ಉಜ್ಜಯಿನಿ(ಮಧ್ಯಪ್ರದೇಶ): ನಗರದ ರೈಲ್ವೇ ನಿಲ್ದಾಣದ ಪ್ಲಾಟ್‌ಫಾರ್ಮ್ 8ರಲ್ಲಿ ನಿಂತಿದ್ದ ರತ್ಲಾಮ್-ಇಂದೋರ್-ಬಿನಾ ಪ್ಯಾಸೆಂಜರ್ ರೈಲಿನ ಬೋಗಿಗೆ ಹಠಾತ್ ಬೆಂಕಿ ಹೊತ್ತಿಕೊಂಡಿದ್ದು ಒಂದು ಬೋಗಿ ಸಂಪೂರ್ಣ ಸುಟ್ಟು ಭಸ್ಮವಾಯಿತು. ಈ ಘಟನೆ ಭಾನುವಾರ ರಾತ್ರಿ ನಡೆದಿದೆ.
"ನಾನು ರೈಲು ನಿಲ್ದಾಣದ ಮೇಲ್ಸೇತುವೆಯನ್ನು ದಾಟುತ್ತಿದ್ದಾಗ ರೈಲಿನ ಹಿಂದಿನಿಂದ ಮೂರನೇ ಬೋಗಿಯಲ್ಲಿ ಹೊಗೆ ಹೊರಬರುತ್ತಿರುವುದನ್ನು ಗಮನಿಸಿದೆ" ಎಂದು ಪ್ರತ್ಯಕ್ಷದರ್ಶಿಯೊಬ್ಬರು ತಿಳಿಸಿದರು. ಮಾಹಿತಿ ಸಿಕ್ಕ ತಕ್ಷಣವೇ ತಕ್ಷಣವೇ ರೈಲ್ವೇ ಪೊಲೀಸರು ಹಾಗೂ ಆರ್ಪಿಎಫ್ ಸಿಬ್ಬಂದಿ ಸ್ಥಳ ತಲುಪಿದ್ದು, ಅಗ್ನಿಶಾಮಕ ಸಿಬ್ಬಂದಿಗೆ ತಿಳಿಸಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಅಗ್ನಿಶಾಮಕ ದಳ ಬೆಂಕಿ ನಂದಿಸುವಲ್ಲಿ ಯಶಸ್ವಿಯಾದರು. ಜತೆಗೆ, ಬೇರೆ ಬೋಗಿಗಳಿಗೆ ಬೆಂಕಿ ಹರಡುವುದನ್ನು ತಪ್ಪಿಸಿದ್ದಾರೆ.
ಈ ಪ್ಯಾಸೆಂಜರ್ ರೈಲು ಜಿಲ್ಲೆಯ ನಗ್ಡಾ ನಿಲ್ದಾಣದಿಂದ ಉಜ್ಜಯಿನಿ ನಿಲ್ದಾಣಕ್ಕೆ ಬಂದು ಫ್ಲ್ಯಾಟ್ಪಾರ್ಮ್ 5ರಲ್ಲಿ ನಿಂತಿತ್ತು. ಸ್ವಲ್ಪ ಸಮಯದ ನಂತರ ಫ್ಲ್ಯಾಟ್ಫಾರ್ಮ್ 8ಕ್ಕೆ ತೆರಳಿದೆ. ರೈಲು ಬೆಳಗ್ಗೆ 8 ಗಂಟೆಗೆ ಉಜ್ಜಯಿನಿಯಿಂದ ಇಂದೋರ್ಗೆ ಹೊರಡಬೇಕಿತ್ತು. ಅದೃಷ್ಟವಶಾತ್ ಬೆಂಕಿ ಕಾಣಿಸಿಕೊಂಡ ಸಂದರ್ಭದಲ್ಲಿ ಪ್ರಯಾಣಿಕರು ಇರಲಿಲ್ಲ ಎಂದು ರೈಲ್ವೇ ಠಾಣೆಯ ಜಿಆರ್‌ಪಿ ಉಸ್ತುವಾರಿ ಆರ್‌ಎಸ್‌ ಮಹಾಜನ್‌ ತಿಳಿಸಿದರು.
ಸಾಮಾನ್ಯವಾಗಿ ಬೆಳಗ್ಗೆ ಹೊರಡುವ ರೈಲುಗಳನ್ನು ಫ್ಲ್ಯಾಟ್ಫಾರ್ಮ್ 7, 8 ರಲ್ಲಿ ನಿಲ್ಲಿಸಲಾಗುತ್ತದೆ. ಒಂದು ವೇಳೆ ಹೆಚ್ಚು ಜನರಿರುವ ಫ್ಲ್ಯಾಟ್ಫಾರ್ಮ್ 1, 2 ಮತ್ತು 3ರಲ್ಲಿ ಈ ಅಪಘಾತ ಸಂಭವಿಸುತ್ತಿದ್ದರೆ ಬಹಳ ಪ್ರಾಣಹಾನಿಯಾಗುತ್ತಿತ್ತು. ಅಗ್ನಿ ಅನಾಹುತಕ್ಕೆ ನಿರ್ದಿಷ್ಟ ಕಾರಣ ಗೊತ್ತಾಗಿಲ್ಲ. ಶಾರ್ಟ್ ಸರ್ಕ್ಯೂಟ್ನಿಂದ ಅವಘಡ ಕಾಣಿಸಿಕೊಂಡಿರುವ ಸಾಧ್ಯತೆ ಇದೆ. ಒಂದು ವೇಳೆ ಇದರಲ್ಲಿ ಸಮಾಜಘಾತುಕರ ಕೈವಾಡವಿರಬಹುದೇ ಎಂಬುದನ್ನು ಕಂಡುಹಿಡಿಯಲು ಸಿಸಿಟಿವಿ ದೃಶ್ಯ ಪರಿಶೀಲಿಸಲಾಗುವುದು ಎಂದು ಅವರು ಹೇಳಿದರು.
ಇದನ್ನೂ ಓದಿ: ಶಾಲಿಮಾರ್ ಎಕ್ಸ್ಪ್ರೆಸ್ ಲಗೇಜ್ ಬೋಗಿಗೆ ಬೆಂಕಿ: ಪ್ರಯಾಣಿಕರು ಪಾರು
