ಲಂಡನ್: ಸತತ ಎರಡು ವರ್ಷ ಅವಕಾಶಕ್ಕಾಗಿ ಚಾತಕ ಪಕ್ಷಿಯಂತೆ ಕಾದಿದ್ದ ಪ್ರತಿಭಾನ್ವಿತ ಯುವ ಬೌಲರ್ ಜೋಫ್ರಾ ಆರ್ಚರ್ರನ್ನು ವಿಶ್ವಕಪ್ಗೆ ಒಂದು ವಾರ ಎನ್ನವಾಗ ಆಯ್ಕೆ ಮಾಡಿದ್ದು, ಇದೀಗ ಅವರೇ ಇಂಗ್ಲೆಂಡ್ ತಂಡಕ್ಕೆ ಪ್ಲಸ್ ಪಾಯಿಂಟ್ ಆಗಿದ್ದಾರೆ.
ಜೋಫ್ರಾ ಆರ್ಚರ್ ದ.ಆಫ್ರಿಕಾ ವಿರುದ್ಧದ ವಿಶ್ವಕಪ್ ಉದ್ಘಾಟನಾ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ತೋರುವ ಮೂಲಕ ಇಂಗ್ಲೆಂಡ್ಗೆ ಭರ್ಜರಿ ಜಯ ತಂದುಕೊಡುವಲ್ಲಿ ಪ್ರಮುಖ ಪಾತ್ರವಹಿಸಿದ್ದರು, ಆದರೆ, ಅಚ್ಚರಿಯ ಸಂಗತಿಯೆಂದರೆ ಅವರನ್ನು ವಿಶ್ವಕಪ್ಗೆ ಆಯ್ಕೆ ಮಾಡಿದ 15 ಸದಸ್ಯರ ತಂಡದಲ್ಲಿ ಕೈಬಿಡಲಾಗಿತ್ತು. ಕೊನೆಯ ಹಂತದಲ್ಲಿ ಅನುಭವಿ ಡೇವಿಡ್ ವಿಲ್ಲೆಯನ್ನು ಕೈಬಿಟ್ಟು ಆರ್ಚರ್ಗೆ ಅವಕಾಶ ಕಲ್ಪಿಸಲಾಗಿತ್ತು.
ಇದೀಗ ಆರ್ಚರ್ ಇಂಗ್ಲೆಂಡ್ ಪಾಲಿಗೆ ಚಿನ್ನದ ಮೊಟ್ಟೆ ಇಡುವ ಕೋಳಿಯಾಗಿದ್ದಾರೆ. ಆಫ್ರಿಕಾ ತಂಡದ ಆಟಗಾರರೇ ಇವರ ಬೌಲಿಂಗ್ನಲ್ಲಿ ವಿಕೆಟ್ ಕಳೆದುಕೊಂಡರು, ಅನುಭವಿ ಹಾಶಿಮ್ ಆಮ್ಲ ಆರ್ಚರ್ ಎಸೆತವನ್ನು ಗಮನಿಸಲಾರದೇ ಹೆಲ್ಮೆಟ್ಗೆ ಬಡಿಸಿಕೊಂಡು ಮೈದಾನದಿಂದ ಹೊರ ನಡೆದರು. ಅನುಭವಿ ಪ್ಲೆಸಿಸ್ ಸಹಿತ ಉತ್ತಮವಾಗಿ ಆಡುತ್ತಿದ್ದ ಡಾಸ್ಸೆನ್ ಹಾಗೂ ಮ್ಯಾರ್ಕ್ರಮ್ ಕೂಡ ಆರ್ಚರ್ ಬೌಲಿಂಗ್ ನಲ್ಲಿ ವಿಕೆಟ್ ಒಪ್ಪಿಸಿದರು. 7 ಓವರ್ನಲ್ಲಿ ಒಂದು ಮೇಡನ್ ಸಹಿತ 3.86 ಎಕಾನಮಿಯಲ್ಲಿ ಬೌಲಿಂಗ್ ಮಾಡಿದ ಆರ್ಚರ್ 3 ವಿಕೆಟ್ ಪಡೆದು ಇಂಗ್ಲೆಂಡ್ ತಂಡಕ್ಕೆ ಗೆಲುವು ತಂದುಕೊಟ್ಟರು.
ಸ್ವಿಂಗ್,ಬೌನ್ಸ್ ಹಾಗೂ ಸ್ಲೋಬಾಲ್ ಎಸೆಯುವುದರಲ್ಲಿ ಪ್ರಾವಿಣ್ಯತೆ ಪಡೆದುಕೊಂಡಿರುವ ಆರ್ಚರ್ ಈ ಬಾರಿ ಇಂಗ್ಲೆಂಡ್ ತಂಡಕ್ಕೆ ಎಕ್ಸ್-ಫ್ಯಾಕ್ಟರ್ ಎಂದು ಕ್ರಿಕೆಟ್ ಪಂಡಿತರು ಲೆಕ್ಕಚಾರ ಹಾಕುತ್ತಿದ್ದಾರೆ.
