ನವದೆಹಲಿ: ಕರ್ನಾಟಕದ ಸರ್ಕಾರಿ ಶಾಲಾ ಕಾಲೇಜುಗಳಲ್ಲಿ ಹಿಜಾಬ್ ಧಾರಣೆ ನಿಷೇಧಿಸಿ ಹೈಕೋರ್ಟ್ ನೀಡಿದ ಆದೇಶದ ವಿರುದ್ಧ ಸಲ್ಲಿಸಲಾದ ಮೇಲ್ಮನವಿ ಅರ್ಜಿಗಳ ನಾಲ್ಕನೆಯ ದಿನದ ವಿಚಾರಣೆ ಮುಕ್ತಾಯಗೊಳಿಸಿದ್ದು, ಮುಂದಿನ ವಿಚಾರಣೆ ಬುಧವಾರ ಬೆಳಗ್ಗೆ 11;30 ಕ್ಕೆ ನಿಗದಿ ಮಾಡಲಾಗಿದೆ.
ಇಂದಿನ ವಿಚಾರಣೆಯ ಸಾರ: ಸುಪ್ರೀಂಕೋರ್ಟ್ನಲ್ಲಿ ಹಿಜಾಬ್ ಮೇಲ್ಮನವಿ ಕುರಿತಾಗಿ ನಡೆದ ವಿಚಾರಣೆಯ ವೇಳೆ ಮತ್ತೆ ಸಿಖ್ ವಸ್ತ್ರದ ಬಗ್ಗೆ ಪ್ರಸ್ತಾಪವಾಗಿದೆ. ಗುರುದ್ವಾರಕ್ಕೆ ಮಹಿಳೆ ಪ್ರವೇಶಿಸಿದಾಗ ಅವರು ತಲೆಯ ಮೇಲೆ ವಸ್ತ್ರವನ್ನು ಧರಿಸಿರುತ್ತಾರೆ. ಇದು ಅಲ್ಲಿನ ಧಾರ್ಮಿಕ ಆಚರಣೆ. ಅದೇ ರೀತಿ ಹಿಜಾಬ್ ಕೂಡ ಇಸ್ಲಾಂ ಧರ್ಮದ ಆಚರಣೆ ಎಂದು ಫಿರ್ಯಾದುದಾರರ ಪರ ವಕೀಲ ಸಲ್ಮಾನ್ ಖುರ್ಷಿದ್ ವಾದ ಮಂಡಿಸಿದರು.
ಹಿಜಾಬ್, ಹಿಲ್ಬಾಬ್, ಬುರ್ಖಾ ಮೂರೂ ಬೇರೆ ಬೇರೆ..: ಮುಸ್ಲಿಂ ಮಹಿಳೆಯರು ಮೂರು ರೀತಿಯ ವಸ್ತ್ರಗಳನ್ನು ಧರಿಸುತ್ತಾರೆ. ಹಿಜಾಬ್, ಹಿಲ್ಬಾಬ್, ಬುರ್ಖಾ ಈ ಮೂರು ಬೇರೆ ಬೇರೆಯಾಗಿವೆ. ಇವು ಸಂಸ್ಕೃತಿಯನ್ನು ಪ್ರತಿನಿಧಿಸುತ್ತವೆ. ಕುರಾನ್ ಪ್ರಕಾರ ಹಿಜಾಬ್ ಒಂದು ಪರದೆಯಾಗಿದೆ. ಅದು ಧರ್ಮ ಅಥವಾ ಸಂಸ್ಕೃತಿಯ ಪ್ರತೀಕವಾಗಿದೆ. ಉತ್ತರ ಭಾರತದಲ್ಲಿ ಘೂಂಘಾಟ್ ಬಹಳ ಅವಶ್ಯಕ ಎಂದು ಪರಿಗಣಿತವಾಗಿದೆ. ಹಾಗೆಯೇ ಹಿಜಾಬ್ ಕೂಡ ಅತ್ಯಗತ್ಯವೆಂದು ಮುಸ್ಲಿಂ ಮಹಿಳೆಯರು ಪರಿಗಣಿಸಿದ್ದಾರೆ ಎಂದು ಸಲ್ಮಾನ್ ಖುರ್ಷಿದ್ ವಾದಿಸಿದರು.
