ಹೈದರಾಬಾದ್: ಕೋವಿಡ್-19 ಸಾಂಕ್ರಾಮಿಕವು ಕಾಣಿಸಿಕೊಂಡ ಆರಂಭದ ದಿನಗಳಲ್ಲಿ ಅದರ ವೈರಸ್ ಹೇಗೆ ಪತ್ತೆ ಹಚ್ಚುವುದು ಎಂಬುದು ಯಾರಿಗೂ ಗೊತ್ತಿರಲಿಲ್ಲ. ಆಗ ಮೊಟ್ಟಮೊದಲ ಬಾರಿಗೆ ಸೆಂಟರ್ ಫಾರ್ ಸೆಲ್ಯುಲರ್ ಆ್ಯಂಡ್ ಮಾಲಿಕ್ಯುಲರ್ ಬಯಾಲಜಿ (Center for Cellular and Molecular Biology -CCMB) ಸಂಸ್ಥೆಯಲ್ಲಿ ಪ್ರತಿ ದಿನಕ್ಕೆ 1000 ದಷ್ಟು RT-PCR ಟೆಸ್ಟ್ಗಳನ್ನು ಮಾಡಲಾಗುತ್ತಿತ್ತು.
ಅಲ್ಲಿಂದ ಇಲ್ಲಿಯವರೆಗೂ ಸಿಸಿಎಂಬಿ ವಿಜ್ಞಾನಿಗಳು ಕೊರೊನಾ ವೈರಸ್ ಬಗ್ಗೆ ಸಂಶೋಧನೆಗಳನ್ನು ನಡೆಸುತ್ತಲೇ ಇದ್ದಾರೆ. ಭಾರತದಲ್ಲಿ ಮೊಟ್ಟಮೊದಲ ಬಾರಿಗೆ ವಿಜ್ಞಾನಿಗಳು ಕೋವಿಡ್-19 ವೈರಸ್ ನಿರೋಧಕ ಔಷಧಿ ಹಾಗೂ ಲಸಿಕೆಗಳ ದಕ್ಷತೆಯನ್ನು ಅಭ್ಯಸಿಸಲು ಪ್ರಯೋಗಾಲಯದಲ್ಲಿ ಸಿಂಥೆಟಿಕ್ ವೈರಸ್ ಸೃಷ್ಟಿಸಿದ್ದಾರೆ. ಆದರೆ ದಿನಗಳೆದಂತೆ ವೈರಸ್ ಪರಿವರ್ತನೆಗೊಳ್ಳುತ್ತಿದ್ದು, ಹಲವಾರು ರೂಪಾಂತರ ಹೊಂದಿದೆ. ಸಿಸಿಎಂಬಿ ವಿಜ್ಞಾನಿಗಳು ಈ ರೂಪಾಂತರದ ಬಗ್ಗೆ ಸೂಕ್ಷ್ಮವಾಗಿ ಅಧ್ಯಯನ ನಡೆಸುತ್ತಿದ್ದು, ಜೊತೆಗೆ ಜಿನೋಮ್ ಸಿಕ್ವೆನ್ಸಿಂಗ್ ಸಂಶೋಧನೆಗಳನ್ನು ಮುಂದುವರೆಸಿದ್ದಾರೆ.
ಸಿಸಿಎಂಬಿ ವಿಜ್ಞಾನಿಗಳು ಒಣ ಗಂಟಲು ದ್ರವ ಮಾದರಿಯ ಕೋವಿಡ್-19 ಕಿಟ್ಗಳನ್ನು ಸಹ ತಯಾರಿಸಿದ್ದಾರೆ. ಒಟ್ಟಾರೆಯಾಗಿ 200 ವಿಜ್ಞಾನಿಗಳು, ಸಂಶೋಧನಾ ವಿದ್ಯಾರ್ಥಿಗಳು ಮತ್ತು ನಿರ್ವಹಣಾ ಸಿಬ್ಬಂದಿಯು ಈ ಕೆಲಸದಲ್ಲಿ ಹಗಲು ರಾತ್ರಿ ತೊಡಗಿಸಿಕೊಂಡಿದ್ದಾರೆ. ಕೊರೊನಾ ವೈರಸ್ ಈ ಜಗತ್ತಿನಲ್ಲಿ ಕಣ್ಣಿಗೆ ಕಾಣದ ಶತ್ರುವಾಗಿದ್ದು, ಇದರ ನಿರ್ಮೂಲನೆಗಾಗಿ ಹೋರಾಟ ಮುಂದುವರೆದಿದೆ. ಈ ಮಧ್ಯೆ ಜನತೆಯ ರಕ್ಷಣೆಗಾಗಿ ಸಿಸಿಎಂಬಿ ಸಿಬ್ಬಂದಿಯು ಸತತವಾಗಿ ಶ್ರಮಿಸುತ್ತಿರುವುದು ಶ್ಲಾಘನೀಯವಾಗಿದೆ. ವೈರಸ್ಸಿನ ಜೆನೆಟಿಕ್ ಮ್ಯುಟೇಶನ್ ಹಾಗೂ ಪ್ರೊಟೀನ್ ಬದಲಾವಣೆಗಳನ್ನು ಇವರು ನಿರಂತರವಾಗಿ ಅಧ್ಯಯನ ಮಾಡುತ್ತಿದ್ದಾರೆ.
