ಮುಂಬೈ: ಕಿಡ್ನಿ ವೈಫಲ್ಯದಿಂದ ಕಳೆದ ವಾರ ಗೋರೆಗಾಂವ್‌ನ ಲೈಫ್‌ಲೈನ್ ಆಸ್ಪತ್ರೆಗೆ ದಾಖಲಾಗಿದ್ದ ಭಾರತೀಯ ಚಿತ್ರರಂಗದ ಹಿರಿಯ ನಟ ಅನುಪಮ್ ಶ್ಯಾಂ (63) ಇಂದು ನಸುಕಿನ ಜಾವ ನಿಧನರಾಗಿದ್ದಾರೆ. ಈ ಬಗ್ಗೆ ಅವರ ಆಪ್ತ ಮೂಲಗಳು ಮಾಹಿತಿ ನೀಡಿವೆ.
'ಮನ್ ಕೀ ಆವಾಜ್: ಪ್ರತಿಜ್ಞಾ', 'ಸ್ಲಮ್‌ಡಾಗ್ ಮಿಲಿಯನೇರ್' ಮತ್ತು 'ಬ್ಯಾಂಡಿಟ್ ಕ್ವೀನ್'ನಂತಹ ಜನಪ್ರಿಯ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದ ಇವರು ಅನೇಕ ಪ್ರಶಸ್ತಿಗಳ ಗೌರವಕ್ಕೆ ಪಾತ್ರರಾಗಿದ್ದರು.
ಅನುಪಮ್ ಶ್ಯಾಂ ನಿಧನದ ಬಗ್ಗೆ ಮಾತನಾಡಿದ ಆಪ್ತ ಯಶ್ಪಾಲ್ ಶರ್ಮಾ, '40 ನಿಮಿಷಗಳ ಹಿಂದೆ ಶ್ಯಾಂ ಸಾವಿನ ಬಗ್ಗೆ ವೈದ್ಯರು ನಮಗೆ ಮಾಹಿತಿ ನೀಡಿದರು. ಅವರ ಮೃತದೇಹ ಆಸ್ಪತ್ರೆಯಲ್ಲಿದ್ದು, ಬೆಳಗ್ಗೆ ಎಂಎಚ್ಎಡಿಎ ಕಾಲೋನಿಯಲ್ಲಿರುವ ನ್ಯೂ ದಿಂಡೋಶಿ ನಿವಾಸಕ್ಕೆ ತರಲಾಗುವುದು. ಅಂತ್ಯಕ್ರಿಯೆ ನಾಳೆ ನೆರವೇರಲಿದೆ" ಎಂದರು.
ಸುಮಾರು ಮೂರು ದಶಕಗಳ ಸುದೀರ್ಘ ಸಿನಿ ಜೀವನದಲ್ಲಿ ಶ್ಯಾಂ ಜನಪ್ರಿಯ ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ಅವುಗಳಲ್ಲಿ ಸತ್ಯ, ದಿಲ್ ಸೇ, ಲಗಾನ್, ಹಜಾರೊನ್ ಕ್ವಾಯಿಶೇನ್ ಏಸಿ ಮತ್ತು ಮನ್ ಕೀ ಆವಾಜ್ ಪ್ರತಿಜ್ಞಾ ಸಿನಿಮಾಗಳು ಸೇರಿವೆ.
ಕಳೆದ ವರ್ಷ ಅನುಪಮ್ ಅವರ ಸಹೋದರ ಅನುರಾಗ್, "ಶ್ಯಾಮ್ ಡಯಾಲಿಸಿಸ್‌ಗೆ ಒಳಗಾಗಿದ್ದಾರೆ. ಅವರನ್ನು ಗೋರೆಗಾಂವ್ ಆಸ್ಪತ್ರೆಗೆ ವರ್ಗಾಯಿಸಲಾಗಿದೆ" ಎಂದು ತಿಳಿಸಿದ್ದರು. ಅಷ್ಟೇ ಅಲ್ಲದೆ, ಚಿಕಿತ್ಸೆ ವೆಚ್ಚ ಭರಿಸುವಂತೆ ಚಿತ್ರರಂಗದ ಬಳಿ ಸಹಾಯ ಕೋರಿದ್ದರು.
