ನವದೆಹಲಿ: ಕೋವಿಡ್ -19 ಜಾಗತಿಕ ಸಾಂಕ್ರಾಮಿಕ ರೋಗದಿಂದಾಗಿ ಜಾಗತಿಕ ವಿದೇಶಿ ನೇರ ಹೂಡಿಕೆ (ಎಫ್‌ಡಿಐ) 35ರಷ್ಟು ಕುಸಿದಿರುವ ಸಮಯದಲ್ಲಿ ಭಾರತದ ವಿದೇಶಿ ನೇರ ಹೂಡಿಕೆ 2020ರಲ್ಲಿ ಸುಮಾರು 27 ರಷ್ಟು ಹೆಚ್ಚಳವಾಗಿ 64 ಬಿಲಿಯನ್ ಡಾಲರ್‌ಗಳಿಗೆ ತಲುಪಿದೆ ಎಂದು ಯುನೈಟೆಡ್ ನೇಷನ್ಸ್ ಟ್ರೇಡಿಂಗ್ ಬಾಡಿ ಯುನೈಟೆಡ್ ನೇಷನ್ಸ್ ಕಾನ್ಫರೆನ್ಸ್ ಆನ್ ಟ್ರೇಡ್ ಅಂಡ್ ಡೆವಲಪ್ಮೆಂಟ್ (ಯುಎನ್‌ಸಿಟಿಎಡಿ) ವರದಿ ಮಾಡಿದೆ.
ಸೋಮವಾರ ಬಿಡುಗಡೆಯಾದ 2021ರ ಯುಎನ್‌ಸಿಟಿಎಡಿ ವಿಶ್ವ ಹೂಡಿಕೆ ವರದಿಯ ಪ್ರಕಾರ, ಏಷ್ಯಾದ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ವಿದೇಶಿ ನೇರ ಹೂಡಿಕೆ (ಎಫ್‌ಡಿಐ) ಹರಿವು ಶೇ 4ರಷ್ಟು ಹೆಚ್ಚಾಗಿದ್ದು, 2020ರಲ್ಲಿ 535 ಬಿಲಿಯನ್ ಡಾಲರ್‌ಗಳಿಗೆ ತಲುಪಿದೆ, ಇದು ಜಾಗತಿಕ ಎಫ್‌ಡಿಐ ಸಂಕೋಚನದ ಮಧ್ಯೆ ಸ್ಥಿತಿಸ್ಥಾಪಕತ್ವವನ್ನು ಪ್ರತಿಬಿಂಬಿಸುತ್ತದೆ ಎಂದು ವರದಿ ಮಾಡಿದೆ.
"ಸಾಂಕ್ರಾಮಿಕ ರೋಗದ ಹೊರತಾಗಿಯೂ, ಈ ಪ್ರದೇಶಕ್ಕೆ ಹೊರಗಿನಿಂದ ಬಂದ ಎಫ್‌ಡಿಐ 2020ರಲ್ಲಿ ಚೇತರಿಸಿಕೊಂಡಿತ್ತು. ಎಫ್‌ಡಿಐ ಬೆಳವಣಿಗೆಯನ್ನು ದಾಖಲಿಸುವ ಏಷ್ಯಾ, ಜಾಗತಿಕ ಒಳ ಮತ್ತು ಹೊರಗಿನ ಎಫ್‌ಡಿಐ ಹರಿವುಗಳಲ್ಲಿ ಅರ್ಧಕ್ಕಿಂತ ಹೆಚ್ಚಿನದನ್ನು ಹೊಂದಿದೆ" ಎಂದು ಯುಎನ್‌ಸಿಟಿಎಡಿ ಹೂಡಿಕೆ ಮತ್ತು ಉದ್ಯಮ ನಿರ್ದೇಶಕ ಜೇಮ್ಸ್ ಜಾನ್ ಹೇಳಿದ್ದಾರೆ.
"2021ರಲ್ಲಿ ಏಷ್ಯಾದ ಎಫ್‌ಡಿಐ ಭವಿಷ್ಯವು ಜಾಗತಿಕ ಸರಾಸರಿಗಿಂತ ಹೆಚ್ಚು ಅನುಕೂಲಕರವಾಗಿದೆ. ವ್ಯಾಪಾರ, ಉತ್ಪಾದನಾ ಚಟುವಟಿಕೆಗಳು ಮತ್ತು ಬಲವಾದ ಜಿಡಿಪಿ ಬೆಳವಣಿಗೆಯ ಮುನ್ಸೂಚನೆಯಿಂದಾಗಿ ಇದು ಸಂಭವಿಸಿದೆ" ಎಂದು ಅವರು ಹೇಳಿದರು.
"ಭಾರತದಲ್ಲಿ, ಐಸಿಟಿ ಮತ್ತು ನಿರ್ಮಾಣದಲ್ಲಿ ದೃಢವಾದ ಹೂಡಿಕೆ ಎಫ್‌ಡಿಐ ಒಳ ಹರಿವು ಹೆಚ್ಚಿಸಿದೆ. ಗಡಿಯಾಚೆಗಿನ ವಿಲೀನಗಳು ಮತ್ತು ಸ್ವಾಧೀನಗಳು ಶೇ83ರಷ್ಟು ಏರಿಕೆಯಾಗಿ 27 ಶತಕೋಟಿಗೆ ತಲುಪಿದ್ದು, ಐಸಿಟಿ, ಆರೋಗ್ಯ, ಮೂಲಸೌಕರ್ಯ ಮತ್ತು ಶಕ್ತಿಯನ್ನು ಒಳಗೊಂಡ ಪ್ರಮುಖ ಒಪ್ಪಂದಗಳನ್ನು ಒಳಗೊಂಡಿದೆ" ಎಂದು ಯುಎನ್‌ಸಿಟಿಎಡಿ ವಿಶ್ವ ಹೂಡಿಕೆ ವರದಿ ತಿಳಿಸಿದೆ.
ಭಾರತವು ಎಫ್‌ಡಿಐ ಒಳಹರಿವು ಸುಮಾರು ಶೇ27ರಷ್ಟು ಬೆಳವಣಿಗೆಯನ್ನು ದಾಖಲಿಸಿದ ಸಮಯದಲ್ಲಿ, ದಕ್ಷಿಣ ಏಷ್ಯಾದ ಇತರ ದೇಶಗಳಾದ ಪಾಕಿಸ್ತಾನ, ಬಾಂಗ್ಲಾದೇಶ ಮತ್ತು ಶ್ರೀಲಂಕಾ ಸಾಂಕ್ರಾಮಿಕ ಅವಧಿಯಲ್ಲಿ ವಿದೇಶಿ ನೇರ ಹೂಡಿಕೆಯ ಕುಸಿತವನ್ನು ದಾಖಲಿಸಿದೆ. ರಫ್ತು ಆಧಾರಿತ ಉಡುಪು ತಯಾರಿಕೆಯನ್ನು ಅವಲಂಬಿಸಿರುವ ದಕ್ಷಿಣ ಏಷ್ಯಾದ ಇತರ ಆರ್ಥಿಕತೆಗಳಲ್ಲಿ ಎಫ್‌ಡಿಐ ಕುಸಿದಿದೆ ಎಂದು ವರದಿ ತಿಳಿಸಿದೆ.