ದೇಶದಲ್ಲಿ ಸಾಂಕ್ರಾಮಿಕ ರೋಗವು ಭುಗಿಲೆದ್ದಾಗಿನಿಂದ ವಿಜ್ಞಾನಿಗಳು ಮತ್ತು ವೈರಾಲಜಿಸ್ಟ್‌ಗಳು ಜಿನೋಮ್ ಅನುಕ್ರಮಣಿಕೆ ತಯಾರಿಸುವ ಕೆಲಸ ಮಾಡುತ್ತಿದ್ದಾರೆ. ಆರಂಭಿಕ ಹಂತದಲ್ಲಿ ಸಂಶೋಧನೆಗಾಗಿ ಮುಂದೆ ಬಂದ ಸ್ವಯಂಸೇವಕರು ನೀಡಿದ ಮಾದರಿಗಳಿಂದ ವೈರಸ್‌ನ ಆನುವಂಶಿಕ ಅನುಕ್ರಮವನ್ನು ಸಿಸಿಎಂಬಿ ಅಧ್ಯಯನ ಮಾಡಿದೆ. ಪ್ರಸ್ತುತ, ನೂರಾರು ಸ್ವಯಂಸೇವಕರು ಅಧ್ಯಯನಕ್ಕೆ ಸಹಾಯ ಮಾಡಲು ಮುಂದೆ ಬಂದಿದ್ದಾರೆ. ರೋಗನಿರ್ಣಯ ಪರೀಕ್ಷೆಗಳು, ಪ್ರತಿಕಾಯ ವರ್ಧನೆ, ಔಷಧ ಪರೀಕ್ಷೆ ಮತ್ತು ಜಿನೋಮ್ ಅನುಕ್ರಮಣಿಕೆ ಹೀಗೆ ನಾಲ್ಕು ವಿಧದಲ್ಲಿ ಸಂಶೋಧನೆಗಳು ಅಡೆತಡೆಯಿಲ್ಲದೆ ನಡೆಯುತ್ತಿವೆ. ವಿಜ್ಞಾನಿಗಳು ಮತ್ತು ಸಂಶೋಧನಾ ವಿದ್ಯಾರ್ಥಿಗಳು ಸಮಾನವಾಗಿ ಈ ಸಂಶೋಧನೆಯಲ್ಲಿ ಭಾಗವಹಿಸುತ್ತಿದ್ದಾರೆ.
ಸಿಸಿಎಂಬಿ ಸಂಶೋಧನಾ ಸಿಬ್ಬಂದಿಯು ಕಳೆದ ಒಂದು ವರ್ಷದಿಂದ ಕೋವಿಡ್-19 ಬಗ್ಗೆ ಗಮನ ಹರಿಸಿದ್ದಾರೆ. ದೇಶಾದ್ಯಂತ ವಿವಿಧ ರಾಜ್ಯಗಳಿಂದ ವೈರಸ್ ಮಾದರಿಗಳನ್ನು ಪಡೆದು ಅಧ್ಯಯನ ಮಾಡುತ್ತಿದ್ದಾರೆ. ವೈರಸ್ಸಿನ ರೂಪಾಂತರಗಳು ಮತ್ತು ನಡವಳಿಕೆಯ ಬದಲಾವಣೆಗಳ ಬಗ್ಗೆ ಸಂಶೋಧನೆ ನಡೆಸುತ್ತಿದ್ದಾರೆ. ಡಿಸೆಂಬರ್ ವೇಳೆಗೆ ಇವರು 1,000 ಜಿನೋಮ್ಗಳನ್ನು ಅನುಕ್ರಮಗೊಳಿಸಬಹುದು. ಇತ್ತೀಚೆಗೆ ಹೆಚ್ಚುವರಿಯಾಗಿ 1,500 ಜಿನೋಮ್ಗಳನ್ನು ಅನುಕ್ರಮಗೊಳಿಸಿದ್ದಾರೆ. ದೇಶಾದ್ಯಂತದ ಮಾದರಿಗಳನ್ನು ಸಂಸ್ಕರಿಸುತ್ತಿದ್ದು, ವಾರಕ್ಕೆ 500 ಜಿನೋಮ್ ಅನುಕ್ರಮಣಿಕೆ ತಯಾರಿಸುತ್ತಿದ್ದಾರೆ.
