ತಾಯಿಯ ಕೊಂದು ಮನೆ ಮುಂದೆ ಸುಟ್ಟ ಮಗ: ಅದೇ ಚಿತೆಯಲ್ಲಿ ಕೋಳಿ ಬೇಯಿಸಿ ತಿಂದ!

ಹೆತ್ತ ತಾಯಿಯನ್ನು ಕೊಲೆ ಮಾಡಿರುವ ಪಾಪಿ ಮಗ, ಚಿತೆಯ ಮೇಲೆ ಕೋಳಿ ಬೇಯಿಸಿಕೊಂಡು ತಿಂದಿರುವ ಘಟನೆ ಜಾರ್ಖಂಡ್​ನಲ್ಲಿ ನಡೆದಿದೆ.

ಮನೋಹರ್​​ಪುರ(ಜಾರ್ಖಂಡ್​): ತಾಯಿಯನ್ನು ಕೊಲೆ ಮಾಡಿರುವ ಮಗನೋರ್ವ ಮೃತದೇಹವನ್ನು ಮನೆ ಮುಂದೆ ಸುಟ್ಟು ಹಾಕಿ, ಅದಕ್ಕಾಗಿ ನಿರ್ಮಿಸಿದ್ದ ಚಿತೆಯಲ್ಲಿ ಕೋಳಿ ಬೇಯಿಸಿ ತಿಂದಿರುವ ಅಮಾನವೀಯ ಘಟನೆ ಜಾರ್ಖಂಡ್​ನ ಮನೋಹರ್​ಪುರದಲ್ಲಿ ನಡೆದಿದೆ.

ನಾಲ್ಕು ವರ್ಷಗಳ ಹಿಂದೆ ತಂದೆಯನ್ನು ಕೊಲೆ ಮಾಡಿ ಜೈಲುಪಾಲಾಗಿದ್ದ 35 ವರ್ಷದ ಪ್ರಧಾನ್ ಕಳೆದ ಕೆಲ ದಿನಗಳ ಹಿಂದೆ ಬಿಡುಗಡೆಯಾಗಿದ್ದ. ಇದೀಗ ತಾಯಿಯನ್ನೂ ಕೊಲೆ ಮಾಡಿದ್ದಾನೆ. ಲಭ್ಯವಾಗಿರುವ ಮಾಹಿತಿ ಪ್ರಕಾರ ಈತ ಮಾನಸಿಕವಾಗಿ ಖಿನ್ನತೆಗೊಳಗಾಗಿದ್ದ ಎನ್ನಲಾಗಿದೆ.

ಮನೋಹರ್​​ಪುರ ಪೊಲೀಸ್​ ಠಾಣಾ ವ್ಯಾಪ್ತಿಯ ಜೊಜೋಗುಟ್​ ಗ್ರಾಮದಲ್ಲಿ ತಾಯಿ ಜೊತೆ ವಾಸವಾಗಿದ್ದ ಈತ ಅವಳನ್ನೇ ಕೊಲೆ ಮಾಡಿದ್ದಾನೆ. ಕೊಲೆ ಮಾಡಿದ ಬಳಿಕ ಮನೆಯ ಅಂಗಳದಲ್ಲಿ ಸುಟ್ಟುಹಾಕಿದ್ದು, ಅದರ ಮೇಲೆ ಕೋಳಿ ಬೇಯಿಸಿ ತಿಂದಿದ್ದಾನೆ. ಈ ಬಗ್ಗೆ ಆರೋಪಿ ಗ್ರಾಮಸ್ಥರಿಗೆ ಗೊತ್ತಾದ ಬಳಿಕ ಆತನನ್ನ ಕಟ್ಟಿ ಹಾಕಿ, ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಕಂಠಪೂರ್ತಿ ಕುಡಿದ ಪ್ರಧಾನ್​ ತಾಯಿ ಮೇಲೆ ಹಲ್ಲೆ ನಡೆಸಿ, ಕೊಲೆ ಮಾಡಿದ್ದಾನೆ. ನಂತರ ಮನೆಯ ಮುಂದೆ ಸುಟ್ಟು ಹಾಕಿದ್ದಾನೆ. ಜೊತೆಗೆ ಕೋಳಿ ಬೇಯಿಸಿದ್ದಾನೆ. ಈಗಾಗಲೇ ಆರೋಪಿಯ ಬಂಧನ ಮಾಡಲಾಗಿದ್ದು, ವಿಚಾರಣೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.