ಮುಂಬೈ(ಮಹಾರಾಷ್ಟ್ರ): ಪಾಕಿಸ್ತಾನ ಮತ್ತು ಭಾರತ ಮಧ್ಯೆ ಎಣ್ಣೆ ಸೀಗೆಕಾಯಿ ಸಂಬಂಧವೇ. ಆದರೆ, ಜನರ ನಡುವೆ ಪ್ರೀತಿಗೇನು ಕಮ್ಮಿಯಿಲ್ಲ. ಭಾರತದ ಟೆನಿಸ್ ತಾರೆ ಸಾನಿಯಾ ಮಿರ್ಜಾ, ಪಾಕ್ನ ಶೋಯೆಬ್ ಮಲಿಕ್ ಜೊತೆ ಪ್ರೇಮ ವಿವಾಹವಾಗಿದ್ದರು. ಈಗ ಇಬ್ಬರ ಸಂಬಂಧ ಹಳಸಿದೆ ಎಂಬ ಗಾಳಿ ಸುದ್ದಿ ಮಧ್ಯೆಯೇ ಇನ್ನೊಂದು ಪ್ರೇಮ ಸಂಬಂಧ ಬೆಳಕಿಗೆ ಬಂದಿದೆ.
ಲಂಡನ್ನಲ್ಲಿ ವಾಸವಿರುವ ಎನ್ಆರ್ಐ ಪಾಕ್ ಗೆಳತಿಗಾಗಿ ಭಾರತದಲ್ಲಿರುವ ತನ್ನ ಹೆಂಡತಿಗೆ ವಿಚ್ಚೇದನ ಕೋರಿ ನೋಟಿಸ್ ಕಳುಹಿಸಿದ್ದಾನೆ. ಇದನ್ನು ವಿರೋಧಿಸಿರುವ ಪತ್ನಿಯ ಕುಟುಂಬಸ್ಥರು ನ್ಯಾಯ ದೊರಕಿಸಿಕೊಡುವಂತೆ ಕೋರ್ಟ್ ಮತ್ತು ಪೊಲೀಸರಿಗೆ ದೂರು ನೀಡಿದ್ದಾರೆ.
ವಿಚ್ಚೇದನಕ್ಕೆ ಕಾರಣವಾದ ಪಾಕಿಸ್ತಾನಿ ಗೆಳತಿ: ಮುಂಬೈ ಮೂಲದ ರಾಜ್ಕುಮಾರ್ ಬಾಬುಲಾಲ್ ಜೈನ್ ವಿಚ್ಚೇದನ ನೀಡಲು ಮುಂದಾದವರು. 15 ವರ್ಷಗಳ ಹಿಂದೆ ಮಹಾರಾಷ್ಟ್ರದ ಮಲದ್ನ ಶ್ವೇತಾ ಎಂಬುವವರ ಜೊತೆ ವಿವಾಹವಾಗಿದ್ದರು. ಬಳಿಕ ಲಂಡನ್ಗೆ ವರ್ಗವಾದರು. ರಾಜ್ಕುಮಾರ್ ಆಯುರ್ವೇದ ಔಷಧ ಅಂಗಡಿ ನಡೆಸಿದರೆ, ಶ್ವೇತಾ ಅವರು ಬ್ಯೂಟಿಷಿಯನ್ ಆಗಿ ಕೆಲಸ ಮಾಡುತ್ತಿದ್ದರು.
3 ವರ್ಷಗಳಿಂದ ರಾಜ್ಕುಮಾರ್ ಅವರುಗೆ ಪಾಕಿಸ್ತಾನದ ಯುವತಿ ಪರಿಚಯವಾಗಿ, ಇಬ್ಬರ ಮಧ್ಯೆ ಪ್ರೇಮಾಂಕುರವಾಗಿದೆ. ಇದು ಪತ್ನಿ ಶ್ವೇತಾಗೆ ಗೊತ್ತಾಗಿ ತಗಾದೆ ತೆಗೆದಿದ್ದಾರೆ. ಇದು ಜಗಳಕ್ಕೂ ಕಾರಣವಾಗಿ ಶ್ವೇತಾ ಅವರು ಕೆಲ ದಿನಗಳ ಹಿಂದಷ್ಟೇ ಗಂಡನಿಂದ ದೂರವಾಗಿ ಭಾರತಕ್ಕೆ ವಾಪಸ್ ಆಗಿದ್ದಾರೆ. ತಂದೆಯ ಮನೆಯಲ್ಲಿ ವಾಸವಿರುವ ಶ್ವೇತಾ ಅವರಿಗೆ ಪತಿ ಶಾಕಿಂಗ್ ಸುದ್ದಿ ನೀಡಿದ್ದಾರೆ.
ತಾನು ಪಾಕಿಸ್ತಾನ ಪ್ರೇಮಿಯನ್ನು ವರಿಸಲು ಮುಂದಾಗಿದ್ದು, ವಿವಾಹ ವಿಚ್ಚೇದನ ನೀಡುವಂತೆ ಕೋರಿ ಶ್ವೇತಾಗೆ, ರಾಜ್ಕುಮಾರ್ ನೋಟಿಸ್ ಕಳುಹಿಸಿದ್ದಾರೆ. ಇದು ಕುಟುಂಬಸ್ಥರನ್ನು ದಿಗ್ಭ್ರಮೆಗೊಳಿಸಿದ್ದು, ತಂದೆಯ ಸಹಾಯದಿಂದ ಶ್ವೇತಾ ಅವರು ಗಂಡನ ವಿರುದ್ಧ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಪತಿಯಿಂದ ನ್ಯಾಯ ಕೊಡಿಸಬೇಕು ಎಂದು ಕೋರಿದ್ದು, ಮಲಾಡ್ ಪೊಲೀಸರ ತಂಡ ತನಿಖೆಗಾಗಿ ರಾಜ್ಕುಮಾರ್ ಜೈನ್ ಬೆನ್ನು ಬಿದ್ದಿದೆ.
ಓದಿ: ಪಾಕಿಸ್ತಾನದ ಐಎಸ್ಐಗೆ ದೇಶದ ಸೂಕ್ಷ್ಮ ಮಾಹಿತಿ ಸೋರಿಕೆ.. ಗುಜರಾತ್ನಲ್ಲಿ ಜವಳಿ ವ್ಯಾಪಾರಿ ಬಂಧನ
