ಕಂಕೇರ್: ಛತ್ತೀಸ್ಗಢದಲ್ಲಿ ಒಂದೆಡೆ ನಕ್ಸಲರ ಹಾವಳಿ, ಮತ್ತೊಂದೆಡೆ ಆನೆಗಳ ದಾಳಿ.. ನಕ್ಸಲರಿಂದ ರಕ್ಷಣೆ ಪಡೆಯಬೇಕೋ, ಆನೆಗಳಿಂದ ಜೀವ ಉಳಿಸಿಕೊಳ್ಳಬೇಕೋ ಎಂಬ ಗೊಂದಲದಲ್ಲಿರುವ ಜನರು, ತಾವಾಗಿಯೇ ಬಂದು ಜೈಲಿಗೆ ಸೇರುತ್ತಿದ್ದಾರೆ. ಹೌದು, ಜಿಲ್ಲೆಯ ಭಾನುಪ್ರತಾಪಪುರ ಬ್ಲಾಕ್ನಲ್ಲಿ ಕಾಡಾನೆಗಳ ಹಾವಳಿ ಜೋರಾಗಿದ್ದು, ದಿಕ್ಕುತೋಚದ ಜನ ಜೈಲಿನಲ್ಲಿ ರಕ್ಷಣೆ ಪಡೆಯುತ್ತಿದ್ದಾರೆ.
ಭಾನುಪ್ರತಾಪಪುರ ಠಾಣೆಯಲ್ಲಿ ನೂತನ ಜೈಲು ನಿರ್ಮಿಸಲಾಗಿದೆ. ಆನೆಗಳ ಕಾಟಕ್ಕೆ ಬೇಸತ್ತ 400ಕ್ಕೂ ಅಧಿಕ ಸಾರ್ವಜನಿಕರು ಹಗಲಿರುಳು ಎನ್ನದೇ ನಡೆದು ಜೈಲಿಗೆ ಬಂದು ಸೇರುತ್ತಿದ್ದಾರೆ. ಕಳೆದ 15 ದಿನಗಳಿಂದ ಭಾನುಪ್ರತಾಪಪುರದಿಂದ 10 ಕಿ.ಮೀ ದೂರದಲ್ಲಿರುವ ಪಿಚೆಟ್ಟಾದಲ್ಲಿ 30 ಆನೆಗಳ ಗುಂಪೊಂದು ಅಡ್ಡಾಡುತ್ತಿದೆ. ಹಗಲು ಹೊತ್ತಲ್ಲಿ ಕಾಡಲ್ಲಿ ವಿಶ್ರಾಂತಿ ಪಡೆಯುವ ಗಜಪಡೆ ರಾತ್ರಿಯಾಗುತ್ತಿದ್ದಂತೆ ಹಳ್ಳಿಗಳಿಗೆ ಎಂಟ್ರಿ ಕೊಡುತ್ತವೆ.
ಈಗಾಗಲೇ ಜಶ್ಪುರದಲ್ಲಿ ಆನೆ ದಾಳಿಯಿಂದ ಇಬ್ಬರು ಗ್ರಾಮಸ್ಥರು ಮೃತಪಟ್ಟಿದ್ದು, ಓರ್ವ ಬಾಲಕಿ ಸ್ಥಿತಿ ಗಂಭೀರವಾಗಿದೆ. ಗರ್ಭಿಣಿಯರು, ಬಾಣಂತಿಯರು, ವೃದ್ಧರು, ಮಕ್ಕಳನ್ನೆದೇ ಎಲ್ಲರೂ ಹೋಗಿ ಜೈಲಿನಲ್ಲಿ ಆಶ್ರಯಪಡುತ್ತಿದ್ದಾರೆ. ಆನೆಗಳಿಗೆ ಹೆದರಿ ಹೊಲಗಳಿಗೆ ತೆರಳಲು ಸಾಧ್ಯವಾಗುತ್ತಿಲ್ಲ. ಬೆಳೆ ಬೆಳೆಯಲು ಸಾಧ್ಯವಾಗುತ್ತಿಲ್ಲ ಎಂದು ಮಹಿಳೆ ಕಣ್ಣೀರು ಹಾಕಿದರೆ, ಮಕ್ಕಳಿಗೆ ಸರಿಯಾದ ಆಹಾರ ಸಿಗುತ್ತಿಲ್ಲ ಎಂದು ಮಹಿಳೆ ಗೋಗರೆಯುತ್ತಾಳೆ.
'ಆನೆಗಳನ್ನು ಓಡಿಸುವುದು ಕಷ್ಟಕರ’
ಇಷ್ಟು ದೊಡ್ಡ ಗಜಪಡೆ ನೋಡಿ ಅರಣ್ಯ ಇಲಾಖೆ ಸಿಬ್ಬಂದಿ ಕೂಡ ಬೆಚ್ಚಿಬಿದ್ದಿದ್ದಾರೆ. ಆನೆಗಳನ್ನು ಓಡಿಸುವುದಾ? ಅಥವಾ ಜನರ ಪ್ರಾಣವನ್ನು ಕಾಪಾಡುವುದಾ? ಎಂದು ಸಿಬ್ಬಂದಿ ಗೊಂದಲಕ್ಕೀಡಾಗಿದ್ದಾರೆ. ಅದಕ್ಕಾಗಿಯೇ, ಜನರಿಗೆ ಜೈಲಿನಲ್ಲಿ ವಾಸ್ತವ್ಯ ಹೂಡಲು ಅನುವು ಮಾಡಿಕೊಟ್ಟಿದ್ದೇವೆ. ಆನೆಗಳಿಂದ ಗ್ರಾಮಸ್ಥರಿಗೆ ಆಗಿರುವ ಹಾನಿಗೆ ಪರಿಹಾರ ಒದಗಿಸಿಕೊಡಲಾಗುವುದು ಎಂದು ಡಿಎಫ್ಒ ಮನೀಶ್ ಕಶ್ಯಪ್ ತಿಳಿಸಿದ್ದಾರೆ.
ಇದನ್ನೂ ಓದಿ:ಕಾಡಿನಿಂದ ಬಂದು ಬಾವಿಯೊಳಗೆ ಬಿದ್ದ ಕಾಡಾನೆ ಮರಿ.. ರಕ್ಷಣೆ ಮಾಡಿದ ಅರಣ್ಯ ಸಿಬ್ಬಂದಿ
