ಖಾಸಗಿ ಬ್ಯಾಂಕ್​ಗಳಲ್ಲಿನ ಖಾತೆಗಳನ್ನು ಮುಚ್ಚಲು ಆದೇಶಿಸಿದ 'ಮಹಾ' ಸರ್ಕಾರ

ಖಾಸಗಿ ಬ್ಯಾಂಕ್​​​​ಗಳಲ್ಲಿನ ಖಾತೆಗಳನ್ನು ಮುಚ್ಚಿ ಪಿಎಸ್‌ಬಿಗಳಿಗೆ ವರ್ಗಾಯಿಸುವಂತೆ ಮಹಾರಾಷ್ಟ್ರ ಸರ್ಕಾರ ಆದೇಶ ಮಾಡಿದೆ.

ಮುಂಬೈ: ಖಾಸಗಿ ಮತ್ತು ಸಹಕಾರಿ ಬ್ಯಾಂಕ್​ಗಳಲ್ಲಿನ ಎಲ್ಲ ಖಾತೆಗಳನ್ನು ಮುಚ್ಚಿ ಸಾರ್ವಜನಿಕ ವಲಯದ ಬ್ಯಾಂಕ್​​ಗಳಿಗೆ (ಪಿಎಸ್​​ಬಿ) ವರ್ಗಾಯಿಸಲು ಮಹಾರಾಷ್ಟ್ರ ಸರ್ಕಾರ ಆದೇಶ ನೀಡಿದೆ.

ಎಲ್ಲ ಸರ್ಕಾರಿ ಇಲಾಖೆಗಳು, ರಾಜ್ಯ ಸಾರ್ವಜನಿಕ ವಲಯ ಸಂಸ್ಥೆಗಳು ಮತ್ತು ಸ್ವಾಯತ್ತ ಸಂಸ್ಥೆಗಳು ತಿಂಗಳ ಅಂತ್ಯದ ವೇಳೆಗೆ ಈ ನಿಯಮವನ್ನು ಪಾಲಿಸುವಂತೆ ಅಧಿಸೂಚನೆ ಹೊರಡಿಸಲಾಗಿದೆ.

ನ್ಯಾಷನಲ್ ಸೈಕ್ಲೋನ್ ರಿಸ್ಕ್ ಮಿಟಿಗೇಶನ್ ಪ್ರಾಜೆಕ್ಟ್ ಎಂಬ ಒಂದು ಸರ್ಕಾರಿ ಇಲಾಖೆಯು ಆಕ್ಸಿಸ್ ಬ್ಯಾಂಕಿನಲ್ಲಿರುವ ತನ್ನ ಖಾತೆಗಳನ್ನು ಮುಚ್ಚಿ, ಅದನ್ನು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾಕ್ಕೆ ವರ್ಗಾಯಿಸಲು ನಿರ್ಧರಿಸಿದ ಎರಡು ದಿನಗಳ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ. ಯೆಸ್ ಬ್ಯಾಂಕ್ ಬಿಕ್ಕಟ್ಟು ಭುಗಿಲೆದ್ದ ಒಂದು ವಾರದ ನಂತರ ಹಾಗೂ ಮೂರು ನಾಗರಿಕ ಸಂಸ್ಥೆಗಳ 1,125 ಕೋಟಿ ರೂ.ಗಳು ಬ್ಯಾಂಕಿನಲ್ಲಿ ಸಿಲುಕಿಕೊಂಡಿರುವುದು ಬೆಳಕಿಗೆ ಬಂದಮೇಲೆ ಖಾಸಗಿ ಬ್ಯಾಂಕ್​ಗಳ ಅಕೌಂಟ್​ಗಳನ್ನು ಮುಚ್ಚುವ ನಿರ್ಧಾರವನ್ನು ಮಹಾರಾಷ್ಟ್ರ ಸರ್ಕಾರ ತೆಗೆದುಕೊಂಡಿದೆ.

ಸಾರ್ವಜನಿಕರ ಹಣದ ಸುರಕ್ಷತೆ ದೃಷ್ಟಿಯ ಭಾಗವಾಗಿ ಈ ಕ್ರಮಕೈಗೊಳ್ಳಲಾಗಿದೆ. ಅಲ್ಲದೇ ಏಪ್ರಿಲ್ 1 ರೊಳಗೆ ಎಲ್ಲ ಸಂಬಳ, ಪಿಂಚಣಿ ಮತ್ತು ಇತರ ಖಾತೆಗಳನ್ನು 11 ರಾಷ್ಟ್ರೀಕೃತ ಬ್ಯಾಂಕ್​​ಗಳಲ್ಲಿ ಯಾವುದಾದರೂ ಒಂದಕ್ಕೆ ವರ್ಗಾಯಿಸಲು ಸರ್ಕಾರ ನಿರ್ದೇಶಿಸಿದೆ.

