ವಿಶಾಖಪಟ್ಟಣಂ(ಆಂಧ್ರಪ್ರದೇಶ): ಪೋಷಕರ ವಿರೋಧ ಕಟ್ಟಿಕೊಂಡು ಭಾರತೀಯ ಶಾಸ್ತ್ರೀಯ ನೃತ್ಯ ಪ್ರಕಾರಗಳಲ್ಲಿ ಒಂದಾಗಿರುವ ಆಂಧ್ರಪ್ರದೇಶದ ಜನಪ್ರಿಯ ಕೂಚಿಪುಡಿ ನೃತ್ಯ ಕಲಿತಿರುವ ಮಹಿಳೆ ವಿಶ್ವದಾಖಲೆ ಬರೆದಿದ್ದಾರೆ. ಚಿಕ್ಕ ವಯಸ್ಸಿನಿಂದಲೂ ನೃತ್ಯದ ಬಗ್ಗೆ ಅಪಾರ ಒಲವು ಹೊಂದಿದ್ದ ಲಿಖಿತಾ ಎಂಬವರು, ಹಣಕಾಸಿನ ತೊಂದರೆಯ ಹೊರತಾಗಿಯೂ ಕಬ್ಬಿಣದ ಮೊಳೆಗಳ ಸ್ಟ್ಯಾಂಡ್ ಮೇಲೆ ಬರಿಗಾಲಲ್ಲೇ ಆಕರ್ಷಕ ನೃತ್ಯ ಪ್ರದರ್ಶನ ಮಾಡಿ ವಿಶ್ವದಾಖಲೆ ಬರೆದರು.
ವಿಶಾಖಪಟ್ಟಣಂ ನಿವಾಸಿ ಲಿಖಿತಾ, 9 ನಿಮಿಷಗಳ ಕಾಲ ದುರ್ಗಾ ಸ್ತುತಿಗೆ ಮನಮೋಹಕವಾಗಿ ನೃತ್ಯ ಮಾಡುವ ಮೂಲಕ ಅಪರೂಪದ ಸಾಧನೆ ಮಾಡಿದ್ದಾರೆ. ಹೈದರಾಬಾದ್ನ ಪೊಟ್ಟಿ ಶ್ರೀರಾಮುಲು ತೆಲುಗು ವಿಶ್ವವಿದ್ಯಾಲಯದಲ್ಲಿ ನಡೆದ ಸಮಾರಂಭದಲ್ಲಿ ನೃತ್ಯ ಪ್ರದರ್ಶನ ನೀಡಿರುವ ಅವರು, ನೆರೆದಿದ್ದವರನ್ನು ಬೆರಗುಗೊಳಿಸಿದರು. ಬಾಲ್ಯದಲ್ಲಿ ಕೂಚಿಪುಡಿ ಅಭ್ಯಾಸ ಮಾಡುತ್ತಿದ್ದ ಸಂದರ್ಭದಲ್ಲಿ ಲಿಖಿತಾ ಆಕಸ್ಮಿಕವಾಗಿ ಕೆಳಗೆ ಬಿದ್ದು ಬಲ ಪಾದಕ್ಕೆ ಗಾಯ ಮಾಡಿಕೊಂಡಿದ್ದರು. ಇದಾದ ಬಳಿಕ ನೃತ್ಯದಿಂದ ದೂರ ಉಳಿಯುವಂತೆ ಸೂಚನೆ ನೀಡಲಾಗಿತ್ತು. ಆದರೆ, ಎಲ್ಲ ರೀತಿಯ ನೋವು ಸಹಿಸಿಕೊಂಡು, ಅವಿರತ ಕಠಿಣ ಪ್ರಯತ್ನದಿಂದ ಇದೀಗ ವಿಶ್ವದಾಖಲೆಯ ಸಾಧನೆ ಮಾಡಿದ್ದಾರೆ.
ಇದನ್ನೂ ಓದಿ: ₹130 ಕೋಟಿಗೂ ಅಧಿಕ ಮೌಲ್ಯದ ಆಸ್ತಿಯ ಒಡೆಯ: ₹38 ಕೋಟಿ ತೆರಿಗೆ ಕಟ್ಟಿದ ಧೋನಿ!
ಲಿಖಿತಾ ಮಾತನಾಡಿ, 'ವಿಶ್ವದಾಖಲೆ ನಿರ್ಮಿಸುವ ಉದ್ದೇಶದಿಂದಲೇ ಕೂಚಿಪುಡಿ ಕಲಿತಿದ್ದೇನೆ. ಮೊಳೆಗಳಿರುವ ಸ್ಟ್ಯಾಂಡ್ನ ಮೇಲೆ ನಿಂತು ನೃತ್ಯ ಮಾಡುವುದನ್ನು ಅಭ್ಯಾಸ ಮಾಡುತ್ತಿದ್ದೆ. ಈ ವೇಳೆ ಅನೇಕ ರೀತಿಯ ಸಮಸ್ಯೆಗಳನ್ನು ಎದುರಿಸಿದ್ದೇನೆ. ಅನೇಕ ಸಲ ಗಾಯಗಳಾಗಿದ್ದೂ ಇದೆ. ಆದರೆ, ಕಠಿಣ ಪರಿಶ್ರಮದಿಂದ ಇದೀಗ ಯಶಸ್ಸು ಸಾಧಿಸಿದ್ದೇನೆ' ಎಂದರು. ಸ್ನಾತಕೋತ್ತರ ಪದವಿ ಪೂರ್ಣಗೊಳಿಸಿರುವ ಲಿಖಿತಾ, ಹೈದರಾಬಾದ್ನ ಖಾಸಗಿ ಕಾಲೇಜಿನಲ್ಲಿ ಉಪನ್ಯಾಸಕಿಯಾಗಿ ಕೆಲಸ ಮಾಡುತ್ತಿದ್ದಾರೆ.