"ಜಿನೋಮ್‌ಗಳ ಕ್ಷಿಪ್ರ ಆವಿಷ್ಕಾರ ಮತ್ತು ವಿಶ್ಲೇಷಣೆಯ ಗುರಿಯೊಂದಿಗೆ ನಾವು ನಿರಂತರವಾಗಿ ಕೆಲಸ ಮಾಡುತ್ತಿದ್ದೇವೆ. ಈ ಸಮಯದಲ್ಲಿ ಇದು ನಮಗೆ ದೊಡ್ಡ ಸವಾಲಾಗಿದೆ. ಮೊದಲ ಅಲೆಯ ಸಮಯದಲ್ಲಿ, ನಮ್ಮ ತಂಡದ ಹಲವಾರು ಸದಸ್ಯರು ಸೋಂಕಿಗೆ ಒಳಗಾಗಿದ್ದರೂ ಬೇಗನೆ ಚೇತರಿಸಿಕೊಂಡರು. ನಾವು ವೈರಲ್ ಆರ್‌ಎನ್‌ಎ ಕುರಿತು ಸಂಶೋಧನೆ ನಡೆಸುತ್ತಿರುವುದರಿಂದ ಹೆದರುವಂಥದ್ದೇನೂ ಇರಲಿಲ್ಲ. ಲ್ಯಾಬ್ ಒಳಗೆ ಮತ್ತು ಹೊರಗೆ ಎಲ್ಲ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಂಡಿದ್ದೇವೆ. ಆದರೂ ವೈರಸ್ ಸೋಂಕು ತಗುಲದಂತೆ ಜಾಗರೂಕರಾಗಿರುವುದು ಬಹಳ ಮುಖ್ಯ" ಎನ್ನುತ್ತಾರೆ ಸಿಸಿಎಂಬಿಯ ವಿಜ್ಞಾನಿ ದಿವ್ಯಾ ತೇಜ್.
"ಆರಂಭದಲ್ಲಿ ವೈರಸ್ ಬಗ್ಗೆ ಯಾರಿಗೂ ಏನೂ ತಿಳಿದಿರಲಿಲ್ಲ. ನಾವು ಸಹ ಭಯಭೀತರಾಗಿದ್ದೆವು. ಆಗ ನಾವು ಲ್ಯಾಬ್ನಲ್ಲಿ ಕೆಲಸ ಮಾಡದಿದ್ದರೂ, ಹೊರಗಡೆ ಕೆಲ ಜನರು ಕೋವಿಡ್ ಸೋಂಕಿತರಾಗಿದ್ದನ್ನು ಕೇಳಿದಾಗ ಭಯವಾಗುತ್ತಿತ್ತು. ವಾಸ್ತವವಾಗಿ ಲ್ಯಾಬ್‌ನೊಳಗೆ ಕೆಲಸ ಮಾಡುವುದು ಸುರಕ್ಷಿತವಾಗಿದೆ. ಲ್ಯಾಬ್ನಲ್ಲಿ ನಾವು ಎಲ್ಲ ರಕ್ಷಣಾತ್ಮಕ ಕ್ರಮಗಳನ್ನು ತೆಗೆದುಕೊಳ್ಳುವುದರಿಂದ ಸೋಂಕು ತಗಲುವ ಸಾಧ್ಯತೆಗಳು ತೀರಾ ಕಡಿಮೆ. ರೋಗನಿರ್ಣಯ ಪರೀಕ್ಷೆಗಳ ಡೇಟಾವನ್ನು ಸರ್ಕಾರದೊಂದಿಗೆ ಹಂಚಿಕೊಂಡಾಗ ನಮಗೆ ನಿಜವಾಗಿಯೂ ಖುಷಿಯಾಗುತ್ತದೆ." ಎನ್ನುತ್ತಾರೆ ಮತ್ತೋರ್ವ ಸಿಸಿಎಂಬಿ ವಿಜ್ಞಾನಿ ಮತ್ತು ಪ್ರಧಾನ ಕ್ಲಿನಿಕಲ್ ಜೆನೆಟಿಸ್ಟ್ ಕಾರ್ತಿಕ್ ಭಾರದ್ವಾಜ್.
