ಇಂದು ಪ್ರೇಮಿಗಳ ದಿನ. ಆದರೆ ಪ್ರೇಮ ಎಂದರೆ ಒಂದು ದಿನದ ಸಂಭ್ರಮವಲ್ಲ, ಪ್ರೇಮವನ್ನು ಪ್ರತಿದಿನ, ಪ್ರತಿಕ್ಷಣ ಅನುಭವಿಸಬೇಕು. ಒಂದು ದಿನದ ಆಚರಣೆಯ ಪ್ರೀತಿ–ಪ್ರೇಮಕ್ಕೆಲ್ಲ ಅರ್ಥವಿಲ್ಲ ಎಂದು ಹೇಳುವವರೂ ನಮ್ಮ ನಡುವೆ ಇದ್ದಾರೆ. ಪ್ರೇಮಿಗಳ ದಿನದ ಆಚರಣೆಯ ಬಗ್ಗೆ ಇಂದಿಗೂ ದ್ವಂದ್ವವಿದೆ. ಪ್ರೇಮಿಗಳ ದಿನಾಚರಣೆಯನ್ನು ವಿರೋಧಿಸುವವರ ಪ್ರಕಾರ ಈ ದಿನದ ಆಚರಣೆಗೆ ಅರ್ಥವಿಲ್ಲ. ಆದರೆ ಪ್ರೇಮಿಗಳ ಪ್ರಕಾರ ಈ ದಿನ ಅವರಿಗೆ ಪ್ರಮುಖವಾಗಿದೆ. ಅದೇನೇ ಬೇಕು ಬೇಡಗಳಿದ್ದರೂ ಪ್ರೇಮಿಗಳ ದಿನದ ಸಂಭ್ರಮ ಮಾತ್ರ ಎಂದಿಗೂ ಮಾಸಿಲ್ಲ. ಪ್ರೀತಿಯ ಬಗ್ಗೆ ಹಿಂದೂ ಸಂಪ್ರದಾಯಗಳಲ್ಲಿ, ದೈವಿಕ ದಂಪತಿಗಳ ಅನೇಕ ಕಥೆಗಳಿವೆ. ಪ್ರೀತಿಯ ಆದರ್ಶವನ್ನು ಸಾಕಾರಗೊಳಿಸುವ ದೇವತೆಗಳು ಮತ್ತು ಅವರ ಕಥೆಗಳು ನಮಗೆ ಆದರ್ಶ. ಪ್ರೀತಿ ಎಂದರೆ ಶತಮಾನಗಳಿಂದ ಹಿಂದೂ ಭಕ್ತರ ಕಲ್ಪನೆಯನ್ನು ವಿಶೇಷವಾಗಿ ಉಳಿಸಿಕೊಂಡಿರುವ ಒಂದು ಜೋಡಿ ರಾಧಾ ಮತ್ತು ಕೃಷ್ಣ.
ವಿಭಿನ್ನ ಪ್ರೇಮಕಥೆ: ರಾಧಾ ಕೃಷ್ಣ ಪ್ರೀತಿ ಕಥೆ ಸಾಕಷ್ಟು ಜನರಿಗೆ ತಿಳಿದಿರಬಹುದು. ರಾಧಾ-ಕೃಷ್ಣರ ಪ್ರೀತಿ ಎಷ್ಟು ಬಲವಾಗಿತ್ತೆಂದರೆ ಎಲ್ಲಾದರು ಕೃಷ್ಣನಿಗೆ ಏಟಾದರೆ ಅದನ್ನು ಶ್ರೀಕೃಷ್ಣ ತನ್ನ ರಾಧೆಗೆ ಏನೋ ಚಿಂತೆಯಲ್ಲಿದ್ದಾಳೆ, ಸಂಕಷ್ಟದಲ್ಲಿದ್ದಾಳೆಂದು ಭಾವಿಸುತ್ತಿದ್ದನಂತೆ. ಪುರಾಣಗಳಲ್ಲಿ ರಾಧೆಯು ಶ್ರೀಕೃಷ್ಣನ ಶಾಶ್ವತ ಸಂಗಾತಿಯೆಂದು ಕರೆಯಲಾಗುತ್ತಿತ್ತು. ಆಧುನಿಕ ಜಗತ್ತಿನ ಪ್ರೀತಿ-ಪ್ರೇಮಕ್ಕಿಂತಲೂ ರಾಧಕೃಷ್ಣರ ಪ್ರೀತಿ ತುಂಬಾನೇ ವಿಭಿನ್ನವಾಗಿದೆ ಹಾಗೂ ರೋಚಕವಾಗಿದೆ. ಇವರಿಬ್ಬರ ಪ್ರೀತಿ ಕಥೆ ಎಂತವರನ್ನಾದರೂ ಕೂಡ ಪ್ರೀತಿಯಲ್ಲಿ ಬೀಳುವಂತೆ ಮಾಡುತ್ತದೆ.
