ನವದೆಹಲಿ: ಏಳು ಹಂತದಲ್ಲಿ ನಡೆದ ಲೋಕಸಭಾ ಚುನಾವಣೆಗೆ ಅಧಿಕೃತ ತೆರೆಬಿದ್ದಿದ್ದು ಚುನಾವಣಾ ಆಯೋಗ ಒಟ್ಟಾರೆ ಶೇಕಡಾವಾರು ಮತದಾನದ ಅಂಕಿ-ಅಂಶ ತೆರೆದಿಟ್ಟಿದೆ.
ಹದಿನೇಳನೇ ಲೋಕಸಭಾ ಚುನಾವಣೆಯಲ್ಲಿ ಮತದಾನದ ವಿಚಾರದಲ್ಲಿ ಈ ಹಿಂದಿನ ಎಲ್ಲ ದಾಖಲೆಗಳು ಬ್ರೇಕ್ ಆಗಿವೆ. ಏಳು ಹಂತದಲ್ಲಿ ಒಟ್ಟಾರೆ ಶೇ.67.11ರಷ್ಟು ವೋಟಿಂಗ್ ನಡೆದಿದೆ ಎಂದು ಚುನಾವಣಾ ಆಯೋಗ ಅಧಿಕೃತವಾಗಿ ತಿಳಿಸಿದೆ.
2009ರಲ್ಲಿ ಶೇ.56.90ರಷ್ಟು ವೋಟಿಂಗ್ ನಡೆದಿತ್ತು. 2014ರಲ್ಲಿ ಲೋಕಸಭಾ ಚುನಾವಣೆಯಲ್ಲಿ ಶೇ.66.40ರಷ್ಟು ಮತದಾನ ನಡೆದಿತ್ತು. ಈ ಬಾರಿ ಈ ಪ್ರಮಾಣ ಕೊಂಚ ಏರಿಕೆಯಾಗಿದ್ದು ಆಯೋಗ ತುಸು ನೆಮ್ಮದಿ ನೀಡಿದೆ. ಮತದಾನದ ಪ್ರಮಾಣ ಹೆಚ್ಚಳಕ್ಕೆ ಆಯೋಗ ವಿವಿಧ ರೀತಿಯಲ್ಲಿ ಪ್ರಚಾರ ನಡೆಸಿತ್ತು.
ಹೆಚ್ಚಿನ ಓದಿಗಾಗಿ:
ಚುನಾವಣೆ ಮುಕ್ತಾಯ... ಸದ್ದಿಲ್ಲದೆ ಪ್ರಸಾರ ನಿಲ್ಲಿಸಿದ ನಮೋ ಟಿವಿ..!
2014ರಲ್ಲಿ 83.40 ಕೋಟಿ ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದರು. ಈ ಬಾರಿ 90.99 ಕೋಟಿ ಮತದಾರರು ಮತ ಚಲಾಯಿಸಿದ್ದಾರೆ.
542 ಕ್ಷೇತ್ರಗಳಿಗೆ ಏಪ್ರಿಲ್ 11ರಿಂದ ಮೇ 19ರ ಅವಧಿಯಲ್ಲಿ ಏಳು ಹಂತದಲ್ಲಿ ಮತದಾನ ನಡೆದಿತ್ತು. ಭಾರಿ ಪ್ರಮಾಣದ ಹಣ ಪತ್ತೆಯಾದ ಹಿನ್ನೆಲೆಯಲ್ಲಿ ತಮಿಳುನಾಡಿನ ವೆಲ್ಲೂರು ಕ್ಷೇತ್ರದ ಚುನಾವಣೆಯಲ್ಲಿ ಆಯೋಗ ಮುಂದೂಡಿದೆ. ವೆಲ್ಲೂರು ಕ್ಷೇತ್ರದ ಚುನಾವಣಾ ದಿನಾಂಕವನ್ನು ಚುನಾವಣಾ ಆಯೋಗ ಇನ್ನೂ ಅಂತಿಮಗೊಳಿಸಿಲ್ಲ.
