ಟೌಂಟನ್: ಸತತ ಎರಡು ಗೆಲುವಿನ ಅಲೆಯಲ್ಲಿ ತೇಲುತ್ತಿರುವ ನ್ಯೂಜಿಲ್ಯಾಂಡ್ ತಂಡ ಇಂದು ಕ್ರಿಕೆಟ್ ಶಿಶು ಅಫ್ಘಾನಿಸ್ಥಾನ ತಂಡವನ್ನು ತನ್ನ ಮೂರನೇ ಪಂದ್ಯದಲ್ಲಿ ಎದುರಿಸುತ್ತಿದೆ.
ಸತತ ಗೆಲುವಿನ ಅಲೆಯಲ್ಲಿ ತೇಲುತ್ತಿರುವ ಕಿವೀಸ್ ತನ್ನ ಆಲ್ರೌಂಡರ್ ಆಟದ ನೆರವಿನಿಂದ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಮ್ಯಾಟ್ ಹೆನ್ರಿ ,ಬೌಲ್ಟ್ ಕಳೆದೆರಡು ಪಂದ್ಯಗಳಲ್ಲಿ ಅದ್ಭುತ ಪ್ರದರ್ಶನ ತೋರುವ ಮೂಲಕ ಗೆಲುವು ಸಾಧಿಸಲು ನೆರವಾಗಿದ್ದರು. ಇನ್ನು ಬ್ಯಾಟಿಂಗ್ನಲ್ಲಿ ಸ್ಫೋಟಕ ಬ್ಯಾಟ್ಸ್ಮನ್ಗಳಾದ ಮನ್ರೊ, ಗಪ್ಟಿಲ್ ಜೊತೆಗೆ ರಾಸ್ ಟೇಲರ್, ವಿಲಿಯಮ್ಸನ್ ರಂತಹ ಅನುಭವಿಗಳು ತಂಡಕ್ಕೆ ಬಲ ತಂದಿದ್ದಾರೆ. ಇನ್ನು ನಿಶಾಮ್, ಗ್ರ್ಯಾಂಟ್ಹೋಮ್, ನೀಶಮ್ ಹಾಗೂ ಸ್ಯಾಂಟ್ನರ್ ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಎದುರಾಳಿಗಳಿಗೆ ಕಂಟಕವಾಗುವಂತಹ ಆಟಗಾರರಾಗಿರುವುದರಿಂದ ಅಫ್ಘಾನ್ ವಿರುದ್ದ ಸುಲಭ ಜಯ ಸಾಧಿಸುವ ಆಲೋಚನೆಯಲ್ಲಿದೆ.
ಇನ್ನು ತನ್ನ ಎರಡೂ ಪಂದ್ಯಗಳಲ್ಲೂ ಸೋಲನುಭವಿಸಿರುವ ಅಫ್ಘಾನ್ ತನ್ನ ಮೊದಲ ಜಯಕ್ಕಾಗಿ ಹಾತೊರೆಯುತ್ತಿದೆ. ಸ್ಪಿನ್ ಬೌಲಿಂಗ್ ವಿಭಾಗ ಅಫ್ಘಾನ್ ತಂಡದ ಜೀವಾಳವಾಗಿದೆ. ರಶೀದ್ ಖಾನ್, ಮುಜೀಬ್ ಹಾಗೂ ಮೊಹಮ್ಮದ್ ನಬಿ ಅತ್ಯುತ್ತಮ ಪ್ರದರ್ಶನ ನೀಡುತ್ತಿರುವುದರಿಂದ ಕಿವೀಸ್ಗೆ ಟಕ್ಕರ್ ಕೊಡಬಹುದೆಂಬ ಲೆಕ್ಕಾಚಾರ ಕ್ರೀಡಾವಲಯದಲ್ಲಿ ಚರ್ಚೆಯಾಗುತ್ತಿದೆ. ವಿಕೆಟ್ ಕೀಪರ್ ಮೊಹಮ್ಮದ್ ಶಹ್ಜಾದ್ ಗಾಯಗೊಂಡಿರುವುದು ತಂಡಕ್ಕೆ ದೊಡ್ಡ ಆಘಾತವನ್ನುಂಟು ಮಾಡಿದೆ. ಶಹ್ಜಾದ್ ಬದಲು ಇಕ್ರಂ ಅಲಿ ಖಿಲ್ ತಂಡ ಸೇರಿಕೊಂಡಿದ್ದಾರೆ.
ಮುಖಾಮುಖಿ:
ಎರಡು ತಂಡಗಳು ಒಮ್ಮೆ 2015 ರ ವಿಶ್ವಕಪ್ನಲ್ಲಿ ಮಾತ್ರ ಮುಖಾಮುಖಿಯಾಗಿದ್ದು, ನ್ಯೂಜಿಲ್ಯಾಂಡ್ ತಂಡ 6 ವಿಕೆಟ್ಗಳ ಜಯ ಸಾಧಿಸಿತ್ತು.
ಅಫ್ಘಾನಿಸ್ತಾನ:
ಗುಲ್ಬದಿನ್ ನೈಬ್(ನಾಯಕ), ಇಕ್ರಂ ಅಲಿ ಖಿಲ್ (ವಿ.ಕೀ), ರಶೀದ್ ಖಾನ್, ಹಜರತುಲ್ಹಾ ಝಾಝೈ, ರೆಹ್ಮತ್ ಶಾ, ಹಶ್ಮತುಲ್ಹಾ ಶಾಹಿದಿ, ನಜೀಬುಲ್ಹಾ ಜಾಡ್ರನ್, ಮೊಹಮ್ಮದ್ ನಬಿ, ದವ್ಲಾತ್ ಝಾರ್ಡನ್, ಹಮೀದ್ ಹಸ್ಸನ್, ಮೂಜೀಬ್ ಉರ್ ರೆಹ್ಮಾನ್.
ನ್ಯೂಜಿಲೆಂಡ್:
ಕೇನ್ ವಿಲಿಯಮ್ಸನ್ (ನಾಯಕ), ಟ್ರೆಂಟ್ ಬೌಲ್ಟ್, ಕಾಲಿನ್ ಡಿ ಗ್ರ್ಯಾಂಡ್ಹೋಮ್, ಲೂಕಿ ಫರ್ಗ್ಯುಸನ್, ಮಾರ್ಟಿನ್ ಗಪ್ಟಿಲ್, ಮ್ಯಾಟ್ ಹೆನ್ರಿ, ಟಾಮ್ ಲ್ಯಾಥಮ್, ಕಾಲಿನ್ ಮನ್ರೊ, ಜಿಮ್ಮಿ ನಿಶಾಮ್, ಮಿಚೆಲ್ ಸ್ಯಾಂಟ್ನರ್, ರಾಸ್ ಟೇಲರ್.
