಸ್ ಸಹ ನೀಡಲಾಗಿತ್ತು. ಇದಕ್ಕೆ ಎಸ್ಬಿಐ ಮೌಖಿಕವಾಗಿ ಉತ್ತರ ನೀಡಿತ್ತು. ಆದರೆ, ಆರ್ಬಿಐ ನಿರ್ದೇಶನ ಪಾಲನೆ ಮಾಡದಿರುವುದು ದೃಢಪಟ್ಟಿರುವ ಕಾರಣ ದಂಡ ವಿಧಿಸಲಾಗಿದೆ ಎಂದು ಕೇಂದ್ರ ಬ್ಯಾಂಕ್ ಮೂಲಗಳು ಹೇಳಿವೆ.
