ಪ್ರಯಾಗ್ರಾಜ್(ಉತ್ತರ ಪ್ರದೇಶ): ಸಿಎಂ ಯೋಗಿ ಆದಿತ್ಯಾನಾಥ್ ಅವರ ಸರ್ಕಾರ ರೌಡಿಗಳಿಗೆ ಬಿಸಿ ಮುಟ್ಟಿಸುತ್ತಲೇ ಬಂದಿದೆ. ಇದೀಗ ಮಾಫಿಯಾ ಡಾನ್ ಅತೀಕ್ ಅಹ್ಮದ್ಗೆ ಶಾಕ್ ನೀಡಿದೆ. ಅತಿಕ್ ಅವರಿಗೆ ಸೇರಿದ 123 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಅಕ್ರಮ ಆಸ್ತಿಯನ್ನು ಉತ್ತರ ಪ್ರದೇಶದ ಪೊಲೀಸರು ಜಪ್ತಿ ಮಾಡಿದ್ದಾರೆ. ಗ್ಯಾಂಗ್ಸ್ಟರ್ ಕಾಯ್ದೆ ಅಡಿ ಅತಿಕ್ ಅಹ್ಮದ್ ವಿರುದ್ಧ ಉತ್ತರ ಪ್ರದೇಶ ಪೊಲೀಸರು ಈ ಕಾರ್ಯಾಚರಣೆ ನಡೆಸಿದ್ದಾರೆ.
ಅಕ್ರಮ ದಾರಿಯ ಮೂಲಕ ಮಾಫಿಯಾ ಡಾನ್ ಅತಿಕ್ ಅಹ್ಮದ್ ಸಂಪಾದಿಸಿದ ಆಸ್ತಿಯ ವಿಚಾರಣೆ ನಡೆಸುವಂತೆ ಈ ಮೊದಲು ಪ್ರಯಾಗ್ರಾಜ್ ಡಿಎಂ ಸಂಜಯ್ ಕುಮಾರ್ ಕತ್ರಿ, ಕಂದಾಯ ಇಲಾಖೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದರು. ಈ ವಿಚಾರಣೆ ವರದಿ ಮಂಡಿಸಿದ ಬಳಿಕ ರಾಜಕಾರಣಿಯೂ ಆಗಿರುವ ಡಾನ್ ಅತಿಕ್ ಅಹ್ಮದ್ ಅವರ ಆಸ್ತಿಯನ್ನು ಜಪ್ತಿ ಮಾಡಲಾಗಿದೆ.
ಅಪರಾಧ ಚಟುವಟಿಕೆಗಳಿಂದ ಸಂಪಾದಿಸಿದ ಹಣದಿಂದಾಗಿ ಅತಿಕ್ ಅಹ್ಮದ್, 123 ಕೋಟಿ ಮೌಲ್ಯದ ಮತ್ತು 6. 5 ಕೋಟಿಯ ಆಸ್ತಿಯನ್ನು ಪ್ರಯಾಗ್ರಾಜ್ನ ಫೌಲ್ಪುರ್ ಮತ್ತು ಕಸರಿ ಮಸರಿಯಲ್ಲಿ ಖರೀದಿಸಿದ್ದರು. ಇದರ ಜೊತೆಗೆ ಪ್ರಯಾಗ್ರಾಜ್ನ ಝಾನ್ಸಿಯ ಹವೇಲಿಯಲ್ಲಿ 76 ಮತ್ತು 47 ಕೋಟಿ ರೂಪಾಯಿ ಮೌಲ್ಯದ ಆಸ್ತಿಯನ್ನು ಇವರು ಹೊಂದಿದ್ದರು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಇದರ ಹೊರತಾಗಿ ಕಸರಿ ಮಸರಿ ಪ್ರದೇಶದಲ್ಲಿ ಅತಿಕ್ ಅವರಿಗೆ ಸೇರಿದ ಮೂರನೇ ಅಕ್ರಮ ಅಸ್ತಿಯನ್ನು ಜಪ್ತಿ ಮಾಡಲಾಗಿದ್ದು, ಇದರ ಮಾರುಕಟ್ಟೆ ಬೆಲೆ 6 ಕೋಟಿ ಇದೆ ಎಂದು ಮೂಲಗಳು ತಿಳಿಸಿದೆ.
ಅಪರಾಧ ಚಟುವಟಿಕೆಯಿಂದ ಬಂದ ಅಕ್ರಮ ಹಣದಿಂದ ಅತಿಕ್ ಅಹ್ಮದ್ 123 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಆಸ್ತಿಯನ್ನು ಸಂಪಾದಿಸಿದ್ದರು. ಗಂಗಾ ನದಿ ತೀರ ಪ್ರದೇಶದಲ್ಲೂ ಇವರು ಫಲವತ್ತಾದ ಭೂಮಿಯನ್ನು ಖರೀದಿಸಿದ್ದರು ಎಂದು ನಗರ ಎಸ್ಪಿ ಸಂತೋಷ್ ಕುಮಾರ್ ಮೀನಾ ತಿಳಿಸಿದ್ದಾರೆ.
ಇದನ್ನೂ ಓದಿ: ಬಹುಭಾಷಾ ನಟ ಕಮಲ್ ಹಾಸನ್ ಆಸ್ಪತ್ರೆಗೆ ದಾಖಲು
