ಮುಬೈ: ಈ ಬಾರಿ ವಿಶ್ವಕಪ್ ಇಂಗ್ಲೆಂಡ್ಗೆ ಸೇರಲಿದೆಯಾ? ಎಂಬ ಪ್ರಶ್ನೆಗೆ ಉತ್ತರಿಸಿದ ವಿಶ್ವ ಕ್ರಿಕೆಟ್ ಲೋಕದ ದಿಗ್ಗಜ ಸಚಿನ್ ತೆಂಡೂಲ್ಕರ್, ಈ ಬಾರಿ ಕಪ್ ನಮ್ದೆ ಎಂದು ಬಲವಾದ ವಿಶ್ವಾಸ ವ್ಯಕ್ತಪಡಿಸಿದ್ರು.
ಇಂದು ತಮ್ಮದೇ ಒಡೆತನದ ಮಿಡಲ್ಎಸೆಕ್ಸ್ ಕ್ರಿಕೆಟ್ ಅಕಾಡೆಮಿಯಲ್ಲಿ ನಡೆದ ತರಬೇತಿ ಕ್ಯಾಂಪ್ನಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿ, ವಿಶ್ವಕಪ್ ಇಂಗ್ಲೆಂಡ್ನಲ್ಲಿ ನಡೆಯುವುದರಿಂದ ಇಂಗ್ಲೆಂಡ್ ತಂಡ ಚಾಂಪಿಯನ್ ಆಗಬಹುದೇ ಎಂದ ಪ್ರಶ್ನೆ ಕೇಳಲಾಯಿತು. ಇದಕ್ಕೆ ಉತ್ತರಿಸಿದ ಸಚಿನ್, ಈ ಬಾರಿ ವಿಶ್ವಕಪ್ ಭಾರತಕ್ಕೆ ಬರಲಿದೆ, ಇದರಲ್ಲಿ ಯಾವುದೇ ಸಂದೇಹ ಬೇಡ ಎಂದು ನಗುಮುಖದಿಂದ ಉತ್ತರಿಸಿದ್ರು.
ಮೇ 30 ರಿಂದ ಇಂಗ್ಲೀಷರ ನಾಡಿನಲ್ಲಿ ನಡೆಯಲಿರುವ ವಿಶ್ವಕಪ್ ಎಲ್ಲಾ ತಂಡಗಳಿಗೂ ಚಾಲೆಂಜ್ ಆಗಲಿದೆ ಎಂಬ ಮಾತಿಗೆ ದನಿಗೂಡಿಸಿರುವ ಅವರು,, ನಮ್ಮ ತಂಡ ಕಳೆದ ಕೆಲವು ತಿಂಗಳಿನಿಂದ ಅತ್ಯುತ್ತಮ ಕ್ರಿಕೆಟ್ ಆಡುತ್ತಿದೆ. ಈ ವೇಳೆ ಎದುರಾಳಿ ತಂಡದ ಕೆಲವು ದೌರ್ಬಲ್ಯಗಳ ಜೊತೆಗೆ ತಂತ್ರಗಾರಿಕೆಗಳನ್ನು ಕಂಡುಕೊಂಡಿರುವುದರಿಂದ ವಿಶ್ವಕಪ್ನಂಥ ದೊಡ್ಡ ಸರಣಿಯಲ್ಲಿ ಅನುಕೂಲವಾಗಲಿದೆ ಎಂದರು.
ಬೇಸಿಗೆಯಲ್ಲಿ ಇಂಗ್ಲೆಂಡ್ ಪಿಚ್ಗಳು ತುಂಬಾ ಫ್ಲಾಟ್ ಅಗಿರಲಿದ್ದು, ಬ್ಯಾಟಿಂಗ್ ನಡೆಸಲು ತುಂಬಾ ಸುಲಭವಾಗಲಿದೆ. ಸೂರ್ಯಾಸ್ತದ ನಂತರ ಪಿಚ್‌ನಲ್ಲಿ ತೇವದ ಅಂಶ ಕಂಡುಬರುವ ಕಾರಣ ಚೆಂಡು ಸ್ವಿಂಗ್‌ ಆಗಬಹುದು. ಆದರೂ ಇದು ಹೆಚ್ಚು ಕಾಲ ನಡೆಯುವುದಿಲ್ಲ, ಕೇವಲ ಆರಂಭಿಕ ಓವರ್‌ಗಳಲ್ಲಿ ಮಾತ್ರವೇ ಚೆಂಡು ತಿರುವು ಪಡೆಯಲು ಸಾಧ್ಯವಾಗಿರುವುದರಿಂದ ಬೌಲರ್ಗಳಿಗಿಂತ ಬ್ಯಾಟ್ಸ್ಮನ್ಗಳೇ ಹೆಚ್ಚು ಮಿಂಚಲಿದ್ದಾರೆ. ಇದು ಕೂಡ ಭಾರತ ತಂಡಕ್ಕೆ ಹೆಚ್ಚು ಅನುಕೂಲ ಎಂದಿದ್ದಾರೆ.
ಜೊತೆಗೆ ಭಾರತ ತಂಡ ಕಳೆದ ವರ್ಷವಷ್ಟೇ ಇಂಗ್ಲೆಂಡ್ ವಿರುದ್ಧ ದೀರ್ಘ ಸರಣಿ ಆಡಿದೆ. ಎರಡು ಚಾಂಪಿಯನ್ ಟ್ರೋಫಿಯಲ್ಲಿ ಪಾಲ್ಗೊಂಡಿರುವ ಟೀಮ್ ಇಂಡಿಯಾ ಎರಡರಲ್ಲೂ ಫೈನಲ್ಗೆ ಪ್ರವೇಶ ಪಡೆದಿದೆ. ಒಂದು ಬಾರಿ ಚಾಂಪಿಯನ್, ಇನ್ನೊಮ್ಮೆ ರನ್ನರ್ ಆಫ್ ಕೂಡ ಅಗಿದೆ. ಈ ಸಂದರ್ಭದಲ್ಲಿ ಆಡಿದ ಆಟಗಾರರು ಕೂಡ ತಂಡದಲ್ಲೇ ಇರುವುದರಿಂದ ಈ ಸಲ ಕಪ್ ನಮ್ಮದೇ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ವಿಶ್ವಕಪ್ಗೂ ಮುನ್ನ ವಿರಾಟ್ ಕೊಹ್ಲಿ, ಹಾರ್ದಿಕ್ ಪಾಂಡ್ಯ, ಕೆ.ಎಲ್ ರಾಹುಲ್ ಹಾಗೂ ಧೋನಿ ಚುಟುಕು ಕ್ರಿಕೆಟ್ನಲ್ಲಿ ಉತ್ತಮ ಲಯದಲ್ಲಿರುವುದು ಕೂಡ ಭಾರತ ತಂಡಕ್ಕೆ ಹೆಚ್ಚು ಆತ್ಮ ವಿಶ್ವಾಸ ತಂದುಕೊಟ್ಟಿದೆ ಎಂದು ಅವರು ಇದೇ ವೇಳೆ ಹೇಳಿದರು.