ವಿಶೇಷವೆಂದರೆ, ಖಾಸಗಿ ಬ್ಯಾಂಕ್​​​​ಗಳಲ್ಲಿನ ಖಾತೆಗಳನ್ನು ಮುಚ್ಚುವ ಮತ್ತು ಪಿಎಸ್‌ಬಿಗಳಿಗೆ ವರ್ಗಾಯಿಸುವ ಕ್ರಮಗಳನ್ನು ಮರುಪರಿಶೀಲಿಸುವಂತೆ ಭಾರತೀಯ ರಿಸರ್ವ್ ಬ್ಯಾಂಕ್ ಎಲ್ಲ ರಾಜ್ಯ ಸರ್ಕಾರಗಳಿಗೆ ಮನವಿ ಕಳುಹಿಸಿದ ಒಂದು ದಿನದ ನಂತರ ಈ ಕ್ರಮವು ಬಂದಿದೆ.

ಈ ಕ್ರಮವನ್ನು ಸಮರ್ಥಿಕೊಂಡಿರುವ ಮಹಾರಾಷ್ಟ್ರ ಸರ್ಕಾರ ಎರಡು ಕಾರಣಗಳನ್ನು ಉಲ್ಲೇಖಿಸಿದೆ. ಒಂದು ಕೇಂದ್ರ ಸರ್ಕಾರದ ಎಲ್ಲ ಯೋಜನೆಗಳನ್ನು ರಾಷ್ಟ್ರೀಕೃತ ಬ್ಯಾಂಕ್​ಗಳ ಮೂಲಕ ಪ್ರಕ್ರಿಯೆಗೊಳಿಸಲಾಗುವುದು. ಮತ್ತೊಂದು ಖಾತೆಗಳನ್ನು ರಾಷ್ಟ್ರೀಕೃತ ಬ್ಯಾಂಕ್‌ಗೆ ಬದಲಾಯಿಸಲು ಆರ್‌ಬಿಐ 2019 ರ ಅಕ್ಟೋಬರ್ 31 ರಂದು ನೀಡಿದ ನಿರ್ದೇಶನವನ್ನು ಉಲ್ಲೇಖಿಸಿದೆ.

ಯೆಸ್ ಬ್ಯಾಂಕ್​​​ಗೆ ಆರ್​ಬಿಐ ನಿಷೇಧವನ್ನು ಹೇರಿದ ನಂತರ ಸರ್ಕಾರಿ ಬ್ಯಾಂಕ್​​​ಗಳಲ್ಲಿ, ವಿಶೇಷವಾಗಿ ಎಸ್‌ಬಿಐಗೆ ಠೇವಣಿಗಳು ಪ್ರವಾಹದ ರೀತಿ ಹರಿದು ಬರುತ್ತಿವೆ ಎಂದು ಬ್ಯಾಂಕಿಂಗ್ ಮೂಲಗಳು ತಿಳಿಸಿವೆ.

ಈ ಕ್ರಮದಿಂದ (ಖಾಸಗಿ ಬ್ಯಾಂಕುಗಳಿಂದ ಪಿಎಸ್‌ಬಿಗಳಿಗೆ ಖಾತೆಗಳನ್ನು ಬದಲಾಯಿಸುವುದು) ಬ್ಯಾಂಕಿಂಗ್ ಮತ್ತು ಆರ್ಥಿಕ ಸ್ಥಿರತೆಯ ಮೇಲೆ ಪರಿಣಾಮ ಬೀರಬಹುದು ಎಂದು ಆರ್‌ಬಿಐ ರಾಜ್ಯಗಳಿಗೆ ಬರೆದ ಪತ್ರದಲ್ಲಿ ತಿಳಿಸಿದೆ.

"ಖಾಸಗಿ ಬ್ಯಾಂಕ್​​​ಗಳನ್ನು ನಿಯಂತ್ರಿಸಲು ಮತ್ತು ಮೇಲ್ವಿಚಾರಣೆ ಮಾಡಲು ಆರ್‌ಬಿಐಗೆ ಅಧಿಕಾರವಿದೆ. ಈ ರೀತಿ ಮಾಡುವುದರಿಂದ ಠೇವಣಿದಾರರ ಹಣವು ಸುರಕ್ಷಿತವಾರುತ್ತದೆ. ಎಲ್ಲ ರಾಜ್ಯ ಇಲಾಖೆಗಳು, ಸಾರ್ವಜನಿಕ ಮತ್ತು ನಾಗರಿಕ ಸಂಸ್ಥೆಗಳು, ಸ್ವಾಯತ್ತ ಸಂಸ್ಥೆಗಳು ಮುಂದಿನ ಎರಡು ವಾರಗಳಲ್ಲಿ ತಮ್ಮ ಖಾತೆಗಳನ್ನು ಖಾಸಗಿ ಬ್ಯಾಂಕುಗಳಿಂದ ಪಿಎಸ್‌ಬಿಗಳಿಗೆ ವರ್ಗಾಯಿಸುತ್ತವೆ ಎಂಬ ನಂಬಿಕೆ ಇದೆ ಎಂದು ಆರ್‌ಬಿಐ ಹೇಳಿದೆ.