ಗುರುದ್ವಾರಕ್ಕೆ ಹೋಗುವ ಭಕ್ತರು ಯಾವಾಗಲೂ ತಮ್ಮ ತಲೆಯನ್ನು ವಸ್ತ್ರದಿಂದ ಮುಚ್ಚಿರುತ್ತಾರೆ. ಇದು ಆ ಧರ್ಮದ ಸಂಸ್ಕೃತಿ. ಮಸೀದಿಗಳಲ್ಲಿ ಶಿರವಸ್ತ್ರ ಧರಿಸುತ್ತಾರೆ. ಇದೂ ಕೂಡ ಸಂಸ್ಕೃತಿ ಎಂದರು.
ಧರ್ಮದ ನಿಯಮಗಳನ್ನು ಪಾಲಿಸುವವನಿಗೆ ದೇವರು ಕರುಣಾಮಯಿ. ಆತ ಉತ್ತಮ ಫಲಗಳನ್ನು ಅನುಭವಿಸುತ್ತಾನೆ. ಆದರೆ ಪಾಲಿಸದವರಿಗೆ ನರಕಯಾತನೆ ಎಂಬ ನಿಬಂಧನೆಗಳು ಕುರಾನ್ನಲ್ಲಿ ಉಲ್ಲೇಖಿಸಲಾಗಿದೆ. ಆದರೆ, ಇವೆಲ್ಲವೂ ಮರಣಾನಂತರದ ಸಂಗತಿಗಳಾಗಿವೆ. ಈ ನಂಬಿಕೆ ಜನರಲ್ಲಿದೆ ಎಂದು ಕೋರ್ಟ್ಗೆ ಅರಿಕೆ ಮಾಡಿದರು.
ಧಾರ್ಮಿಕ ಅನ್ವಯ ವಿಷಯದಲ್ಲಿ ತಪ್ಪಾದ ನಿರ್ಧಾರ: ಕರ್ನಾಟಕ ಹೈಕೋರ್ಟ್ ತೀರ್ಪು ಹಲವು ವಿಷಯಗಳಲ್ಲಿ ಸರಿಯಾಗಿದ್ದರೂ, ಧಾರ್ಮಿಕ ವಿಷಯದ ಅನ್ವಯದಲ್ಲಿ ತಪ್ಪಾಗಿದೆ. ಒಬ್ಬ ಸಿಖ್ ಮಹಿಳೆ ಧರಿಸುವ ವಸ್ತ್ರದಂತೆ ಹಿಜಾಬ್ ಕೂಡ ಮುಖ್ಯ ಎಂದು ಸಲ್ಮಾನ್ ಖುರ್ಷಿದ್ ಹೇಳಿದರು.
ವಾದ ಆಲಿಸಿದ ನ್ಯಾಯಮೂರ್ತಿ ಹೇಮಂತ್ ಗುಪ್ತಾ ಅವರು ಮುಂದಿನ ವಿಚಾರಣೆಯನ್ನು ಸೆಪ್ಟೆಂಬರ್ 14 ಕ್ಕೆ ಮುಂದೂಡಿದರು. ಅಲ್ಲದೇ, ಗುರುವಾರದ ಒಳಗಾಗಿ ವಾದವನ್ನು ಪೂರ್ಣಗೊಳಿಸಲು ಸೂಚಿಸಿದರು.
ಮೂರನೇ ದಿನದ ವಿಚಾರಣೆಯಲ್ಲಿ ಸಿಖ್ಖರು ಪೇಟ ಧರಿಸುತ್ತಾರಲ್ಲವೇ ಎಂದು ದೇವದತ್ ಕಾಮತ್ ವಾದ ಮಂಡಿಸಿದ್ದರು. ಇದಕ್ಕೆ ಕೋರ್ಟ್, ಪೇಟ ಸಿಖ್ ಧಾರ್ಮಿಕ ಆಚರಣೆಯ ಭಾಗ. ಹಿಜಾಬ್ ಅನ್ನು ಎಲ್ಲಿಯೂ ಧಾರ್ಮಿಕ ಆಚರಣೆಯ ಭಾಗವೆಂದು ಪರಿಗಣಿಸಲಾಗಿಲ್ಲ ಎಂದು ಹೇಳಿತ್ತು.
