ಮಾಹಿತಿ ಕೇಳಿದ ವಿಶೇಷಚೇತನನಿಗೆ ಒದ್ದ ಸರಪಂಚ್​.. ದರ್ಪ ತೋರಿ ಸ್ಥಾನ ಕಳೆದುಕೊಂಡ ದುರಹಂಕಾರಿ

ಆರ್​ಟಿಐನಲ್ಲಿ ಮಾಹಿತಿ ಕೇಳಿದ್ದಕ್ಕೆ ಕುಪಿತಗೊಂಡ ಗ್ರಾಮ ಪಂಚಾಯಿತಿ ಸರಪಂಚ್​ ವಿಶೇಷಚೇತನ ಎಂಬ ಕನಿಕರವೂ ಇಲ್ಲದೇ ಒದ್ದು ಅಹಂಕಾರ ತೋರಿದ್ದಾರೆ.

ಮಹೆಬೂಬನಗರ(ತೆಲಂಗಾಣ): ಅಧಿಕಾರದ ದರ್ಪ ಮನುಷ್ಯನನ್ನು ಏನು ಬೇಕಾದರೂ ಮಾಡಿಸುತ್ತೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ. ತಮ್ಮ ಉದ್ಯೋಗದ ಬಗ್ಗೆ ಮಾಹಿತಿ ನೀಡಲು ಆರ್​ಟಿಐ ಸಲ್ಲಿಸಿದ್ದ ವಿಶೇಷಚೇತನ ವ್ಯಕ್ತಿಯ ಮೇಲೆ ಗ್ರಾಮ ಪಂಚಾಯಿತಿ ಸರಪಂಚ್​ ಹಲ್ಲೆ ನಡೆಸಿದ್ದಲ್ಲದೇ, ಒದ್ದು ದೌರ್ಜನ್ಯ ಮೆರೆದಿದ್ದಾರೆ.

ಮಹೆಬೂಬನಗರ ಜಿಲ್ಲೆಯಲ್ಲಿ ಈ ಪ್ರಕರಣ ಬೆಳಕಿಗೆ ಬಂದಿದೆ. ವಿಶೇಷಚೇತನನನ್ನು ಸರಪಂಚ್​ ಕಾಲಿನಿಂದ ಥಳಿಸುತ್ತಿರುವ ವಿಡಿಯೋ ವೈರಲ್​ ಆಗಿದೆ. ಘಟನೆ ಬೆಳಕಿಗೆ ಬಂದ ತಕ್ಷಣ ಜಿಲ್ಲಾಧಿಕಾರಿ ಅವರು ದುರುಳ ಸರಪಂಚ್​ನನ್ನು ಅವರ ಸ್ಥಾನದಿಂದ ವಜಾಗೊಳಿಸಿ ಆದೇಶಿಸಿದ್ದು, ದೂರು ಆಧರಿಸಿ ಬಂಧಿಸಲಾಗಿದೆ.

ಏನಾಯ್ತು?: ಮೆಹಬೂಬನಗರ ಜಿಲ್ಲೆಯ ಗ್ರಾಮವೊಂದರ ವಿಶೇಷಚೇತನ ವ್ಯಕ್ತಿಯೊಬ್ಬ ತಮ್ಮ ಉದ್ಯೋಗದ ಬಗ್ಗೆ ಮಾಹಿತಿ ಕೇಳಿ ಮಾಹಿತಿ ಹಕ್ಕು ಕಾಯ್ದೆಯಡಿ(ಆರ್​ಟಿಐ) ಅರ್ಜಿ ಸಲ್ಲಿಸಿದ್ದಾರೆ. ಇದರಲ್ಲಿ ಗೋಲ್​ಮಾಲ್​ ನಡೆಸಿರುವ ಆರೋಪ ಹೊತ್ತಿರುವ ಸರಪಂಚ್​ ಆ ವಿಶೇಷಚೇತನ ವ್ಯಕ್ತಿಯನ್ನು ಕುಟುಂಬಸ್ಥರ ಮುಂದೆಯೇ ನಿಂದಿಸಿ, ಒಯುವ ಮೂಲಕ ದರ್ಪ ತೋರಿದ್ದಾರೆ.

ಅಲ್ಲದೇ, ಅರ್ಜಿ ಸ್ವೀಕರಿಸಿದ ಅಧಿಕಾರಿಗೂ ಬಾಯಿಗೆ ಬಂದಂತೆ ಬೈದಿದ್ದಾರೆ. ಸರಪಂಚ್​ನ ದುರಹಂಕಾರದ ನಡೆಯನ್ನು ಅಲ್ಲಿದ್ದ ಕೆಲವರು ವಿಡಿಯೋ ಮಾಡಿದ್ದಾರೆ. ಬಳಿಕ ಅದನ್ನು ವಾಟ್ಸಾಪ್​ ಗ್ರೂಪ್​ಗಳಲ್ಲಿ ಹಂಚಿಕೊಂಡಿದ್ದು, ವೈರಲ್ ಆಗಿದೆ. ಬಳಿಕ ಘಟನೆ ಬೆಳಕಿಗೆ ಬರುತ್ತಿದ್ದಂತೆ ವಿಶೇಷಚೇತನರ ಸಂಘದಿಂದ ತಹಶಿಲ್ದಾರ್ ಕಚೇರಿ ಎದುರು ಪ್ರತಿಭಟನೆ ನಡೆಸಲಾಗಿದೆ. ಬಳಿಕ ದುರಹಂಕಾರಿ ಸರಪಂಚ್​ ವಿರುದ್ಧ ಸಂತ್ರಸ್ತ ದೂರು ನೀಡಿದ್ದಾನೆ.

ಅಮಾನತು, ಬಂಧನ: ಇನ್ನು, ವೈರಲ್​ ಆದ ವಿಡಿಯೋ ಗಮನಿಸಿದ ಎಸ್​ಪಿ ಸರಪಂಚ್ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಸ್ಥಳೀಯ ಪೊಲೀಸರಿಗೆ ಸೂಚಿಸಿದ್ದಾರೆ. ಬಳಿಕ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆತನನ್ನು ಬಂಧಿಸಿದ್ದಾರೆ. ಇದಲ್ಲದೇ, ಸರಪಂಚ್​ನನ್ನು ಜಿಲ್ಲಾಧಿಕಾರಿ ಕೆಲಸದಿಂದ ಅಮಾನತುಗೊಳಿಸಿದ್ದಾರೆ.

ಓದಿ: ನದಿಯಲ್ಲಿ ತೇಲಿಬಂದ 'ಗಂಗೆ'.. ಜನರಿಂದ 15 ದಿನದ ಹೆಣ್ಣು ಮಗುವಿನ ರಕ್ಷಣೆ