ಕೃಷ್ಣ ಯಾರು?: ರಾಧಾ ಮತ್ತು ಕೃಷ್ಣನ ಕಥೆಯು ಭಾಗವತ ಪುರಾಣದಲ್ಲಿ ಮೊದಲ ಬಾರಿಗೆ ಕಂಡು ಬರುತ್ತದೆ. ಪೂರ್ವ ಭಾರತದಲ್ಲಿ 12ನೇ ಶತಮಾನದಲ್ಲಿದ್ದ ಜಯದೇವ ಬರೆದ "ಗೀತಗೋವಿಂದ" ಎಂಬ ಸಂಸ್ಕೃತ ಕಾವ್ಯದಲ್ಲಿ ಅವರ ಕಥೆಯನ್ನು ಮತ್ತಷ್ಟು ವಿವರಿಸಲಾಗಿದೆ. ಕೃಷ್ಣ ಅತ್ಯಂತ ಜನಪ್ರಿಯ ಮತ್ತು ಪ್ರೀತಿಯ ಹಿಂದೂ ದೇವತೆ. ವಿಷ್ಣುವಿನ ಅವತಾರ ಅಥವಾ ಸ್ವತಃ ಪರಮಾತ್ಮನೆಂದು ಪರಿಗಣಿಸಲಾಗಿದೆ. ಹಿಂದೂ ನಂಬಿಕೆಯಲ್ಲಿ, ವಿಷ್ಣುವು ಬ್ರಹ್ಮಾಂಡವನ್ನು ಸಂರಕ್ಷಿಸುತ್ತಾನೆ. ಆಗಾಗ ಕೆಲವು ತಪ್ಪನ್ನು ಸರಿಪಡಿಸಲು ಐಹಿಕ ರೂಪವನ್ನು ಪಡೆಯುವ ಮೂಲಕ ಜಗತ್ತನ್ನು ರಕ್ಷಿಸಿದನು ಎಂದು ಹೇಳಲಾಗಿದೆ.
ಕೃಷ್ಣನ ಜೀವನ ಕಥೆ ರೋಚಕವಾಗಿದೆ. ಸಾಹಸ ಮತ್ತು ದುರಂತದಿಂದ ಕೂಡಿದೆ. ಕೃಷ್ಣ ಜನಿಸಿದಾಗ, ಅವನ ಸೋದರ ಮಾವ ಕಂಸ ಎಂಬ ರಾಜ ಕೊಲ್ಲಲು ಆದೇಶಿಸುತ್ತಾನೆ. ಭವಿಷ್ಯ ವಾಣಿಯು ಇದಕ್ಕೆ ಕಾರಣವಾಗಿತ್ತು. ಆದರೆ ರಾಜಮನೆತನದಲ್ಲಿ ಜನಿಸಿದ ಕೃಷ್ಣ ಸಾವಿನಿಂದ ಪಾರಾಗಿ ವೃಂದಾವನದ ಬುಕೊಲಿಕ್ ಪ್ರದೇಶದ ಗೋಪಾಲಕರು ಮತ್ತು ಗೋಪಿಕೆಯರ ನಡುವೆ ಬೆಳೆಯುತ್ತಾನೆ. ಅವನು ಗೋಪಿಯರೊಂದಿಗೆ ಎಲ್ಲಾ ರೀತಿಯ ತಮಾಷೆಯ ಕಿಡಿಗೇಡಿತನದಲ್ಲಿ ತೊಡಗಿದ್ದ. ತನ್ನ ಕೊಳಲು ನುಡಿಸುತ್ತ ವೃಂದಾವನದ ಕಾಡುಗಳಲ್ಲಿ ಅಲೆದಾಡುತ್ತಿದ್ದ. ಎಲ್ಲಾ ಗೋಪಿಯರು ಕೃಷ್ಣನನ್ನು ಪ್ರೀತಿಸುತ್ತಿದ್ದರು. ಆದರೆ ಅವನ್ನು ಪ್ರೀತಿಸಿದ್ದು, ಮಾತ್ರ ರಾಧೆಯನ್ನು.
