ನವದೆಹಲಿ: 'ಅವೇಕ್ ಕ್ಯಾನಿಯೊಟಮಿ' ಅಂದರೆ, ರೋಗಿಗೆ ಎಚ್ಚರದ ಜಾಗೃತಾವಸ್ಥೆಯಲ್ಲಿಯೇ ನಡೆಸಬೇಕಾದ ಶಸ್ತ್ರಚಿಕಿತ್ಸೆ. ಮೆದುಳಿನ ನರಗಳ ಕಾರ್ಯಾಚರಣೆ ನಿಂತಲ್ಲಿ ಈ ಶಸ್ತ್ರಚಿಕಿತ್ಸೆಗೆ ಅಡ್ಡಿ ಉಂಟಾಗುತ್ತದೆ. ಹೀಗಾಗಿ ಪೂರ್ಣವಾಗಿ ಆಪರೇಷನ್ ಮುಗಿಯುವವರೆಗೂ ರೋಗಿ ಎಚ್ಚರದಿಂದಲೇ ಇರಬೇಕು. ಇಂತಹ ಪ್ರಕರಣಗಳಲ್ಲಿ ಅರಿವಳಿಕೆ ನೀಡುವುದೂ ಸವಾಲಿನ ವಿಷಯವಾಗಿರುತ್ತದೆ. ಆದರೆ 5 ವರ್ಷದ ಪುಟ್ಟ ಬಾಲಕಿಗೆ ಇಂತಹದ್ದೊಂದು ಶಸ್ತ್ರಚಿಕಿತ್ಸೆಯನ್ನು ವೈದ್ಯರು ಯಶಸ್ವಿಯಾಗಿ ನಡೆಸಿದ್ದಾರೆ.
ದೆಹಲಿಯ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ(ಏಮ್ಸ್) ವೈದ್ಯರ ತಂಡ ಕಠಿಣ ಮತ್ತು ವಿಶೇಷವಾದ ಶಸ್ತ್ರಚಿಕಿತ್ಸೆ ನಡೆಸಿದ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಬಾಲಕಿಗೆ ಜಾಗೃತಾವಸ್ಥೆಯಲ್ಲಿ ಬ್ರೈನ್ ಟ್ಯೂಮರ್ (ಮೆದುಳಿನಲ್ಲಿ ಉಂಟಾಗುವ ಗೆಡ್ಡೆ) ಆಪರೇಷನ್ ನಡೆಸಿದ್ದಾರೆ. ಈ ರೀತಿಯ ಚಿಕಿತ್ಸೆಗೊಳಗಾದ ವಿಶ್ವದ ಅತಿ ಚಿಕ್ಕ ವಯಸ್ಸಿನ ರೋಗಿ ಈಕೆ ಎಂಬುದು ಕುತೂಹಲದ ಸಂಗತಿ.
ಮೆದುಳಿನ ಎಡಭಾಗದಲ್ಲಿ ಕಂಡುಬಂದಿದ್ದ ಪೆರಿಸಿಲ್ವಿಯನ್ ಇಂಟ್ರಾಕ್ಸಿಯಲ್ ಬ್ರೈನ್ ಟ್ಯೂಮರ್‌ಗೆ, ಅವೇಕ್ ಕ್ರ್ಯಾನಿಯೊಟಮಿ (ಪ್ರಜ್ಞಾವಸ್ಥೆಯಲ್ಲಿ ಶಸ್ತ್ರಚಿಕಿತ್ಸೆ) ತಂತ್ರ ಬಳಸಿ ಜನವರಿ 4ರಂದು ಆಪರೇಷನ್ ಮಾಡಲಾಗಿದೆ. ಅರಿವಳಿಕೆ ನೀಡಲು ತೆಗೆದುಕೊಂಡ ಸಮಯವೂ ಸೇರಿ ಮೂರು ಗಂಟೆಗಳಲ್ಲಿ ಗೆಡ್ಡೆಯನ್ನು ಯಶಸ್ವಿಯಾಗಿ ತೆಗೆದುಹಾಕಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ಎಂಆರ್ಐ ನಡೆಸಿದಾಗ ಮೆದುಳಿನಲ್ಲಿ ಬಾಲಕಿಯ ಎಡಭಾಗದ ಮೆದುಳಿನಲ್ಲಿ ಗೆಡ್ಡೆ ಇರುವುದು ಕಂಡುಬಂದಿತ್ತು. ಶಸ್ತ್ರಚಿಕಿತ್ಸೆ ನಡೆಸುವುದು ಅನಿವಾರ್ಯವಾಗಿತ್ತು. ಆದರೆ, ಬಾಲಕಿಗೆ ಇಂತಹ ಕಠಿಣ ಶಸ್ತ್ರಚಿಕಿತ್ಸೆ ನಡೆಸುವುದು ಸವಾಲಾಗಿತ್ತು. ಮೊದಲು ಬಾಲಕಿ ಮತ್ತು ಆಕೆಯ ಪೋಷಕರೊಂದಿಗೆ ಸುದೀರ್ಘ ಚರ್ಚೆ ನಡೆಸಿ, ಒಪ್ಪಿಗೆ ಪಡೆದ ಬಳಿಕ ಈ ಆಪರೇಷನ್ ನಡೆಸಲಾಗಿದೆ ಎಂದು ವೈದ್ಯರು ಹೇಳಿದ್ದಾರೆ.
