ನವದೆಹಲಿ: ಡ್ರಗ್ಸ್ ಕಳ್ಳಸಾಗಣೆ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿ ಎರಡು ವರ್ಷ ಜೈಲು ಶಿಕ್ಷೆ ಅನುಭವಿಸಿರುವ ಮುಂಬೈ ಮೂಲದ ದಂಪತಿ ಇದೀಗ ಭಾರತಕ್ಕೆ ವಾಪಸ್ ಆಗಿದ್ದಾರೆ. ಮಾದಕ ದ್ರವ್ಯ ಆರೋಪದ ಮೇಲೆ ಈ ದಂಪತಿಗಳ ಬಂಧನ ಮಾಡಲಾಗಿತ್ತು.
ಈ ದಂಪತಿಗೆ ಭಾರಿ ದಂಡ ಹಾಗೂ 10 ವರ್ಷಗಳ ಜೈಲುಶಿಕ್ಷೆ ವಿಧಿಸಲಾಗಿತ್ತು. ಆದರೆ, ಎಲ್ಲ ಆರೋಪಗಳಿಂದ ಇವರು ಮುಕ್ತರಾಗಿದ್ದರು. 2019ರ ಜುಲೈ 6ರಂದು ಮೊಹಮ್ಮದ್ ಶಾರಿಕ್ ಖುರೇಷಿ ಮತ್ತು ಪತ್ನಿ ಒನಿಕಾ ಕೌಸರ್ ಹನಿಮೂನ್ಗಾಗಿ ಕತಾರ್ಗೆ ತೆರಳಿದ್ದರು ಎಂದು ಎನ್ಸಿಬಿಯ ವಲಯ ನಿರ್ದೇಶಕ ಮಲ್ಹೋತ್ರಾ ಮಾಹಿತಿ ನೀಡಿದ್ದಾರೆ.
ದೋಹಾದ್ ಹಮದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿದುಕೊಳ್ಳುತ್ತಿದ್ದಂತೆ ಇವರನ್ನ ಡ್ರಗ್ಸ್ ಆರೋಪದ ಮೇಲೆ ಬಂಧನ ಮಾಡಲಾಗಿತ್ತು. ಇವರ ಬ್ಯಾಗ್ನಿಂದ 4.1 ಕಿಲೋ ಗ್ರಾಂನಷ್ಟು ಹಶಿಶ್ ವಶಕ್ಕೆ ಪಡೆದುಕೊಳ್ಳಲಾಗಿತ್ತು. ವಿಚಾರಣೆ ನಡೆಸಿ ದಂಪತಿಗೆ ಅಲ್ಲಿನ ನ್ಯಾಯಾಲಯ 10 ವರ್ಷ ಜೈಲು ಶಿಕ್ಷೆ ಹಾಗೂ 30 ಸಾವಿರ ಕತಾರಿ ರಿಯಾಲ್ ದಂಡ ವಿಧಿಸಿತ್ತು.
ಇದನ್ನೂ ಓದಿ: ಮಗಳ ಶಿಕ್ಷಣಕ್ಕಾಗಿ 'ಕಿಡ್ನಿ ಮಾರಾಟ'ಕ್ಕೆ ಅನುಮತಿ ನೀಡಿ: ಜಿಲ್ಲಾಧಿಕಾರಿಗೆ ಪತ್ರ ಬರೆದ ದಂಪತಿ!
ಸೆಪ್ಟೆಂಬರ್ 27ರಂದು ಒನಿಕಾ ಕೌಸರ್ ತಂದೆ ಶಕೀಲ್ ಅಹ್ಮದ್ ಖುರೇಷಿ ತಮ್ಮ ಮಗಳು ಹಾಗೂ ಸೊಸೆಯನ್ನ ಕತಾರ್ನಲ್ಲಿ ಬಂಧಿಸಿದ್ದಾರೆಂದು ಆರೋಪಿಸಿ, ಎನ್ಸಿಬಿಗೆ ದೂರು ನೀಡಿದ್ದರು. ಇವರು ಹನಿಮೂನ್ಗೆ ತೆರಳಿದ್ದಾರೆಂದು ಮಾಹಿತಿ ನೀಡಿದ್ದರು. ಇದರ ಕಾರ್ಯಾಚರಣೆ ನಡೆಸಿದ ಎನ್ಸಿಬಿ, ವಿದೇಶಾಂಗ ಸಚಿವಾಲಯಕ್ಕೆ ಸಂಪರ್ಕಿಸಿ ಮಾಹಿತಿ ನೀಡಿತ್ತು. ಇನ್ನು ವಿದೇಶಾಂಗ ಸಚಿವಾಲಯ ಭಾರತೀಯ ರಾಯಭಾರಿ ಕಚೇರಿಗೆ ಮಾಹಿತಿ ನೀಡಿ, ಪ್ರಕರಣ ಇತ್ಯರ್ಥಗೊಳಿಸಿದ್ದು, ಅವರು ಆರೋಪ ಮುಕ್ತರಾಗಿದ್ದಾರೆ. ಪ್ರಸ್ತುತ ದಂಪತಿ ಅಲ್ಲಿಂದ ಮುಂಬೈಗೆ ವಾಪಸ್ ಆಗಿದ್ದಾರೆ.