ರಾಧಾ ಕೃಷ್ಣರ ಮೊದಲ ಭೇಟಿ: ಕೆಲವೊಂದು ಕಥೆಗಳ ಪ್ರಕಾರ ರಾಧೆ 11ನೇ ತಿಂಗಳ ಚಿಕ್ಕ ಮಗುವಾಗಿದ್ದಾಗ ಮೊದಲ ಬಾರಿ ಶ್ರೀಕೃಷ್ಣನನ್ನು ಭೇಟಿಯಾಗುತ್ತಾಳಂತೆ. ರಾಧೆ 11 ತಿಂಗಳು ಮಗುವಾಗಿದ್ದಾಗ ಕೃಷ್ಣ 1 ದಿನದ ಪುಟ್ಟ ಮಗುವಾಗಿದ್ದನಂತೆ. ಆತನನ್ನು ತೊಟ್ಟಿಲಿಗೆ ಹಾಕುವ ದಿನದಂದು ರಾಧೆ ತನ್ನ ತಾಯಿ ಕೀರ್ತಿಯೊಂದಿಗೆ ಕೃಷ್ಣನಿದ್ದ ನಂದಗಾಂವ್‌ಗೆ ಬರುತ್ತಾಳೆ. ಆ ಸಂದರ್ಭದಲ್ಲಿ ರಾಧೆ ತನ್ನ ತಾಯಿಯ ತೋಳುಗಳಲ್ಲಿದ್ದರೆ, ಕೃಷ್ಣ ತೊಟ್ಟಿಲಲ್ಲಿ ಆಟವಾಡುವ ಮಗುವಾಗಿದ್ದ.
ರಾಧಾ ಕೃಷ್ಣರ 2ನೇ ಭೇಟಿ: ಗಾರ್ಗ್‌ ಸಂಹಿತೆಯಲ್ಲಿ ಹೇಳಿರುವಂತೆ ಕೃಷ್ಣನು ತನ್ನ ತಂದೆ ನಂದಬಾಬರೊಂದಿಗೆ ಭಂಡೀರ್‌ ಕಾಡಿನಲ್ಲಿ ಹೋಗುವಾಗ ರಾಧೆಯನ್ನು ಎರಡನೇ ಬಾರಿ ಭೇಟಿಯಾದನೆಂದು ಹೇಳಲಾಗಿದೆ. ಕೃಷ್ಣ ಮತ್ತು ತಂದೆ ನಂದಬಾಬ ಹೋಗುವ ದಾರಿಯಲ್ಲಿ ದಿವ್ಯಜ್ಯೋತಿಯೊಂದು ಕಾಣಿಸಿಕೊಂಡು ಅದು ನಾನು ರಾಣಿ ರಾಧೆ, ನನಗೆ ಕೃಷ್ಣನನ್ನು ನೀಡು ಎಂದು ಕೃಷ್ಣನ ತಂದೆಯ ಬಳಿ ಕೇಳಿದಳಂತೆ. ಆಕೆಯ ಬೇಡಿಕೆಯಂತೆ ನಂದರಾಜರು ತಮ್ಮ ಮಗ ಕೃಷ್ಣನನ್ನು ರಾಧೆಯ ಮಡಿಲಿಗೆ ಹಾಕಿದರು. ಈ ಭೇಟಿಯು ಅಲೌಕಿಕವಲ್ಲ, ಆದರೂ ಕೂಡ ಇದು ಅಲೌಕಿಕ ಎಂದು ಹೇಳಲಾಗುತ್ತದೆ.
