'ಅಸ್ಸೋಂನಲ್ಲಿ ದಾಡಿ, ಟೋಪಿ, ಲುಂಗಿವಾಲಾಗಳ ಸರ್ಕಾರ ಬರದು': ಕೇಂದ್ರ ಸಚಿವ

ಅಸ್ಸೋಂ ಮೂರನೇ ಹಂತದ ಮತದಾನಕ್ಕೆ ಸಿದ್ಧವಾಗುತ್ತಿದ್ದು, ಕೇಂದ್ರ ಸಚಿವ ಗಿರಿರಾಜ್​ ಸಿಂಗ್ ಆಲ್​ ಇಂಡಿಯಾ ಯುನೈಟೆಡ್​ ಡೆಮಾಕ್ರಟಿಕ್​​ ಫ್ರಂಟ್ ನಾಯಕನ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ.

ನವದೆಹಲಿ: ಅಸ್ಸೋಂನಲ್ಲಿ ವಿಧಾನಸಭಾ ಚುನಾವಣೆ ಕಾವು ಜೋರಾಗಿದ್ದು, ಮೂರನೇ ಹಂತದ ಮತದಾನ ಏಪ್ರಿಲ್​ 6ರಂದು ನಡೆಯಲಿದೆ. ಈ ಹಿನ್ನೆಲೆಯಲ್ಲಿ ವಿವಿಧ ಪಕ್ಷಗಳ ಮುಖಂಡರ ವಾಕ್ಸಮರ ತಾರಕಕ್ಕೇರಿದೆ.

ಕೇಂದ್ರ ಸಚಿವ ಗಿರಿರಾಜ್​ ಸಿಂಗ್ ಚುನಾವಣಾ ಪ್ರಚಾರದ ಕಣದಲ್ಲಿದ್ದು, ಅಸ್ಸೋಂನಲ್ಲಿ ದಾಡಿ, ಟೋಪಿ, ಲುಂಗಿವಾಲಾಗಳ ಸರ್ಕಾರ ಬರುವುದಿಲ್ಲ ಎಂದು ಹೇಳಿದ್ದು, ಆಲ್​ ಇಂಡಿಯಾ ಯುನೈಟೆಡ್​ ಡೆಮಾಕ್ರಟಿಕ್​​ ಫ್ರಂಟ್​ನ ನಾಯಕರಿಗೆ ತಿರುಗೇಟು ನೀಡಿದ್ದಾರೆ.

ಕೇಂದ್ರ ಸಚಿವರು ಹೀಗೆ ಹೇಳಿದ್ದೇಕೆ..?

ಚುನಾವಣಾ ಪ್ರಚಾರ ನಡೆಯುತ್ತಿದ್ದ ವೇಳೆಯಲ್ಲಿ ಆಲ್​ ಇಂಡಿಯಾ ಯುನೈಟೆಡ್​ ಡೆಮಾಕ್ರಟಿಕ್​​ ಫ್ರಂಟ್​ನ ಅಧ್ಯಕ್ಷ ಬದ್ರುದ್ದೀನ್ ಅಜ್ಮಲ್ ಮಗನಾದ ಅಬ್ದುರ್​ ರಹೀಮ್​​ ಈ ಬಾರಿ ದಾಡಿ, ಟೋಪಿ, ಲುಂಗಿವಾಲಾಗಳ ಸರ್ಕಾರ ಅಸ್ಸೋಂನಲ್ಲಿ ಬರಲಿದೆ ಎಂದಿದ್ದರು. ಈ ಹೇಳಿಕೆಗೆ ಗಿರಿರಾಜ್​ಸಿಂಗ್ ಪ್ರತಿಕ್ರಿಯಿಸಿದ್ದಾರೆ.

'ಈಟಿವಿ ಭಾರತ'ದೊಂದಿಗೆ ಮಾತನಾಡಿದ ಗಿರಿರಾಜ್ ಸಿಂಗ್ ಭಾರತ ಸನಾತನ ಧರ್ಮದ ದೇಶವಾಗಿದ್ದು, ಜೈ ಶ್ರೀರಾಮ್​ ಮತ್ತು ಹರೇ ಹರೇ ಘೋಷಣೆಗಳು ದೇಶಾದ್ಯಂತ ಮೊಳಗುತ್ತವೆ ಎಂದಿದ್ದಾರೆ. ಇದರ ಜೊತೆಗೆ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರ ಉದ್ದೇಶ ಸಬ್ ಕಾ ಸಾಥ್ ಎಂಬುದನ್ನು ದೇಶದ ಎಲ್ಲರೂ ಅರಿತುಕೊಳ್ಳಬೇಕು ಎಂದಿದ್ದಾರೆ.