ನವದೆಹಲಿ: ಜನರು ಎಲ್ಲೆಂದರಲ್ಲಿ ತಮ್ಮ ವಾಹನಗಳನ್ನು ನಿಲ್ಲಿಸಿ ಪಾರ್ಕಿಂಗ್ ಸಮಸ್ಯೆ ಉಂಟು ಮಾಡುತ್ತಿದ್ದು, ಇದಕ್ಕೆ ಕಡಿವಾಣ ಹಾಕಲು ಕೇಂದ್ರ ಸರ್ಕಾರ ವಿನೂತನ ಪ್ರಯೋಗಕ್ಕೆ ಕೈ ಹಾಕಿದೆ. ಇದು 'ಕಿರಿಕ್ ವಾಹನ ಮಾಲೀಕರಿಗೆ' ನಷ್ಟವಾದರೆ, ಜನರಿಗೆ ಲಾಭವಾಗಲಿದೆ.
ಹೇಗಿದೆ ಗೊತ್ತಾ ಹೊಸ ಪ್ಲಾನ್: ಯಾರಾದರೂ ವಾಹನ ಸವಾರರು ನೋ ಪಾರ್ಕಿಂಗ್ ಅಥವಾ ಜನನಿಬಿಡ ಸ್ಥಳದಲ್ಲಿ ಯರ್ರಾಬಿರ್ರಿಯಾಗಿ ವಾಹನ ನಿಲ್ಲಿಸಿದ್ದರೆ, ಅಂತಹದ್ದನ್ನು ಜನರು ಫೋಟೋ ತೆಗೆದು ಅದನ್ನು ಟ್ರಾಫಿಕ್ ಪೊಲೀಸ್ ಇಲಾಖೆಗೆ ಕಳುಹಿಸಬೇಕು. ಆಗ ಆ ವಾಹನ ಮಾಲೀಕರಿಗೆ 1 ಸಾವಿರ ರೂ ದಂಡ ಬೀಳಲಿದೆ. ಅದನ್ನು ಕಳುಹಿಸಿದವರಿಗೆ 500 ರೂಪಾಯಿ ಬಹುಮಾನವೂ ಉಂಟು.
ಈ ಬಗ್ಗೆ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿರುವ ಕೇಂದ್ರ ಸಚಿವ ನಿತಿನ್ ಗಡ್ಕರಿ, ಪಾರ್ಕಿಂಗ್ ಸಮಸ್ಯೆ ನಿವಾರಣೆಗೆ ಕೇಂದ್ರ ಸರ್ಕಾರ ವಿನೂತನ ಉಪಾಯ ಮಾಡಿದೆ. ವಾಹನವನ್ನು ನಿಲ್ಲಿಸಬಾರದ ಸ್ಥಳದಲ್ಲಿ ಪಾರ್ಕಿಂಗ್ ಮಾಡಿದರೆ ಅಂಥವರಿಗೆ ಝಲಕ್ ನೀಡಲಾಗುವುದು. ನೋ ಪಾರ್ಕಿಂಗ್ ಜಾಗದಲ್ಲಿನ ವಾಹನದ ಫೋಟೋವನ್ನು ಕಳುಹಿಸಿದರೆ, ಅಂತಹ ವಾಹನಕ್ಕೆ 1,000 ದಂಡ ಬೀಳಲಿದೆ. ಆ ದಂಡದ ಮೊತ್ತದಲ್ಲಿನ 500 ರೂಪಾಯಿ ಫೋಟೋ ಕಳುಹಿಸಿದವರಿಗೆ ಬಹುಮಾನವಾಗಿ ಸಿಗಲಿದೆ ಎಂದು ಹೇಳಿದರು.
ಈ ರೀತಿಯ ನಿಯಮವನ್ನು ಜಾರಿ ಮಾಡಲು ಸರ್ಕಾರ ಕಾನೂನು ತರಲಿದೆ. ಆಗ ಮಾತ್ರ ಪಾರ್ಕಿಂಗ್ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಸಾಧ್ಯವಾಗಲಿದೆ. ಕೆಲ ಸವಾರರು ತಮ್ಮ ವಾಹನವನ್ನು ಪಾರ್ಕಿಂಗ್ ಸ್ಥಳಗಳಲ್ಲಿ ನಿಲ್ಲಿಸುವ ಬದಲು ರಸ್ತೆ ಪಕ್ಕದಲ್ಲೇ ನಿಲ್ಲಿಸುವ ಚಾಳಿ ಹೊಂದಿದ್ದಾರೆ ಎಂದು ಗಡ್ಕರಿ ಹೇಳಿದರು.
ನಾಗ್ಪುರದಲ್ಲಿನ ತಮ್ಮ ಮನೆಯ ಅಡುಗೆಯವರು ಎರಡು ವಾಹನಗಳನ್ನು ಹೊಂದಿದ್ದಾರೆ. ದೇಶದಲ್ಲಿ ಪ್ರತಿ ಸ್ಥಿತಿವಂತ ಕುಟುಂಬಗಳು ಕನಿಷ್ಠ 6 ವಾಹನಗಳನ್ನು ಹೊಂದಿದ್ದಾರೆ. ಪಾರ್ಕಿಂಗ್ ಸಮಸ್ಯೆ ವಿಚಾರದಲ್ಲಿ ದೆಹಲಿಯ ಜನರೇ ಅದೃಷ್ಟವಂತರು. ಯಾಕೆಂದರೆ ವಾಹನ ಪಾರ್ಕಿಂಗ್ಗಾಗಿಯೇ ವಿಶೇಷ ರಸ್ತೆಗಳಿವೆ ಎಂದರು.
ಇದನ್ನೂ ಓದಿ: ಸೋನಿಯಾ ಗಾಂಧಿ ಅನಾರೋಗ್ಯ: ಇನ್ನೂ 4 ದಿನ ವಿನಾಯಿತಿ ನೀಡುವಂತೆ ಇಡಿಗೆ ರಾಹುಲ್ ಮನವಿ