ನ್ಯಾಯಮೂರ್ತಿಗಳಾದ ಹೇಮಂತ್ ಗುಪ್ತಾ ಮತ್ತು ಸುಧಾಂಶು ಧುಲಿಯಾ ಅವರನ್ನೊಳಗೊಂಡ ಪೀಠ ಅರ್ಜಿಗಳ ಪರ - ವಿರೋಧದ ವಿಚಾರಣೆ ನಡೆಸಿತು. ಹಿಜಾಬ್ ಪರವಾಗಿ ಸಲ್ಲಿಸಲಾದ 23 ಅರ್ಜಿಗಳನ್ನು ಒಟ್ಟು ಮಾಡಿ ಕೋರ್ಟ್ ವಿಚಾರಿಸುತ್ತಿದೆ. ಫಿರ್ಯಾದುದಾರರ ಪರವಾಗಿ ವಕೀಲ ಯುಸೂಫ್ ಮುಚ್ಚಲ್ ಮೊದಲು ವಾದ ಮಂಡಿಸಿದರು.
ಪ್ರಕರಣವೇನು?: ಉಡುಪಿಯ ಕಾಲೇಜೊಂದರಲ್ಲಿ ಶುರುವಾದ ಈ ಹಿಜಾಬ್ ವಿವಾದ ದೇಶ ಸೇರಿದಂತೆ ವಿದೇಶಕ್ಕೂ ಇದು ಹಬ್ಬಿದೆ. ಮುಸ್ಲಿಂ ವಿದ್ಯಾರ್ಥಿನಿಯರು ಕಾಲೇಜಿಗೆ ಹಿಜಾಬ್ ಧರಿಸಿ ಬಂದಿದ್ದನ್ನು ಪ್ರಶ್ನಿಸಲಾಗಿತ್ತು. ಬಳಿಕ ಶಾಲಾ ಅಭಿವೃದ್ಧಿ ಸಮಿತಿ ಕಾಲೇಜಿನಲ್ಲಿ ಹಿಜಾಬ್ ಧರಿಸಿ ಬರುವುದನ್ನು ನಿಷೇಧಿಸಿತ್ತು. ಬಳಿಕ ಸರ್ಕಾರವೂ ಕೂಡ ಸಮವಸ್ತ್ರ ನಿಯಮ ರೂಪಿಸುವ ಹಕ್ಕು ಸಮಿತಿಗಳಿಗಿದೆ ಎಂಬ ಆದೇಶ ಹೊರಡಿಸಿತ್ತು.
ಇದರ ವಿರುದ್ಧ ಹೈಕೋರ್ಟ್ನಲ್ಲಿ ದಾವೆ ಹೂಡಲಾಗಿತ್ತು. ಅರ್ಜಿಯ ವಿಚಾರಣೆ ನಡೆಸಿದ ಆಗಿನ ಮುಖ್ಯ ನ್ಯಾಯಮೂರ್ತಿಯಾಗಿದ್ದ ರಿತು ರಾಜ್ ಅವಸ್ತಿ ಮತ್ತು ನ್ಯಾಯಮೂರ್ತಿಗಳಾದ ಕೃಷ್ಣ ಎಸ್. ದೀಕ್ಷಿತ್ ಮತ್ತು ಜೆಎಂ ಖಾಜಿ ಅವರಿದ್ದ ತ್ರಿಸದಸ್ಯ ಪೀಠವು ಶಾಲಾ - ಕಾಲೇಜುಗಳ ತರಗತಿಯೊಳಗೆ ಹಿಜಾಬ್ ಧರಿಸುವುದನ್ನು ನಿಷೇಧಿಸುವ ಅಧಿಕಾರ ಸರ್ಕಾರಿ ಕಾಲೇಜುಗಳ ಅಭಿವೃದ್ಧಿ ಸಮಿತಿಗಳಿಗಿದೆ ಎಂಬ ರಾಜ್ಯ ಸರ್ಕಾರದ ಆದೇಶವನ್ನು ಎತ್ತಿಹಿಡಿದು ಮಾರ್ಚ್ 15 ರಂದು ತೀರ್ಪು ನೀಡಿತ್ತು.
ಓದಿ: ಜ್ಞಾನವಾಪಿ ಶಿವಲಿಂಗಕ್ಕೆ ಪೂಜೆ: ಮಹಿಳೆಯರ ಅರ್ಜಿ ಪುರಸ್ಕರಿಸಿದ ವಾರಾಣಸಿ ಕೋರ್ಟ್
