ನವದೆಹಲಿ: ಸಂಸತ್ತಿನಲ್ಲಿ ಬಹುಜನ ಸಮಾಜ ಪಕ್ಷದ (ಬಿಎಸ್ಪಿ) ಸಂಸದ ಡ್ಯಾನಿಶ್ ಅಲಿ ಅವರನ್ನು ಬಿಜೆಪಿ ಸಂಸದ ರಮೇಶ್ ಬಿಧೂರಿ ವಿವಾದಾತ್ಮಕವಾಗಿ ನಿಂದಿಸಿರುವುದು ಸಾಕಷ್ಟು ಟೀಕೆಗೆ ಗುರಿಯಾಗಿದೆ. ಇದರ ನಡುವೆ ಡ್ಯಾನಿಶ್ ಅಲಿ ವಿರುದ್ಧ ಮತ್ತೊಬ್ಬ ಬಿಜೆಪಿ ಸಂಸದ ನಿಶಿಕಾಂತ್ ದುಬೆ, ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರಿಗೆ ಪತ್ರ ಬರೆದಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಎಸ್ಪಿ ಎಂಪಿ ಡ್ಯಾನಿಶ್, ಸದನದಲ್ಲಿ ನನ್ನ ಮೇಲೆ ಈಗಾಗಲೇ ಮೌಖಿಕವಾಗಿ ದಾಳಿ ಮಾಡಲಾಗಿದೆ. ಈ ಪತ್ರವು ಸದನದ ಹೊರಗೂ ಈ ದಾಳಿಯನ್ನು ಸಕ್ರಿಯಗೊಳಿಸುವ ಪ್ರಯತ್ನವಾಗಿದೆ ಎಂದು ಹೇಳಿದ್ದಾರೆ.
ಸೆಪ್ಟೆಂಬರ್ 21ರಂದು ಲೋಕಸಭೆಯಲ್ಲಿ ಬಿಜೆಪಿ ಸಂಸದ ರಮೇಶ್ ಬಿಧೂರಿ, ಬಿಎಸ್ಪಿ ಸಂಸದರಾದ ಡ್ಯಾನಿಶ್ ಅವರನ್ನು 'ಮುಸ್ಲಿಂ ಉಗ್ರವಾದಿ' ಎಂದೆಲ್ಲ ನಿಂದನೆ ಮಾಡಿದ್ದರು. ಈ ಹೇಳಿಕೆ ಸಂಬಂಧ ಬಿಜೆಪಿ ವಿಷಾದ ವ್ಯಕ್ತಪಡಿಸಿ ಬಿಧೂರಿ ಅವರಿಗೆ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ. ಆದರೆ, ಇದುವರೆಗೂ ಅವರ ವಿರುದ್ಧ ಪಕ್ಷವಾಗಲಿ ಅಥವಾ ಸ್ಪೀಕರ್ ಆಗಲಿ ಯಾವುದೇ ಕ್ರಮ ಕೈಗೊಂಡಿಲ್ಲ. ಅಲ್ಲದೇ, ರಮೇಶ್ ಬಿಧೂರಿ ಹೇಳಿಕೆ ಬಗ್ಗೆ ರಕ್ಷಣಾ ಸಚಿವ ಮತ್ತು ಹಿರಿಯ ಬಿಜೆಪಿ ನಾಯಕ ರಾಜನಾಥ್ ಸಿಂಗ್ ಅವರಿಂದ ಹಿಡಿದು ಹಲವರಿಂದ ಸಾಕಷ್ಟು ಟೀಕೆಗಳು ಕೇಳಿ ಬಂದಿದೆ.
ಇದರ ಮಧ್ಯೆ, ರಮೇಶ್ ಬಿಧೂರಿ ಹೇಳಿಕೆ ಸಮಯದಲ್ಲಿ ಸಂಸದ ಡ್ಯಾನಿಶ್ ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಅವಹೇಳನಕಾರಿ ಪದಗಳನ್ನು ಬಳಸುತ್ತಿದ್ದರು ಎಂದು ಹಲವು ಬಿಜೆಪಿ ಸಂಸದರು ಸ್ಪೀಕರ್ ಓಂಬಿರ್ಲಾ ಅವರಿಗೆ ಪತ್ರ ಬರೆದಿದ್ದಾರೆ. ಡ್ಯಾನಿಶ್ ನೀಡಿದ ಹೇಳಿಕೆ ಮೈಕ್ರೊಫೋನ್‌ನಲ್ಲಿ ಸೆರೆಯಾಗಿಲ್ಲ. ಆದ್ದರಿಂದ ಅದು ಸದನದಲ್ಲಿ ಎಲ್ಲರಿಗೂ ಕೇಳಿಸಿಲ್ಲ ಎಂದು ಬಿಜೆಪಿ ಸಂಸದರು ದೂರಿದ್ದಾರೆ. ಈ ಪತ್ರ ಬರೆದವರಲ್ಲಿ ಸಂಸದ ನಿಶಿಕಾಂತ್ ದುಬೆ ಕೂಡ ಒಬ್ಬರಾಗಿದ್ದಾರೆ.
ಈ ಪತ್ರದ ಕುರಿತು ಪ್ರತಿಕ್ರಿಯಿಸಿರುವ ಡ್ಯಾನಿಲ್ ಅಲಿ, ನಾನು ನಿಶಿಕಾಂತ್ ದುಬೆ ಅವರ ಪತ್ರವನ್ನು ನೋಡಿದ್ದೇನೆ. ಸದನದಲ್ಲಿ ನನ್ನ ಮಾತಿನ ದಬ್ಬಾಳಿಕೆ ನಡೆದಿದೆ. ಈಗ ಇದು (ದುಬೆಯವರ ಪತ್ರ) ಸದನದ ಹೊರಗೆ ನನ್ನ ಹತ್ಯೆಯ ನಿರೂಪಣೆಯಾಗಿದೆ. ಈ ಬಗ್ಗೆ ಸೂಕ್ತ ತನಿಖೆಯಾಗಬೇಕು ಎಂದು ನಾನೂ ಕೂಡ ಸ್ಪೀಕರ್ ಅವರನ್ನು ಕೋರುತ್ತೇನೆ. ಅಲ್ಲದೇ, ನನ್ನ ವಿರುದ್ಧ ಮಾಡಿರುವುದು ಆಧಾರ ರಹಿತ ಆರೋಪವಾಗಿದ್ದು, ತನಿಖೆ ನಡೆಸಬೇಕೆಂದು ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ: ತೆಲಂಗಾಣ, ಮಧ್ಯ ಪ್ರದೇಶ, ಛತ್ತೀಸಗಢಗಳಲ್ಲಿ ಗೆದ್ದೇ ಗೆಲ್ತೀವಿ; ರಾಹುಲ್ ಗಾಂಧಿ ವಿಶ್ವಾಸ