ಸವಾಲೇಕೆ?: ಪುಟ್ಟ ಬಾಲಕಿಗೆ ಈ ಆಪರೇಷನ್ ಮಾಡುವುದು ಸವಾಲಾಗಿತ್ತು. ಆಕೆ ಎಚ್ಚರವಾಗಿರಲು ಹಲವಾರು ಆಟಿಕೆಗಳು, ಪ್ರಾಣಿಗಳ ಚಿತ್ರಗಳನ್ನು ತೋರಿಸಲಾಯಿತು. 1 ತರಗತಿ ಓದುತ್ತಿರುವ ಆಕೆಯ ಆರೋಗ್ಯ ಸದ್ಯ ಉತ್ತಮ ಸ್ಥಿತಿಯಲ್ಲಿದೆ ಎಂದು ಏಮ್ಸ್ನ ನರಶಸ್ತ್ರಚಿಕಿತ್ಸೆ ಪ್ರಾಧ್ಯಾಪಕ ಡಾ.ದೀಪಕ್ ಗುಪ್ತಾ ತಿಳಿಸಿದರು.
ಡಾ.ಮಿಹಿರ್ ಪಾಂಡಿಯಾ ಮತ್ತು ಡಾ.ಜ್ಞಾನೇಂದ್ರ ಪಾಲ್ ಸಿಂಗ್ ನೇತೃತ್ವದಲ್ಲಿ ಈ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ. ದೆಹಲಿ ಏಮ್ಸ್‌ನಲ್ಲಿ ಪುಟ್ಟ ಬಾಲಕಿಯೊಬ್ಬಳಿಗೆ ಜಾಗೃತಾವಸ್ಥೆಯಲ್ಲೇ ಯಶಸ್ವಿ ಬ್ರೈನ್ ಟ್ಯೂಮರ್ ಶಸ್ತ್ರಚಿಕಿತ್ಸೆ ನಡೆಸಿರುವುದು ವಿಶ್ವದಲ್ಲೇ ಇದು ಮೊದಲ ಪ್ರಕರಣ. ಮಗು ಇದೀಗ ಪ್ರಧಾನಿ ನರೇಂದ್ರ ಮೋದಿ ಅವರ ಚಿತ್ರವನ್ನು ಥಟ್ಟನೆ ಗುರುತಿಸಬಲ್ಲಳು. ಇನ್ನು ಮುಂದೆ ಆಕೆಗೆ ಈ ಸಮಸ್ಯೆ ಬಾಧಿಸದು ಎಂದು ಡಾ.ಗುಪ್ತಾ ಹೇಳಿದರು.
ಇದನ್ನೂ ಓದಿ: ಜ.22ರಂದು ಅಯೋಧ್ಯೆಯ 'ರಾಮಲಲ್ಲಾ' ಮೂರ್ತಿ ಪ್ರಾಣ ಪ್ರತಿಷ್ಠಾಪನೆ: ಅದೇ ದಿನದಂದು ಹೆರಿಗೆಗೆ ಗರ್ಭಿಣಿಯರ ಬಯಕೆ!
