ಔರಂಗಾಬಾದ್(ಮಹಾರಾಷ್ಟ್ರ): ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. ದಿನನಿತ್ಯದ ಸಾಮಗ್ರಿಗಳ ಬೆಲೆ ಏರಿಕೆಯಿಂದ ಜನರೂ ಕಂಗಾಲಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಔರಂಗಾಬಾದ್ನಲ್ಲಿ ವ್ಯಕ್ತಿಯೋರ್ವ ಒಂದೆಡೆಯಿಂದ ಮತ್ತೊಂದೆಡೆ ತೆರಳಲು ಬೈಕ್ನ ಬದಲಿಗೆ ಕುದುರೆಯನ್ನು ಬಳಸುತ್ತಿದ್ದಾರೆ.
ಹೌದು, ಯೂಸೂಫ್ ಶೇಖ್ ಎಂಬಾತ ಕೆಲಸಕ್ಕೆ ಹೋಗಲು ಮತ್ತು ಕೆಲಸದಿಂದ ಹಿಂದಿರುಗಲು ಕುದುರೆಯನ್ನು ಬಳಸುತ್ತಿದ್ದಾರೆ. ದಿನಕ್ಕೆ ಸುಮಾರು 30 ಕಿಲೋಮೀಟರ್ ಅನ್ನು ಯೂಸೂಫ್ ಶೇಖ್ ಕ್ರಮಿಸಲು ಕುದುರೆ ಬಳಸುತ್ತಿದ್ದಾರೆ. ಯೂಸೂಫ್ ಶೇಖ್ ಬಳಿ ಇದ್ದ ಬೈಕ್ ತುಂಬಾ ಹಳೆಯದಾಗಿದ್ದು, ಹೆಚ್ಚು ಪೆಟ್ರೋಲ್ ಹಾಕಬೇಕಾಗಿತ್ತು. ಹಾಗಾಗಿ ಆತ ಕುದುರೆಯನ್ನು ಬಳಸಲು ಮುಂದಾಗುತ್ತಾರೆ. ಕಳೆದ ಐದಾರು ತಿಂಗಳಿಂದ ಯೂಸೂಫ್ ಕುದುರೆಯನ್ನು ಬಳಸುತ್ತಿದ್ದು, ಕೆಲಸ ಮಾಡುವ ಸ್ಥಳಕ್ಕೆ ಮಾತ್ರವಲ್ಲದೇ ಕುಟುಂಬದ ಕಾರ್ಯಕ್ರಮಗಳಿಗೂ ಕುದುರೆ ಬಳಸುತ್ತಿದ್ದಾರೆ.
ಬೈಕ್ ಬಳಸುವಾಗ ಪೆಟ್ರೋಲ್ಗೆ ತಿಂಗಳಿಗೆ ನಾಲ್ಕೈದು ಸಾವಿರ ರೂಪಾಯಿ ಖರ್ಚು ಮಾಡಲಾಗುತ್ತಿತ್ತು. ಈಗ ಕುದುರೆ ಬಳಕೆಯಿಂದಾಗಿ ವೆಚ್ಚ ಕಡಿಮೆಯಾಗಿದೆ. ಒಂದು ಕುದುರೆಗೆ ದಿನಕ್ಕೆ 50ರಿಂದ 60 ರೂಪಾಯಿ ಖರ್ಚು ಮಾಡಲಾಗುತ್ತಿದ್ದು, ಒಂದು ತಿಂಗಳಿಗೆ ಒಂದೂವರೆಯಿಂದ ಎರಡು ಸಾವಿರ ರೂಪಾಯಿ ಖರ್ಚಾಗುತ್ತದೆ. ಹಣದ ಉಳಿತಾಯದ ಜೊತೆಗೆ ಸಮಯವೂ ಉಳಿತಾಯವಾಗುತ್ತದೆ ಎಂದು ಯೂಸೂಫ್ ಶೇಖ್ ಹೇಳಿದ್ದಾರೆ.
ಇದನ್ನೂ ಓದಿ: ಹೋಳಿ ಸಂಭ್ರಮದಲ್ಲಿ ಕಂಠಪೂರ್ತಿ ಕುಡಿದು ಡ್ಯಾನ್ಸ್.. ತನ್ನಷ್ಟಕ್ಕೆ ತಾನೇ ಚಾಕುವಿನಿಂದ ಇರಿದುಕೊಂಡು ಸಾವು
ಪ್ರತಿ ದಿನ ಕುದುರೆಯ ಮೇಲೆ ಪ್ರಯಾಣ ಮಾಡುವುದು ವಿಭಿನ್ನ ಅನುಭವ. ಕುದುರೆ ಸವಾರಿ ಮಾಡುವುದನ್ನು ಪ್ರಾಣಿಪ್ರೇಮಿಗಳು ಇಷ್ಟಪಡುತ್ತಾರೆ. ಇನ್ನೂ ಕೆಲವರು ಫೋಟೋ ತೆಗೆದುಕೊಳ್ಳುತ್ತಾರೆ. ಬೈಕ್ ಓಡಿಸುವಾಗ ಯಾರೂ ನೋಡುತ್ತಿರಲಿಲ್ಲ ಎಂದು ಯೂಸೂಫ್ ಸಂತಸ ಹಂಚಿಕೊಂಡಿದ್ದಾರೆ.