ರಾಧಾ ಕೃಷ್ಣರ ಪ್ರೇಮದಾರಂಭ: ರಾಧಾ ಮತ್ತು ಕೃಷ್ಣ ಕಾಡಿನಲ್ಲಿ ಭೇಟಿಯಾದ ನಂತರ ಇವರಿಬ್ಬರು ಸಂಕೇತ ಎನ್ನುವ ಸ್ಥಳದಲ್ಲಿ ಸೇರಿದರು ಎಂದು ಹೇಳಲಾಗುತ್ತದೆ. ಸಂಕೇತ ಎನ್ನುವ ಸ್ಥಳವು ರಾಧೆಯ ಜನ್ಮಸ್ಥಳವಾದ ನಂದಾ ಗ್ರಾಮ ಮತ್ತು ಬರ್ಸಾನಾ ಗ್ರಾಮದ ಮಧ್ಯದಲ್ಲಿದೆ. ಇದು ಅತ್ಯಂತ ಚಿಕ್ಕ ಗ್ರಾಮವಾಗಿದ್ದು, ಈ ಗ್ರಾಮದಲ್ಲೇ ಕೃಷ್ಣ ಮತ್ತು ರಾಧೆಯ ಪ್ರೇಮ ಕಥೆ ಆರಂಭವಾಗಿದ್ದು ಎಂಬ ನಂಬಿಕೆಯಿದೆ.
ರಾಧಾ ಮತ್ತು ಕೃಷ್ಣನ ಪ್ರೀತಿಯ ಕಥೆಯು ದುರಂತದಲ್ಲಿ ಕೊನೆಯಾಗುತ್ತದೆ. ಕೃಷ್ಣನು ವೃಂದಾವನವನ್ನು ತೊರೆಯಬೇಕಾದಾಗ ರಾಧಾ ಅನುಭವಿಸುವ ಅಗಲಿಕೆಯ ನೋವು ಬಹುತೇಕ ಅಸಹನೀಯವಾಗಿರುತ್ತದೆ. ಅವಳು ಯಾಕೆ ನಾನು ಅಂತಹ ನೋವನ್ನು ಅನುಭವಿಸಬೇಕು ಎಂದು ಕೃಷ್ಣನನ್ನು ಕೇಳಿದಾಗ, ಅವನು ಎಲ್ಲ ಜೀವಿಗಳಲ್ಲಿ ತನ್ನನ್ನು ನೋಡಲು ಕಲಿಯಬೇಕು ಎಂದು ಹೇಳುತ್ತಾನೆ. ಏಕೆಂದರೆ ಅವನು ಎಲ್ಲರ ಹೃದಯದಲ್ಲಿ ನೆಲೆಸಿದ್ದಾಗಿ ಹೇಳುತ್ತಾನೆ. ದೇವರಿಂದ ಪ್ರತ್ಯೇಕವಾದ ಆತ್ಮದ ಭಾವನೆಯು ಅದೇ ರೀತಿಯಲ್ಲಿ ನೋವಿನಿಂದ ಕೂಡಿದೆ ಎಂದು ನಂಬಲಾಗಿದೆ.
ಕೃಷ್ಣನು ಭಗವದ್ಗೀತೆಯಲ್ಲಿ ಹೇಳುವಂತೆ, "ನನ್ನಲ್ಲಿ ಎಲ್ಲ ಜೀವಿಗಳನ್ನು ನೋಡುವವನಿಗೆ ನಾನು ಎಂದಿಗೂ ಕಳೆದುಹೋಗಿಲ್ಲ. ಅಥವಾ ಆ ವ್ಯಕ್ತಿಯು ಎಂದಿಗೂ ನನ್ನಿಂದ ಕಳೆದುಹೋಗಿಲ್ಲ." ಆದ್ದರಿಂದ ರಾಧೆ ಮತ್ತು ಕೃಷ್ಣನ ಕಥೆಯನ್ನು ಪ್ರೇಮಿಗಳ ದಿನದಂದು ಎರಡು ಹಂತಗಳಲ್ಲಿ ಆನಂದಿಸಬಹುದು. ಒಂದು ಪ್ರೀತಿ ಹಾಗೂ ಇನ್ನೊಂದು ದುಃಖದ ಕಥೆಯಾಗಿ ನೆನಪಿಸಿಕೊಳ್ಳಲಾಗುತ್ತದೆ.
ಇದನ್ನೂ ಓದಿ: ವ್ಯಾಲಂಟೈನ್ ವೀಕ್: ಪ್ರೀತಿಗೆ ಭರವಸೆಯೇ ಜೀವಾಳ.. ಸಂಗಾತಿಗೆ ಸದಾ ಜೊತೆಗಿರುವ ಪ್ರಾಮಿಸ್ ಮಾಡಿ
